«Удмурт кыл» лы пыр потӥз…

Удмурт Дунне
By Удмурт Дунне Октябрь 28, 2016 12:08
apkrjc_ofym

Удмурт пиналъёслэн табере вань электрон учебникъёссы!

Прокуратура эскерем бере удмурт учебникъёслы коньдон сюриз

Кылем арын трос гожъямы удмурт кылъя учебникъёсын кылдэм югдур пумысен. Прокуратуралэн алонъёсыз калык понна шуккет выллем луизы. Кызьы азинскиз югдур, ӟечсэ-а, уродзэ-а тросгес вайизы эскеронъёс?

Ӟеч, но ярантэм, пе

Тодэ вайытон понна: удмурт кыл но удмурт литература предметъёсъя учебникъёс дышетыны ярантэмен лыдъямын вал, малы ке шуоно соос ӧвӧл ортчемын научной, педагогической, общественной но этнокультурной эскеронъёсты (экспертизаосты), соин валче пыремын ӧвӧл федерал перечене. Со уг вера, милям учебникъёсмы уродэсь шуыса, солы пумит, кылем арын «Ӟеч-а, бур-а, удмурт кыл» учебник (авторъёсыз Ю. Байтерякова, Н. Боталова) Удмуртилэн Кун премиеныз пусъемын, но выль дышетон стандартъёсъя федерал перечене пырымтэ книгаосъя дышетыны уг яра.

Прокуратура копаськиз дышетӥсьёслэн учебной программаосазы но — татысь но шекъёссэс шараязы. Кылсярысь, Шаркан ёросысь 11 школаын соос удмурт кылын гинэ гожтэмын вал. Сыӵегес ик учыръёс шараяськизы Дэри, Ува ёросъёсын. Кызьы пыкылод кадь та пумысен удмурт кылъя дышетӥсьёсты — соос дышето ук удмурт пиналъёсты, уроке кылэз тодӥсьтэмъёс уг ветло, нош анай-атайёслэн программаосты ноку учкылэмзы ик ӧвӧл. Соос интыын мон но удмурт кылын гожъясал. Но Россия Федерациысь «Кун кыл сярысь» закон вылэ чӧлскыса, Прокуратура куриз соосты одно ӟуч кылэ берыктыны. Кызьы валэктӥзы эскерисьёс: дышетӥсьёсты уг ало программаоссэс удмурт кылын гожъямлэсь, но бордаз одно луыны кулэ ӟуч сямен но гожтэмез. Ваньзэ-ӧвӧлзэ 18 предписание гожтэмын вал!

Сьӧлыктэм сьӧлык

Та учыр анай кылъя дышетӥсьёслы, ма, вань удмурт калыклы но ултӥян выллем йӧтӥз: ма, кызьы озьы, ми мырдэм но кызьы выриськом кылмес улӟытыны, дасо муртэн ке но удмурт классъёс люканы, нош татын кие шукко. Кӧня серем карыны луоно на удмурт кылэз, куке со асьме элькунын кемалась кун кылэн ялэмын ни! Сотэк но арысь аре школаос кулэсмо, предметэз факультативе выжто, ай созэ но куд-ог интыосын ӟуч кылъя дышетӥсьёс кемалась куто ни ЕГЭ-я тестъёс гожъяны. Ваньмыз сое тодо, но уг пыкыло, угось ӟуч кылъя но математикая ЕГЭ-ос валтӥсьёсыз луо. Ваньмыз со валамон, нокин ӧвӧл ӟуч кыллы пумит, но малы анай кыл чотын?

0102310,Национальная библиотека,презентация удмуртский учебник,Тимирзянова

Экспертизалы кулэясько покчи классъёслы чаклам учебникъёс.

Дышетӥсьёс нырысь ӵоксузизы. Ай вылаз ик директоръёссы, визь-нод сётэм но кыӵе ке амал утчам интые, выговор лякизы. Дышетӥсьёс лыдъязы, удмурт кыл но удмурт литература предметъёсты юромо школаысь утялтыса, шаерамы национальной образованиез куашкатыны выро. Но со малпанлы асьсэлэн но оскемзы ӧз поты, юрттэт курыса, дэмен редакцие жингыръязы. «Удмурт дунне» та пумысен мылкыдзэ огпол гинэ ӧз вера. Югдурез син азяз басьтӥз «Удмурт Кенеш», та югдурез сэрттыны-пертчыны выризы Пичи Кенешын но пумиськылэмын Прокуратураын ужасьёсын.

 

Дышетонъя но наукая министерство та учырын ассэ «сьӧлыктэк сьӧлыкоен» лыдъяз. Законъя пиналъёслэсь анай кылынызы дышетскон правозэс быдэсъян, школаослы учебникъёс висъян понна та ведомство кыл кутэ ке но. Огласянь, соосты валаны луэ: федерал перечене сюрон понна дыр но ичи висъямын вал, коньдон но ӧвӧл! Вылаз ик, экспертизалы кулэясько покчи классъёслы чаклам учебникъёс гинэ, малы ке шуоно 6-тӥ-11-тӥ классъёсын учебникъёсъя дышетон радъяське национально-региональной компонент чотын, нош со уг чакла экспертиза лэсьтонэз.

кузнецов

«Удмуртия» издательстволэн директорез Юрий Кузнецов анай кылъёсъя экспертизаосты воксё кулэтэмен лыдъя — кызьы федералъёс (москваос) дунъялозы удмурт кылын учебникез?

«Удмуртия» издательстволэн директорез Юрий Кузнецов анай кылъёсъя экспертизаосты воксё кулэтэмен лыдъя — кызьы федералъёс (москваос) дунъялозы удмурт кылын учебникез? Соос сое берен Удмуртие ыстозы, асьме адямиосты ик ужатозы, со понна асьме бюджетысь миллионъёсты асьсэлы кыскозы. Ярам, одӥг пол гинэ сӥс пыр потоно луысал ке, сыӵе эскерон пыр потоно, пе, вить арлы быдэ! Кытысь сомында коньдон таӵе вакытэ?

Но Прокуратура та учырын чурыт луэмзэ возьматӥз, кызьы валэктӥз одӥгаз интервьюын элькунысьтымы прокурор Сергей Панов, законъёс малпамын бере, соосты быдэсъяно, нош Прокуратуралэн ужез — ӵапак законлэсь быдэсъяськемзэ чаклан.

Эскерисьёс лыдъямъя, экспертизатэк валаны уг луы, марлы дышето та учебникъёс, отын, оло, калыкъёсты ваче карон мылкыдъёс вань. Нялтас вераса, «Россия Федерациын дышетон сярысь» (N 273-ФЗ) федерал законэз тӥян учыръёс удмурт кыл предметъя гинэ шараямын ӧй вал, сыӵе ик учыр пор но фин кылъёсъя предметъёсын. Та югдур сярысь Удмуртиысь Правительствое ивортэмын вал 2015-тӥ арын 13-тӥ мае, но дышетскон ар кутскытозь, нокин ӧз вырӟы, нокыӵе ужрадъёс кутэмын ӧй вал, соин ик дышетон удысысь чиновникъёс асьсэлы гинэ йыркуръяськыны кулэ.

Бодылэн пумыз кык

Маин бен йылпумъяськиз та учыр? Уд оскелэ, но пайдаен. Удмурт Элькунысь Прокуратура ивортэмъя, учебникъёс пумысен куронъёсты тӥян учыръёсты палэнтон вылысь чакламын 4 миллион манет. Анай кылъя учебникъёсты выльдон ужъёс мыно азьвыл чаклам планъя. Али дырлы федерал перечене пыртон вылысь дасямын ни удмурт кылъя 3 комплект (ваньмыз 14 пумо) учебник. Комплектэ, валэктыны кулэ, печатлам учебник сяна, одно пыре электрон учебник (пинал планшетэн но дышетскыны быгатоз) но методпособие. Удмурт кыл предметъя учебниклы ӟеч дунъет сётэмын Россиысь Наукаосъя академия ласянь. Учебникъёсъя вань куронъёсты быдэстэм бере «Удмуртия» издательство соосты печатласа Россиысь дышетонъя министерстволы возьматыны кулэ на. Собере, оскем потэ, «Удмурт кыл» борды номыр ласянь уз копаське ни — ма, «Удмурт кыл» та дыр ӵоже лыос пыртӥ потӥз ни, шуыны луоз.

Огласянь, Прокуратуралэн сыӵе чурыт куронъёсыз югдурез интыысьтыз вырӟытыны юрттӥзы, шуо дышетон удысын тыршисьёс. Вылӥос удмуртлык шоры но амалтэк выль сямен учконо луизы. Трос шат со 4 миллион манет 60 миллиард пала огъя бюджетысь? Нош кӧня лулсэр быдтэмын!

— Сыӵе кӧтӝожъёс ӧй луысалзы, ваньмыз ас интыязы куронъёсты быдэсъясалзы ке, — шуэ элькун прокурор. — Милям ужпуммы ӧй вал удмурт кылэз дышетонлы люкетон, солы пумит — ми та предметэз мукетъёсыныз оградэ ӝутыны юрттӥм. Оскем потэ, азьланяз со шоры син ултӥ уз учке ни.

Зинаида Рябинина

Удмурт Дунне
By Удмурт Дунне Октябрь 28, 2016 12:08