Шаермы лэсьтэ Францие выж

Удмурт Дунне
By Удмурт Дунне Октябрь 21, 2016 17:15

Кылем арня вискын Иже люкаськылӥзы Россиысь улосвылъёсысь, озьы ик  Бахрейнысь, Белоруссиысь, Венгриысь, Китайысь, Франциысь бизнесменъёс, политикъёс. Соос вераськизы огъя ужъёс борды басьтӥськон сярысь.

Удмуртиысь кивалтӥсьёс кенешо Г. Клименкоен (паллянысез).

Удмуртиысь кивалтӥсьёс кенешо Г. Клименкоен (паллянысез).

«Бизнес-мост Удмуртии» ужрад 4 нунал ӵоже кыстӥськиз, 7 интыосын 30-лэсь трос пӧртэм кенешонъёс, котрес ӝӧк сьӧрын пумиськонъёс, мастер-классъёс ортчизы. Отын чузъяськизы огвыллем юанъёс: кызьы, пӧртэм проектъёсты пыӵатыса, Удмуртилэсь экономиказэ юнматоно, социальной удыссэ азинтоно? Кызьы та уже кыскыны луоно инвесторъёсты?

Форуме вуылӥз Россилэн Президентэзлэн советникез Герман Клименко. Со меӵак вераз: Удмуртия вазен пытсамын вал. Со ужаз обороналы. Соин ик котьку тодылӥз: заводъёсыз уз сылэ, заказъёс луозы. Но улон воштӥськиз. Табере асьтэлы но сюлмаськоно ӵуказе нунал сярысь.

Удмуртия возьматӥз выль ужъёс борды басьтӥськыны, ужбергатӥсьёсын одӥг кыткетын луыны дась луэмзэ. Удмуртиын берло дыре ӧжыт уг лэсьтӥськы  инвесторъёсты кыскон ласянь. Кун но бизнес кышкатэк басьтӥсько ни огъя проектъёс борды — туэ ар кутсконын гинэ соос 62 пумо вал. Россиысь улосъёс пӧлын элькунмы ужбергатӥсьёсын кусыпъёс тупатыны быгатэмезъя 2015-тӥ арын 13-тӥ интыын луиз.

Удмуртилэсь бадӟым луонлыкъёссэ валало палэнын но. Китайысь но Бахрейнысь вуэмъёс, кылсярысь,  вераськизы  дышетон, тазалыкез утён, вуз поттон но мукет удысъёсын уртче ужъёс борды басьтӥськон сярысь. Асьме дорысь вузъёсты Францие келянэз радъян сярысь озьы ик кенешемын отысь GE2B компанилэн директореныз Елизавета Головановаен. Кутскыны луоз, пе, губи, торф, тэкит бордысен.

— Французъёс лыдъяло: Россиен соосты огазея литература, политика шоры огкадь учкон но экономикаын кусыпъёс, — шуиз со. — Бизнесэз радъяку, тае одно лыдэ басьтоно. Эшшо Удмуртия французъёс понна — тодмотэм. Но соос туж ярато выльзэ усьтыны. Соин ик тодматскыны пумит уз луэ, малпасько. Нош кылпум поттылӥды ке Брангуртысь песянайёс сярысь, мылкыдзы уката бурдъяськоз.

Нош Белоруссия уртче ужамлэсь пайдазэ  валаз ни кӧня ке ар талэсь азьло. Отысь   басьтӥськом гурт удыслы, ЖКХ-лы техника, эмъян тӥрлык, мебель, дӥсь но мукетсэ. Отчы келяськом реакторъёс, пуртыос, кеньыръёс, пызь но мукетсэ. Белоруссилэн Россиысь посольствоеныз кивалтӥсь Денис Тимохин эшлыко кусыпъёсмес азинтон мылкыдзэ вераз.

Форум дыръя пусъемын устоосыз инвесторъёс, проектъёсын ужасьёс, кылсярысь, «Ижысь открытка» проектэз радъясьёс. Соос ортчытӥзы Иж сярысь мадёсъёсъя открыткаослы конкурс.

Кин пуктоз дельфинарий?

Форум дыръя ӵектэмын 6 проект, соос бордын власть но бизнес уртче ужаны быгатозы. Ваньмыз герӟаськемын калыклы улон-вылонын юрттэт сётонэн.

 Дельфин курисьёс трос

Дэмланъёс пӧлысь тужгес бадӟымез но дуноез — Ижысь зоопарк борды дельфинарий пуктон. Солэн дуныз 800 миллион манет пала.

Зоопарклэн директорез Светлана Малышева лыдъямъя, дельфинарийлэн асдуныз туж ӝог берытскоз. Угось зоопарке арлы быдэ ог 600 сюрс мурт вуылэ. Удмуртиысь сяна, мыло-кыдо лыкто  Татарстанысь, Башкириысь, Киров, Пермь улосъёсысь.

— Дельфинарий усьтон сярысь малпанмы юнме ӧз кылды, — валэктӥз Светлана Малышева. — Калыклэсь юалляськиськом, мае потэ адӟемзы зоопаркысь. Дельфин курисьёс туж трос. Та пӧйшуръёс, мылкыдэз ӝутэм сяна, тазалыкез но юнматыны юртто.

Дельфинарий пуктонлы инты, пе, вань: зоопарклэн 8 гектар музъемъёсыз бушесь на. Со сяна, солэн аслаз котельноез, 5 бассейнэз — соосты утялтон опытэз бадӟым ни.

Ужбергатӥсьёслэн юанзы кылдӥз: нош дельфинариез пуктонлы быдтэм коньдонэз дыраз берыктыны ӧз луы ке, кин та понна кыл кутоз? Валэктӥзы: Удмурт Элькун. Угось проектэз улонэ пыӵатон понна сюлмаськоз республика.

 «Шундыберган» кельшоз куноослы

Кыӵе умой луысал, «Лудорвай» музей-заповедникын кунокуа, кафе, конференциос ортчытъян зал луысал ке! Соин кылдӥз «Шундыберган» проект.

Нош со проектэз улонэ пыӵатыны мылкыд карисьёс шедьысалзы ке ужбергатӥсьёс пӧлын — уката усто луысал.  Форумын таӵе мылкыдзэ шараяз «Лудорвайлэн» кивалтӥсезлэн воштӥсез Ирина Вершинина.

— Усьтэм инбам улын таӵе музей-заповедник тросэзлы туристъёслы туж тунсыко, — шуиз со. — Арлы быдэ дорамы вуылэ ог 35 сюрс мурт,  пӧлазы кунгож сьӧрысь но куноос. Но жаляса верано, соосты уйлы кельтыны ум быгатӥське — кунокуаосмы ӧвӧл. «Шундыберган» проектлы луыса озьы ик конференциос ортчытъян зал, кафе усьтыны быгатысалмы.

Та проектэз но улонэ пыӵатыны инты сюроз, пе. 2013-тӥ арозь «Лудорвайлэн» 40 гектар музъемъёсыз вал, али 60 гектарозь йылтэмын.

Проектлэн огъя дуныз 150 миллион манет пала, но сое пичиен-пичиен висъяны луоз.

 Спорт нокинлы  ӧз люкеты на

Ижын 50 метръем бассейн пуктыны вазенгес кутскемын. Тае ас вылаз басьтӥз вал «Газпром». Но ужъёсты азинтыны солэн али луонлыкъёсыз ӧвӧл. Оло, лэсьтӥськонэз азинтыны мукет мылкыд карисьёс шедёзы?

Мугорез кыдатон культурая, спортъя но егитъёсын ужан политикая министерствоысь валтӥсь специалист Денис Парахин пыр-поч валэктӥз, кыӵе со луыны кулэ.  Отын, пе, тренировкаос ортчытъялозы спортшколаосын дышетскисьёс. Но инты тырмыны кулэ огшоры калыклы но. Луоз 2 бассейнэз: 50 но 12 метръемесь. Огдыре 140 мурт ёзвиоссэ кыдатыны быгатоз, эшшо 600 муртлы трибуна луыны кулэ. 100 машиналы парковка лэсьтоно на. Проектлэн дуныз ог 800 миллион манет.

Денис Парахин ик тодматӥз эшшо одӥг проектэн — Вотка каре йӧ каток пуктонэн. Таиз «Знамя» стадион бордын луыны кулэ. Воткаос туж ярато спортэн вырыны, соин ик каток ноку буш уз улы.

Ужбергатӥсьёслы ӵектэм проектъёс пӧлысь кыкез герӟаськемын мӧйыослы но инвалидъёслы юрттонэн. Ижын соослы реабилитацияя центр усьтоно, эшшо  Нагорныйысь лулсэр висёнъёсъя интернатлы притык пуктоно. Та учреждениослэн кулэлыксы элькунамы туж бадӟым. Черодын туннэ нуналлы ог 900 мурт, со пӧлысь 690-эз уло Ижын но Дэриын.

Аквапарк яке курорт?

Санкт-Петербургысь Colliers International компания эскериз Ижысь ипподромез но солы матын луись  «Металлист», «Нефтемаш» стадионъёсты, эмъян учреждениосты но  мукетсэ. Шуиз:  отын  калыклы шутэтскон интыос кылдытыны луоз.

Ваньмыз малпамъя пӧрмиз ке, та интыын аквапарк но пӧртэм аттракционъёс пуктыны луоно, шуиз компанилэн кивалтӥсез Андрей Косарев. Соку отчы шутэтскыны лыктозы палэнысь куноос но. Но коньдонэз шыръяно луиз ке, семьяен шутэтскыны ярамон курорт ӝутоно — мед луоз отын спа-отелез но, кунокуаосыз но, спортцентрез но, шутэтскон базаез но… Ипподромез паськытатоно — ярмаркаос, адӟытонъёс ортчытъяны ӟоскыт медаз луы. Эшшо усьтоно кузпалъяськон дворец.

Андрей Косарев верамъя, та проектъёсы али воштонъёс пыртыны луоно на. Но 2017-тӥ арозь соос быдэсак дась луыны кулэ ни.

Санкт-Петербург но Удмуртия пӧртэм удысъёсын уртче ужан сярысь огкыл гожтӥзы  туэ май толэзе. Озьы солэн нырысетӥ емышъёсыз быгыльско ни.

— Тӥляд но, милям но обороналы ужась предприятиосмы юнэсь, — форум дыръя вераз Санкт-Петербургысь промышленностья комитетэн кивалтӥсь Максим Мейсин.  — Озьыен, та удысын уртче кариськыны быгатӥськом. Али вераськонъёс  нуисько уйпал столицаысь Импортозамещениея центрын Удмуртилы инты висъян сярысь — малпасько, та малпан улонэ пыӵалоз.

Элина Кумачёва

Туспуктӥз Э. Карипов

 

 

Удмурт Дунне
By Удмурт Дунне Октябрь 21, 2016 17:15