Шаерамы инвестициосты кысконо

Удмурт Дунне
By Удмурт Дунне Октябрь 7, 2016 14:00

 

Удмуртия пыриськиз Сочиын ортчем Инвестициосъя калыккуспо форуме. Вал малы дышетскыны но, мае возьматыны но.invest, Сорокин Д.

Инвестициосъя форумъёсы элькунмы арлы быдэ пыриське: ог-огедлэсь дышетсконлэн пайдаез бадӟым. Удмуртилэн Тӧроез А. Соловьев пусйиз: та рад элькунмы понна валтӥсез луиз Кунлэсь но ужбергатӥсьёслэсь уртче азинсконзэс радъянъя центрен огкыл гожтон. Кун но ужбергатӥсьёс берло дыре дӥсьтыса басьтӥсько ни огъя проектъёс борды: 2012-тӥ-2015-тӥ аръёсы оглом 50 пала уртче ужъёс мытэмын.

Экономикая министр Михаил Зайцев верамъя, Россиысь улосвылъёс та форуме лыкто тужгес тунсыко проектъёсынызы. Та рад соос 62 пумо вал. Бадӟым люкетэз герӟаськемын калыклы улон-вылонын юрттэт сётонэн, кылсярысь, инвалидъёслы уж интыос кылдытонэн, мӧйыосты компьютерлы дышетонэн но мукет. Удмуртия 3 проектсэ возьматӥз: «Егитъёслы квартира» программаез, Гурт шудонъёсты но «Мынам нырысетӥ картае» проектэз.

Берлоез Россиысь тужгес усто проектъёс пӧлы шедиз. Вераны кулэ, элькунысьтымы школаосын со витетӥ арзэ пыӵатӥське ни. Туннэ уката паськыт кутӥське Ижын, озьы ик солы синмасько ни Глазов, Вотка, Сарапул, Можга городъёсысь но Шаркан, Балезино но Кез ёросъёсысь школаосын. Картаен нылпиос транспортын ворттыло, школае пыро-пото, сисько…

— Та проектмылы синмаськизы тросэз улосъёс но, — пусйиз М. Зайцев. — Кылсярысь, Пенза, Нижний Новгород улосъёсысь делегациос пыр-поч юалляськизы, мар бордысен кутсконо шуыса.

Ужбергатӥсь, «Мынам нырысетӥ картае» проектлэн кивалтӥсез  Елена Сурнина уг ваты: та проектэз мытонлы кошкем коньдонзэ 4 ар куспын берыктыны малпа вал. Ӧзгес пӧрмы, пе, озьы ке но кунэн одӥг кыткетын ужаны тунсыко. Калыклы ярамон уж лэсьтэ ук. Соин ик та проектсэ уката паськытатыны чакла.

Форум дыръя выль малпанъёс но кылдӥзы. Кылсярысь, Удмуртия но Татарстан уртче ужаны кутскозы, вылды, машина поттонын. Бускельёсмылэн но та удысъя кластерзы кылдытэмын, асьмелэн но вань. Но ог-огедлэсь дышетскон, ог-огедлы юрттон мултэс уз луы, шуиз М. Зайцев. Озьы ик, пе, элькунмылы туж тунсыко луизы тазалыкез утёнэн, транспортэн герӟаськем проектъёс.

Элина Кумачёва

Туспуктӥз  Донат Сорокин, «Тасс» ИА

Удмурт Дунне
By Удмурт Дунне Октябрь 7, 2016 14:00