Одӥг удысын 40 ар

Удмурт Дунне
By Удмурт Дунне Октябрь 14, 2016 15:10

shirobokovaУдмурт Республикалэн Тӧроез Александр Соловьев резиденциын сӥлы кариз кун наградаосын пусъем муртъёсты. Пӧлазы вал машина поттон, эмъян, югдурез утён, гурт но мукет удысъёсын ужасьёс.

«За заслуги перед Отечеством» орденлэн II степенё медаленыз пусъемын Сьӧлта ёросысь «Мельничанское» СПК-ысь скал кыскись Татьяна Баева. 8-тӥ классэз йылпумъяса, со гуртысьтыз фермае лыктӥз. Скал кыскись луыса 40 ар ужаз. 58 аресаз но тэк пуконэз уг тоды, та вакытэ пудо куайытэ. Ас вакытаз ёросысь устоез скал кыскись вал. Ӟеч тыршемез пусъемын «За трудовую доблесть» медален, Россиысь Гурт хозяйствоя министерстволэн Таукаронэныз. 1989-тӥ арын солэн туспуктэмез пыртэмын вал шаерысьтымы Данъян пул вылэ.

«ИжГорЭлектроТранс» предприятиысь Зоя Широбоковалэн но ужан стажез 40 ар люкаське. 12 арзэ трамвай нуллӥз, берло аръёссэ валтӥсь специалистлэсь ужзэ быдэсъя,  вань трамвайёс понна кыл кутэ. Ас удысаз ӟеч ужамез понна со пусъемын «Россиысь транспорт удысысь дано ужась» нимын.

Пӧртэм удысъёсысь 30 пала адямиос Россиысь Президентлэсь кун наградаоссэ басьтӥзы. Соосты сётыса, Александр Соловьев шуиз: уженыды данъяськоды пичи шаермес, тӥледын валче Удмуртия азинске но выль вормонъёс басьтэ.

Валентина Емельянова

Удмурт Дунне
By Удмурт Дунне Октябрь 14, 2016 15:10