Мар сётэ палэнын дышетскон

Удмурт Дунне
By Удмурт Дунне Октябрь 11, 2016 12:33
Н. Кондратьева: вылӥ школаын ортчись воштӥськонъёс берлань чигнанэн ӵошкало.

Н. Кондратьева.

Удмуртъёс тодон-валанзэс муромытыны кунгож сьӧры ӵем ветло. Алигес Венгрие 9 толэзьлы кошкиз Удмурт кылъя, финно-угроведениея но журналистикая институтлэн директорез Наталья Кондратьева. Мар сётэ палэнын дышетскон?

— Дышетон, наука удысын ужаськод ке, пӧртэм стажировкаос пайда ваё. Тон адӟиськод, кызьы азинтӥське дуннеысь наука, валаськод, мар бордын ужаны кулэ асьмеос но, — вера Наталья Кондратьева. — Дасо ар талэсь азьло асьмеос ум ик тодӥське вал, мар со онтолингвистика — наука, кудӥз чакла, кызьы пиналъёс вераськыны дышо. Учебник кылдытыку, асьмеос учкиськом кунгожсьӧр кылэз дышетонъя методикаез, ужаськомы кылысь кылэ берыктэм литератураен гинэ. Соин ик 10 ар дышетӥськом англи кылэз, но сое ум тодӥське. Европаын 1980-тӥ аръёсы ик кылдытэмын ни вал коммуникативной метод, соя нимысьтыз саклык висъяське вераськонлы гинэ — гожъяськыны быгатон кулэ ӧвӧл. Но та палдурес. Кулэ, эсэпсэ валаса, созэ но, тазэ но дышетыны. Соин ик Финляндиын туннэ, кунгожсьӧр кылъёсты дышетыку, нимысьтыз методикаез куто — функциональной грамматикаез. Таиз возьматэ: кылэз дышетыку, асьмеос саклык висъяны кулэ солы гинэ, мар асьмелы тужгес кулэ. Асьмеос культо (сноп), кенэм (конопля) кылъёсты ум тодӥське ни ке, малы со кылъёсты учебникъёсы пыртод, тужгес но пичи классъёсын дышетскисьёслы но ӟучомем пиналъёслы. Дышетыны кулэ сое гинэ, мае  адӟиськомы нуналысь нуналэ, сое шонер вераны но шонер гожтыны быгатыны кулэ, шуо финъёс. Малпасько, сыӵе методика ӝоген пыӵалоз Удмуртиын но.

Али асьмелэн огъя вылӥ образованиын бадӟым инты басьтэ теорилы дышетон. Практика палэнэ кыле, студент, пе, ачиз дышыны кулэ ужаны. Европаын дышетон воксё мукет сямен радъямын: практика уногес. Биология урок мынэ ке, курегез киязы куто, учко, кызьы пӧрмемын йырвиымыз, маин пӧртэм мукет животъёслэсь. Зэм, практика гинэ луиз ке, пиналъёс герӟаны уз быгатэ адӟем-тодэмзэс.

Туэ август толэзьысен Финляндиын ялэмын выль реформа. Финъёс реформаосты ортчытъяны уг ярато, но таяз рад вырӟизы. Соос азьвыл предметъёслы дышето ке вал, табере саклык висъяло ужаны но малпаськыны быгатонлы. Кылсярысь,  училищеын гостиницаын ужанъя курсъёс дыръя уг дышето англи кылэз, математикаез, обществоез — быдэс нунал чаклало, кызьы радъяны кулэ гостиницаын ужез. Кызьы клиентэн вераськод — потоз кылэз тодэм бордысь, кызьы смета лэсьтод  — потоз математикаез валам бордысь, кызьы законъёсты кутод — потоз обществознаниез тодэмед бордысь. Финъёс тыршо туала улонлэн куронъёсызлы тупаны, кылдытыны зэмос дышетон система. Мынам тодматскеме потэ, кызьы дышетон система сояз я таяз кунын азинтӥське. Тулыс Удмурт кун университетэ берытскыса, солэсь оглюкетсэ ке но асьме дышетонын пыӵатэме потэ.

Удмурт кылъя, финно-угроведениея но журналистикая институтысь дышетӥсьёс пӧлысь ог 50 процентэз стажировкаосы потало. Со адямиосты воштӥськонъёслы дась каре. Журналистика удысын ик программа вошъяськемын ӧвӧл ни, шуыны луоз, берло 10 ар ӵоже. Соин ик, одӥг интыын пукыса, пайдаез уз луы.

Венгрие таяз арын гинэ кошкемын магистратураын дышетскись 3 мурт. Венгеръёс али фин-угор кусыпъёслы самой трос уксё висъяны быгато. Сыӵе луонлык вань бере, стажировкае отчы ик кыстӥськиськом. 5 выпускникмы Венгрие кылемын. Удмуртъёс асьсэ выжыоссы борды бурмемын бере, ӵемысь берытско. Уг берто ке, кылмес палэнын но азинтыны юртто. Со сяна, юртто студентъёсмылы тодмотэм кунын интызэс шедьтыны. Университетъёс куспын проект лэсьтыку но, куддыр, соослы вазиськиськом. Туж тросэз потэ адями бордысь. Куд-огез, шаераз кыльыса но, удмуртлык понна номыр уз лэсьты.

Елена Сараматова

Удмурт Дунне
By Удмурт Дунне Октябрь 11, 2016 12:33