Кужыммес но, куарамес но — огазе!

Удмурт Дунне
By Удмурт Дунне Октябрь 6, 2016 15:30
kenesh? moskvin

«Удмурт Кенешлэн» Пичи Пурга ёзэзлэн кивалтӥсез Василий Москвин луиз ёросысь Депутатъёслэн Кенешсылэн кивалтӥсез

Кылем арняе  «Удмурт Кенешлэн» исполкомез ортчиз. Эскеремын огазеяськонлы 25 ар тырмонэз пусъёнъя ужпумъёс но мукет юанъёс.

Огазеяськонлэн тӧроез Татьяна Ишматова ивор-тӥз: сӥё-дано ӝыт луоз 8-тӥ толсуре (декабре) Удмурт театрын. Нош со дырозь ёросъёсын но городъёсын асьсэлэн ужрадъёссы ортчозы. Исполкоме пырисьёс ӵекто: та учырез тросгес калык мед тодоз шуыса, котькуд библиотекаосын, клубъёсын аспӧртэм пумиськонъёс, адӟытонъёс ортчытъяно. Нош Ижкарын октябрь-ноябрь толэзьёсы ужалозы котырес ӝӧкъёс, кенешон (дискуссионной) клубъёс.

Татьяна Витальевна озьы ик быръёнъёсъя ивортон лэсьтӥз. «Удмурт Кенешез» азьло ялан пыкыло вал быръёнъёсы пыриськымтэез понна, но та рад «кенешчиос» усто ужазы — огазеяськон но, удмурт калык но, быдэс элькун понна но бадӟым вормон луиз Алексей Загребинлэн Кун Думаысь депутатэ потэмез. Со понна куара сётэмъёс пӧлысь данакез удмуртъёс шуим ке, ум янгышалэ, шуиз Т. Ишматова — юалляськонъёс сое возьмато. Алексей Егорович  азьвылгес ини «Удмурт Кенешлы» но со понна куаразэс сётэмъёслы тау кылъёссэ вераз. Али Алексей Егорович малпаське, кыӵе комитетын ужалоз: дышетонъя яке йӧскалык политикая. Тросэзлэн юанзы кылдэ, кин кивалтоз Историяя, кылъя но литературая институтэн, Алексей Загребин Москвае кошкиз ке. Таяз арняе со та ужпумъя пумиськылӥз Наукая академилэн Урал ёзысьтыз кивалтӥсьёсын, озьы тодмо луиз: институтэн кивалтоз… ачиз ик Алексей Егорович. Тэрозы-а куспазы наука но политика? Быгатоз-а депутат кивалтон ужезлы дыр висъяны?

— Таӵе учыръёс ӵем уг пумиськыло, валасько, капчи уз луы, но институтэн люкиськыны мон уг быгаты, дыр, соин ик туж тыршо, — шуиз А. Загребин.

Вань мукет но вормонъёс — кылсярысь, «Удмурт Кенешлэн» Пичи Пурга ёзэзлэн кивалтӥсез Василий Москвин луиз ёросысь Депутатъёслэн Кенешсылэн кивалтӥсез, ас ёрос Кенешъёсазы депутат луизы исполкомлэн ёзчиосыз Татьяна Мосова (Эгра) но  Елена Перевозчикова (Шаркан). Огкылын вераса, туэ удмурт калык быгатӥз огазе кариськыны.

Асьме понна туэ шумпото бускельёсмы но — башкир удмуртъёс, соос туж куное  возьмало. Коньывуон толэзь пумын Башкириын ортчозы удмурт культуралы сӥзем нуналъёс. Кызьы шуиз Камсьӧр удмуртъёслэн огазеяськонзылэн тӧроез Флюра Чибышева, бускельёсмы доры потозы  артистъёс но дышетон удысын тыршисьёс. Дасяське узыр программа.

«Удмурт Кенешлэн» 25 ар тырмонэзлы «Элькуновидение» ужрадзэ туэ сӥзе «Мынам Удмуртие» телерадиокомпания но. Нялтас вераса, туэ та проектлы 5 ар тырме, та дыр ӵоже со одӥгез устоез но яркытэз луиз, шулдыр кырӟанъёсын узырмиз   радиолэн фондэз. Кызьы ивортӥз телерадиокомпаниысь  национальной программаосъя редактор Сергей Касаткин, юри малпам кадь, туэ конкурсэ пыриськыны 25 ӵектон вуиз. Зэм, кӧняез со пӧлысь пыриськоз концертэ, тодмо ӧвӧл на, угось  соос нырысь сӥс пыр потыны кулэ. Озьы нырысетӥез тур ортчоз 8-тӥ коньывуонэ «Мынам Удмуртие» телерадиокомпаниын. Быръёнэз ортчемъёс 22-тӥ коньывуонэ пыриськозы концертэ, отын ини тужгес устооссэ бырйыны быгатозы асьсэос учкисьёс но.

«Удмурт Кенешлэн» юбилеезлы пичи ке но кузьым мед лэсьтысал котькуд удмурт адями, шуизы исполкомчиос, ужрадъёс дасяса яке отчы пыриськыса. Асьме сярысь тросгес калык мед тодоз.

 Зинаида Рябинина

 

Удмурт Дунне
By Удмурт Дунне Октябрь 6, 2016 15:30