Кукмор ёросысь Лельвиж: Удмуртъёс уло дэмен

Удмурт Дунне
By Удмурт Дунне Октябрь 12, 2016 13:47

Озьы кылдӥзы культурая юрт но, черк но

Татарстанысь Кукмор ёросысь Лельвиж мукет удмурт гуртъёслэсь палэнэ пуксемын, бускельёсыз луо бигер Сардекбаш, крашин Унгурт но Поршур.

 Бигере потӥды ке, узырмоды

Лельвиж урам.

Лельвиж урам.

Лельвижлэсь сыӵе «нимаз кариськемезлэсь» мугзэ историысь югдур валэктэ. Котырысьтыз удмурт гуртъёс бигермизы. Инты нимъёс гинэ возьмато на, куке но отын асьме выжыос улӥзы шуыса. Калыкын бигере пырон сярысь таӵе веран кылемын: «Огпол бигеръёс удмуртъёслы шуиллям: бигере потӥды ке, узырмытом. Удмуртъёсыд таре, бигер дӥсьёсын дӥсяськыса, потӥллям. Бигеръёс адӟиллям но эй! серекъяло ук, «маскара, маскара!» шуыса. Тӥни озьы Маскара бигер гуртлэн нимыз потэм».

Лельвиж кызьы ке удмурт кылзэ но асваланзэ утем. Оло, бадӟым луэменыз сям-йылолъёссэ возем? Со Кукмор но Балтась ёросъёсысь удмурт гуртъёс пӧлын тужгес но бадӟымез луэ. Али гурт чеберске. Со пуксемын шур дуре, ярдуртӥ одӥг но ӝыны иськем кыстӥське. Урамтӥ ортчыку, адӟисько пӧртэм буёло сайдинген шобыртэм коркаос но 2 этажъем кирпич юртъёс, соос вадьсын сыло кирпичлэсь пуктэм гидъёс, яркыт буёлъёсын пиштӥсь корт капкаос. Пулэсь лэсьтэм юртъеръёс пумен ышо ни.

Выль урамысь синйылтоно извесен (известь) маялтэм юбоен капкаез. Та коркан улӥсез ӧвӧл. Юрт ортчем даурлэн синпелетэз выллем сылэ. Гуртоос верало, сыӵе капкаос трос ӧй вал, соосты 1920-тӥ аръёсы узыр муртъёс пуктылӥллям. Куке но та йыг-йыг капкаос Ӟыккан, Педор, Пошто, Кобы семьяослэсь юртъерзэс чебер кариллям но ваньбурзэс утиллям.

лельвиж

И. Васильев Светлана нылыныз но Михаил эмеспиеныз.

 Нылпиос вордско ке но, коркаос бушало

Уллапалась Починка ураме тубон сямен куинь кебит (магазин) вӧзтӥ ортчиськод. Гуртлэн шораз вуыса, адӟиськод 2 этажъем кирпич школаез. Кыдёкын ик ӧвӧл, сюрес вӧзын, выль черк но лулчеберетъя юрт. Сюреслэн мукет палаз — Вахитов нимо азьмынӥсь, узыр хозяйстволэн ю-нянь возён кеносъёсыз, вӧл-вӧл гидъёсыз, отын скал, парсь, кунян, вал будэто.

Вахитов нимо кооперативлэн кивалтӥсез Нафик Хусаинов тыршемен, Лельвижын ӝыны ар куспын культурая юрт пуктӥзы. Солэн липет улаз интыяськемын библиотека но сельсовет. Сельсоветлэн йырыз — бигер воргорон Раис Хусаенов, со ик хозяйствоысь ужасьёсын кивалтэ.

Сельсоветын ужась Светлана Петрова гурт сярысь тазьы вера:

— Лельвиж гурт огназ кылдытэ сельской поселение. Гуртын 141 корка, улэ 558 адями. Берло аръёсы, путинской программа потэм бере, тросгес нылпи вордӥськиз. Азьло семьяын 2 нылпи гинэ ваё ке вал, табере 3 но, солэсь но трос нылпи вордо. Садике 22 нылпи ветлэ, школаын 53 адями дышетске. 102 мурт тырше колхозын, 60-лэсь тросэз ужаны палэнэ ветло. Вахит колхозэн огазеяськеммы бере калык уксё басьтыны кутскиз. Солэсь азьло куд-ог семьяос пызь басьтыны но ёрмо вал.

лельвиж

Сельсоветын ужасьёс С. Петрова но Р. Хусаенов.

Света апай будэтэ на: арлы быдэ пенсие кошке 1-2 адями, нош куатез-сизьымез 60-70 аресаз кулэ. Тани туэ 7 адями кулӥз, кылем арын — 9-эз. Озьы тӥни, гуртысь калык арлы быдэ кулэсме, 12 корка буш сылэ ини.

Гуртын одӥгез пересез — Иван Павлович Васильев, «Укмыстонлэн витетӥ пагжаяз (пагӟаяз) тубисько», — серектэ. Иван Павлович улытозяз троссэ адӟемын. Пичи дырыз колхоз кылдытон вакытэ учыраз. Со тодэ на, кызьы, Вӧсяськон лудысь бадӟым вашкала пужымъёсты кораса, колхоз амбар пуктӥзы, но со кема ӧз сылы — ӝуаз. Иван Павловичлэн егит дырыз Быдӟым ож вакытэ тупаз. Войнаысь бертыса, колхозын ужаз, парторг вал. «Вить пол тюрьмалэсь кыли», — шуэ. «Кызьы бќн?» — юасько. «Мон честный вал, ӧй алдаськылы». Иван Павлович улэ покчи нылыз дорын, Починкаын. Ӵем дыръя васькалля Выллапал ураме, мукетыз нылыз доры куное.

 Шумотлы быдэ литургия

Черкез ӝутӥз калык.

Черкез ӝутӥз калык.

Лулчеберетъя юрт вӧзын интыяськемын дун-чылкыт Вениаминлы сӥзем черк. Сое пуктон понна ар но ӝыны кулэ луиз. Мария Мефодиева, Лельвиж школаысь азьвыл дышетӥсь, тазьы вера черк ӝутэмзы сярысь:

— Пичи гинэ алтарь но колокольня ке но лэсьтом шуыса кутскимы. Потӥмы асьме гурт кузьда (кузя). Бускель крашин гуртъёсы, Балтась ёросысь Турьяла мынӥмы, Кукмор ёросысь одӥг удмурт гуртэз но ӧм кельтэ. Юрттӥз Кукморысь металлопосуда поттӥсь завод, Удмуртиысь Перевозное селоысь монастырь, Вятские Поляныысь кышномуртъёслэн монастырьзы, Вахитов нимо колхоз. Сисьмем липетэз воштӥмы, кылем арын июль толэзе колокольня пуктӥмы, туэ гырлыос вайимы. Гуртысь калык куремъя службаос нуыны ӧтимы Нырья черкысь отец Леонидэз. Со шумотлы (субботалы) быдэ литургиез ортчытыны лыктэ.

Тӥни озьы лельвижъёс огъя кужымен уксё шедьтӥзы но черк пуктӥзы.

Лельвиж гуртлэн берло вакытэ азинскемез но чеберскемез герӟаськемын бигер колхозэн огазеяськеменыз. Но со сяна, татын адӟиське удмурт калыклэн но туж тыршись, ужаны яратӥсь сямыз.

Лариса Дмитриева

Удмурт Дунне
By Удмурт Дунне Октябрь 12, 2016 13:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*