Ижын верасько инвестициос сярысь

Удмурт Дунне
By Удмурт Дунне Октябрь 17, 2016 12:38

Эшъяськон выж

Элькунамы таяз арняе ужаз «Бизнес-мост Удмуртии» ужрад. Шаерамы вуылӥзы Россилэн пӧртэм сэрегъёсысьтыз, озьы ик Китайысь, Бахрейнысь, Ливанысь, Швейцариысь, Саудовской Аравиысь, Белоруссиысь ужбергатӥсьёс но политикъёс. Соос пыриськизы 30 пала конференциосы, котрес ӝӧк сьӧрын кенешонъёсы, семинаръёсы, адӟытонъёсы.

nik_4032_karipov-foto-karipov-eh

Удмуртия но Китай кусыпъёссэс юнмато.

 Шаермылэн данъяськонэз

Форумез усьтон сӥё-дано ортчиз 11-тӥ октябре Эшъяськон юртын. Шаеренымы данъяськон мылкыд соку ик пыӵатӥз Удмуртилэн Тӧроез Александр Соловьев.

Ужрадэ пыриськисьёслы Тӧро вераз Удмуртиысь экономикаын, социальной удысын югдур сярысь. Шуиз: ужбергатӥсьёслы ужаны луонлыкъёс кылдытон ласянь элькунамы ӧжыт уг лэсьтӥськы. Россиысь улосъёс пӧлын Удмуртия талэсь азьло 43-тӥ интыын вал, туэ 29-тӥе ӝутскиз. Таӵе лыдпус потэ, ужбергатӥсьёс пӧлын юалляськонъёс ортчытыса. Соос уката ӟечен пусъё, лэсьтӥськонлы разрешение басьтыны, музъемез кадастровой учётэ пуктыны, выль юртъёсы тыл кыскыны ӝоггес луиз шуыса.

— Туэ 8 толэзь ӵоже, кылем арын та вакытэн ӵошатыса, инвестициос 5 процентлы тросгес кыскемын, Россиын та лыдпус 0,4 процент, — пусйиз А. Соловьев. — Малпаськом, инвестициос чот элькунамы ар ӵоже ог 85 миллиард манет пала кыскыны быгатом.

Улонэ пыӵатӥськись тужгес бадӟым проектъёс: Ижысь автозаводын «Лада Веста» автомобильёсты поттыны кутскон, «Калашников» концернэз выльдон, «Увадрев-Холдинг» огазеяськонэз паськытатон, Сарапулысь «Элеконд» огазеяськонын туала конденсаторъёс поттыны кутскон, Можга ёросысь курка сӥль будэтонъя «Аскор» огазеяськонлэсь ужзэ радъян но мукетъёсыз.

— Берло дыре власть но ужбергатӥсьёс дӥсьтыса басьтӥсько ни одӥг кыткетын ужан борды, — азинтӥз Удмуртилэн йырыз. — Ар кутсконын 62 проект пусъемын. Удмуртиын трос лэсьтыны луоно. Асьмелэн выль проектъёсты улонэ пыӵатыны интыос вань, вылӥ тодон-валанэн специалистъёс тырмыт. Соин ик элькунысьтымы предприятиослэн кивалтӥсьёссы медаз кышкалэ ас азязы эшшо  бадӟымесь ужпумъёс пуктыны.

Форумез усьтон дыръя возьматэмын Кам но Буй шуръёс вамен выж лэсьтонлы сӥзем чебер фильм. Выж — Удмуртилэн туннэ нуналлы эшшо одӥгез бадӟым данъяськонэз. Дуныз — 14 миллиард манет. Со пӧлысь ог 4 миллиардэз — Россилэн бюджетысьтыз, кылемез — Удмуртилэн но ужбергатӥсьёслэн. Лэсьтӥськон ужъёс 3 ар ӵоже кыстӥськизы. Выжлэн кузьдалаез 1 иськем пала луиз, ӝуждалаез — 27 метр. Та проектэз улонэ пыӵатон эшшо одӥг пол возьматӥз: одӥг кылысь кариськыса ужаны быгато нимаз ужбергатӥсьёс но, власть но. Мар со сётӥз? Выжлы луыса Москваысь Екатеринбургозь сюрес ог 350 иськемлы, Ижысь Уфаозь 150 иськемлы вакчигес луиз.

Форумез усьтонын озьы ик вераськизы Россилэн Президентэзлэн советникез Герман Клименко, Бахрейн королевстволэн Россиысь посолэз Ахмед Абдулрахман Аль-Саати, Санкт-Петербургысь промышленностья но инновациосъя комитетлэн кивалтӥсез Максим Мейксин, Китайысь «Гуантонг» корпорацилэн Россияя директорез Го Цин но мукетъёсыз. Веразы Удмуртилы синмаськемзэс, ӵош ужаны дась луэмзэс.

Китай но Бахрейн кизэс мычо

Быгыльскыны кутскизы форумлэн нырысетӥ емышъёсыз. Озьы Удмуртиысь Правительство, «Дом русско-китайской дружбы» фонд но Китайысь «Гуантонг» корпорация куспын ӵош ужан сярысь огкыл гожтэмын. Шаеренымы уртче ужан мылкыдзэ озьы ик вераз Бахрейн королевстволэн посолэз Ахмед Абдулрахман Аль-Саати.

Китайысь «Гуантонг» корпорацилэн огез кивалтӥсез Го Цин вераз: солэн предприятиез матысь 5 ар ӵоже Россиысь экономикае ог 20 миллиард манет поныны дась. Али со чакла, кинэн ужалоз. Нырысетӥ партнёръёсыз пӧлын луиз Екатеринбург. Отысь 10 гектар вылын пуктэмын луоз вуз каронъя калыккуспо биржа, чакламын технопаркъёс усьтыны. Го Цин эшъяськыны дась Удмуртиен но. Нош эшъяськон пӧрмиз ке, луозы ни ужъёс но.

«Дом русско-китайской дружбы» фондлэн кивалтӥсез Максим Спасский валэктӥз: Россиын но Китайын улӥсьёслэн улон, уж шоры учконъёссы пӧртэмесь. Бускель кунысь ужбергатӥсьёс туж чакласькисесь, соос нырысь эшъясько, югдурез валаны туртто, собере гинэ ӵошен ужаны ӧдъяло. Нош Россиысь ужбергатӥсьёс Китае мыно но соку ик ужъёс борды басьтӥськемзы потэ — азинлыкез уг луы.

Мар кароно? Кунгож-сьӧръёс малпаллям ни: Россия пыр лэзёно Китайысь туристъёслы нимысьтыз поездъёс. Соос странаенымы, татын улӥсьёсын матэгес тодматскыны, огъя проектъёс кылдытон сярысь кенешыны мед быгатозы. Озьы вуоно арын Удмуртия пыр но КНР-ысь 3 сюрс пала туристъёсты лэзьыны луоз, пе.

— Форум дыръя валам ни: Удмуртилэн азинскыны луонлыкъёсыз бадӟымесь, ужаны мылкыдыз вань, — шуизы Китайысь куноос.

Бахрейн королевство но Удмуртия уртче азинтыны быгатозы экономика, дышетон, тазалыкез утён, туризм, гурт хозяйство удысъёсты — та сярысь вераськон мынӥз кыкетӥ пумиськонын.

— Бахрейнысь инвестициосъя фонд Россиысь куд-ог улосъёсын пӧртэм удысъёсъя ужа ни, — вераз Ахмед Абдулрахман Аль-Саати. — Малпасько, Удмуртиен но пайдаё кусыпъёс тупатыны пӧрмытом.

Та сяна, посол Удмуртиысь вылӥ дышетскон заведениосы Бахрейнысь студентъёсты дышетскыны келян мылкыдзэ вераз.

Пумиськонъёслы йылпумъянъёс лэсьтыса, Удмуртилэн Тӧроез Александр Соловьев пусйиз: ог-огмы пумитэ нырысетӥ вамышъёс лэсьтэмын, ог-огмес валам, табере котькуд ужпумъя ужалозы элькунысьтымы министерствоос но ведомствоос.

 Удалтоз Сарапуллы!

Элькунысьтымы 3 городъёс — Вотка, Глазов но Сарапул — оско нимысьтыз азинскись территорилэсь статуссэ басьтыса Моногородъёсты азинтонъя фондысь юрттэт басьтонлы.

Туннэ та городъёс возисько 1-2 предприятиос чотын гинэ. Озьы Глазовез сюдэ-возе, шуыны луоз, Механикая Чепца завод, Воткаез — Вотка завод. Сарапулын улӥсьёс пӧлысь но данакез ужало обороналы вузъёс поттон бордын. Нош соослэн вуззы азьланьын кулэ ӧз луы ни ке? Тӥни малы та городъёс туж сюлмасько ӵуказе нуналзы понна. Нош нимысьтыз азинскись инты луизы ке, соослэн улон-вылонзы чутрак воштӥськыны быгатоз. Городазы вуозы инвесторъёс, отын пыӵатӥськозы выль проектъёс. Озьыен, кылдозы выль ужан интыос, воштӥськоз городлэн тусыз — йӧногес, чебергес луоз. Талы кошкись коньдон пӧлысь 95 процентэз лыктоз Моногородъёсты азинтонъя фондысь, 5 процентсэ гинэ шедьтоно луозы асьсэос муниципалитетъёс.

Котрес ӝӧк сьӧрын кенешон 2 час пала кыстӥськиз. 3 городысь ик кивалтӥсьёс тодматӥзы экономикаын, улон-вылонын югдуренызы. Экспертъёс соослы пӧртэм пумо ӵектонъёс сётӥзы. Нош йылпумъян лэсьтӥз Моногородъёсты азинтонъя фондлэн наблюдательной советэзлэн ёзчиез Ирина Макиева:

— Матысь дыре та статусэз басьтыны быгатоз Сарапул, нош Глазов но Вотка со сьӧры мед кыстӥськозы. Вань мылкыд карисьёслы огдыре юрттэт сётыны уг луы. Туннэ Россиын 318 моногородъёс, но матысь дыре соослэн лыдзы кулэсмыны быгатоз, валамон, ваньзылы юрттэт но уз луы.

сарапул

 

Сарапул городлэн йырыз Александр Ессен син азяз пуктэ ни, кыӵе луыны быгатоз купечъёслэн вашкала городзы, кӧня ке ар ортчыса. Кылдозы, пе, выль предприятиос: 3-яз-5-яз ке но ог 1 сюрс муртлы, ог 6-яз-7-аз ог 200-300 муртлы ужан интыос кылдозы.

— Малы меда кылдытонтэм сиён-юон, пулэсь вузъёс лэсьтон предприятиос, — шуиз со. — Но ужъёсты йылысеныз пумозяз радъяно. Кылсярысь, нюлэс коранэн выроно ке, солэсь вузъёс но асьмелы ик лэсьтоно. Сӥль поттӥськом ке, солэсь сиёнъёс но асьмелы ик дасяно. Город инвесторъёслы висъяны быгатэ музъем, юрттӥськоз отчы тыл, ву, шуныт кысконэн но.

Сарапуллы, пе, озьы ик туж кулэ спортъя комплексъёс, шутэтскон интыос. Моногородъёсъя фондысь юрттэт луиз ке, таиз но малпанзы, оло, быдэсмоз.

Форумын эскерем мукет ужпумъёс сярысь лыдӟыны быгатоды вуоно номерысьтымы.

Элина Кумачёва

Туспуктэмъёс: udmurt.ru но udmurt-forum.ru

 

Удмурт Дунне
By Удмурт Дунне Октябрь 17, 2016 12:38