Африканской чума вуиз Татарстанэ. Чер сюрес уг юа

Удмурт Дунне
By Удмурт Дунне Октябрь 27, 2016 15:50

Туж кышкыт висён — парсьёслэн африканской чумазы — вуэмын Татарстанэ. Таин сэрен Удмуртиысь Пудо эмъянъя валтӥсь управление куре зол чакласькыны. Чер асьме доры вуиз ке, ыштонъёс маке быдӟаесь луозы.

Татарстанысь Нурлат ёросысь африканской чума шедьтэмын 28-тӥ куарусёнэ. Вуэмын со татчы Чувашия яке Саратов палась. Чер кожем нимаз адямилэн гидаз. Со сяна, шедьтэмын чумаен черлам кырпарсь. Таиз тужгес кышкытэз: кырпарсьёс уго через вӧлмытыны юртто. Кытын кырпарсь но кытын пудо, шуоды. Ог-огзэс таосыд уг адӟыло ке но, висён гидэ сюре дӥсь, пыдкутчан пыр, сиёнэн, сюен, кыедэн, лемтэен валче. Соин ик Татарстанысь Сосновка но Селенгуши черкогуртъёс котырысь гуртъёсын карантин ялэмын, ог 400 йыр парсь быдтэмын. Чума дыръя пудо эмъясьёс уг чаклало: нимаз хозяйство возисьёслэн я фермеръёслэн со нурскетӥсьсы — кӧлтӥсь укол пукто но отӥяз нимысьтыз интыын суто. Через озьы гинэ быдтыны луэ уго. Висёнэн нюръяськонъя химия препаратъёс ӧвӧл. Кыедын со 5 толэзь ӵоже улэ. Нош кынтэм сӥльын но копчёной колбасаын — 4 толэзь. Парсез ӧд суты ке, чума туж ӝог вӧлмоз. Черлам парсез жаляны кулэ ӧвӧл — котькӧня йӧнатыны выр, кулоз. Африканской чумалэсь вакцина кылдытэмын ӧвӧл на, Россие та висён 2007-тӥ арын сюремын ни ке но.

Африканской чумаез вӧлмыто кырпарсьёс но.

Африканской чумаез вӧлмыто кырпарсьёс но.

Татарстанысь карантинэ пыртэм гуртъёслэсь асьмемыз висъя ог 100 иськем. Зэм, вискамы Кам шур бызе. Но кырпарсьёс вутӥ но уяны быгато. Африканской чума кузёяськыку, таосты ыбылыны косэмын.

Адямилы чума уг паласькы. Нош парсьёсты — пичизэ но, бадӟымзэ но — одӥгтэм погыртэ. Зэм, черланы кутскемзэ соку ик валаны уг луы — куд-ог дыръя чума 22 нуналозь мугоразы шыпыт пуке. Куд-ог дыръя 1-3 нунал куспын парсез вие. Кызьы тодмано через:

— парсьлэн мугорыз шӧдтэк шорысь 41-42 градусозь ӟырда;

— вылтырыз гордэктэ, интыен-интыен пеймыт-горд луэ, зӥбиськод ке, бервылыз уг тӧдьыекты;

— ӵем но шуген шока, тыосыз лябӟо;

— кӧто парсь пиоссэ куштэ;

— нырысьтыз вир вия;

— кӧтаз йӧтэ, кыедэз вирен суро;

— синъёсыз урӟекто;

— пыдъёссэ вырӟытъямез луытэк, погра.

Та тодметъёс пӧлысь огез-кыкез ке но адӟисько ке, соку ик вазиськоно пудо эмъясьлы! Меӵак телефон пыр герӟаськыны луэ Пудо эмъянъя валтӥсь управлениен но, номеръёсыз: 8 (3412) 949-917 яке 949-918. Татчы жингыртоно, кулэм кырпарсьёсты синйылтыку но. Нош пудо эмъясь вуытозь, парсез нимаз висъяно, гидысь поттатэк. Мукет пудо-животэз но тылобурдоез та вакытэ вандоно ӧвӧл.

Кышкыт югдурен валче али шаерысьтымы ярмаркаосын но базаръёсын алэмын парсьпиосын вуз карыны. Таин сэрен нурскетӥсьёслы дун усемын. Дунтэм бере, басьто ай, эн малпалэ. Кин тодэ, кытысь со живот вуттэмын. Оло, ӵапак Татарстанысь? Отысь ке ӧвӧл, оло, ӵапак сопалась турнам турынэн я отысь ваем комбикормен сюдэмын? Шаерамы чума шараяськиз ке, шедьтэм инты котырысь ог 20 иськемысь вань парсьёсты сутозы. Хозяйствоос понна та миллиард манетъёсын ыштонъёс ваёз. Чума шедьтэм интыез уго быдэсак сузяло, суто. Пудо сиён, кыед, пулэсь выж, арбериос — номыре уг кельто. Гид начар ке, быдэссэ суто. Сутыны луымтэзэ 2 метр мурдалае сюе сого. Гид пушез 3 пол кутскыса сузяло.

Чума шедьтэм интыын соку ик карантин яло. Сыӵе дыръя гуртъёсы мурт машинаез пырыны уг лэзё, татысьсэ — потыны. Погылян сьӧры уго чума аслыз мукет гуртэ сюрес шедьтыны быгатоз. Нош машинаын кыӵе ке пудо вань ке, сое виё. Озьы ик виыло калгись пуныосты. Чума шараям интыысен 100-150 иськемын парсьёсты уз быдтэ, но котькудзэ нимысьтыз чакласа возёзы. 30 нунал ортчыса гинэ, карантинэз куштозы. Но 6 толэзь ӵоже парсьёсын, сӥлен но пудо сиёнэн вуз карыны уз лэзе. Алэмез кылзымтэ муртэ кыл кутон улэ кыскозы.

Карантин ялылэм интыын чума выльысь потыны быгатоз, 1 ар ортчыса. Татарстанын али гуртоослы ӵекто парсь вордонлэсь воксё куштӥськыны, со интые мукет пудо-живот вордыны. Чумалэсь тазатэм гидъёсы 8-12 толэзь ортчем бере мукет пудо пыртыны лэземын.

Калык дась мед луоз югдурлы. Шаерысьтымы котькуд гурт поселениын валэктон уж нуыны косэмын. Висёнэз алон вылысь:

— парсьёсты гидысь эн потталэ;

— гидэз котьку чылкыт возе, кыедэз ӝикыт тыре;

— гидын нымы-кибыос лобало ке, арнялы быдэ дезинфекция ортчытэ, озьы ик нюръяське тэйёсын, комакъёсын но шыръёсын;

— одно ик пуктылэ вакцина классической чума но рожа висёнъёслэсь;

— гидэ пырон дӥсь но пыдкутчан нимаз возе.

Таза улон потэ котькудмы бордысь! Мынам парсе чылкыт, мон сое уг поттаськы, ачим азбарелэсь палэнэтӥ уг ветлӥськы шуыса, гань-гань кариськыны уг яра. Чума уг юа, кин доры кожоно. Вирусэз сюе но лякиське. Кин тодэ, кыӵе бервылэ тӥ лёгиськиды.

 

 

 

 

Удмурт Дунне
By Удмурт Дунне Октябрь 27, 2016 15:50