Выль ФАП-лэн тусыз ик йӧнатэ

Удмурт Дунне
By Удмурт Дунне Сентябрь 9, 2016 08:55
Ува ёросысь ува-тукляос шумпото бадӟым, югыт, эмъяськон арбериосын узыр ФАП-сылы.

Ува ёросысь ува-тукляос шумпото бадӟым, югыт, эмъяськон арбериосын узыр ФАП-сылы.

Выль фельдшер-акушер пунктъёс шаерамы берло дыре нуналлы быдэ сямен усьтӥсько. 7-тӥ куарусёнэ корка пырон каризы Ува ёросысь Ува-Тукля гуртын.

Вужез ФАП гуртын воксё ярантэм вал ни. Коръёсыз сисьмемын, липетэз лапкамын, укноосыз кырыжамын. Ву уг лыкты, уг кошкы. Нош макем кезьыт луэ толалтэ — кылиськемед но уз поты. Юрт 1967-тӥ арын пуктэмын уго. Эшшо ке гурт пумын. Нош Ува-Тукля нуналысь нуналэ паськыта, ӝоген воксё Ува дорозь вуоз ни. Али татын 1 сюрс 100 адями улэ. Со сяна, татысь ФАП борды эшшо 2 гурт юнматэмын.

Выль ФАП лэсьтыны кутскемзылы нырысь-валысь ӧм оске, шуо гуртоос. Соин но фельдшер-акушер пунктэз сӥё-дано усьтонэ егитэз но, мӧйыез но люкаськиз. Табере йӧнатӥськон сэрегзы гурт шорын ик. Котыраз ик школа но, сад но интыяськемын. Озьыен, нылпиослы но олокудкеме вамышъяно уз луы, ФАП-ын ужасьёслы но нылъёслэсь-пиослэсь тазалыксэс эскерыны капчигес луоз.

Юртъер вӧл-вӧл.  Вужез 51 квадрат метр быдӟа вал ке, таиз 90-лэсь ортчемын. ФАП-ез усьтонэ пыриськыкуз, Удмуртилэн Тӧроез Александр Соловьев тае пусйытэк  ӧз кельты.

— Таӵе бадӟым ФАП нырысьсэ усьтӥськомы, — шуиз Тӧро. — Матысь 2-3 ар ӵоже шаерамы 75 выль ФАП кылдоз. Соос шунытэсь но вӧл-вӧлэсь, туала оборудованиен луозы, озьы эмъянлэн ӟечлыкез будыны кулэ.

Сентябрь толэзе  шаерамы 25 ФАП усьтӥськоз. Ваньмыз сямен — гуртъёсын. Со сяна, туэ ар пумозь ӝог юрттэт сётонъя 100 машина басьтыны чакламын. Огез вуоз Ува-Тукляе но.

— Шумпотонмылэн пумыз ӧвӧл, — шуэ ФАП-ен кивалтӥсь Алевтина Барбакова. — Милям таӵе туала оборудованиез киямы ик кутылэммы ӧвӧл ук. Юромо дышетыны вуылӥзы. Табере вань электрокардиографмы, дефибриллятормы, тыосты шокатыны юрттӥсь аппаратмы, компьютеръёсмы. Секталаез мертанъя весъёсмы гинэ но вашкала даурысь вал. Куд-ог анай-атайёс шуылӥзы: пиналы секытгес кыске ни, тӥляд весъёсты пӧясько. Табере вес но электронной.

Ёрос йыр Владимир Головин верамъя, Ува-Тукляын вордӥськисьёс но тросгес, быдэс районын сярысь. Гуртоос ФАП-е висьыны кутскемзы бере гинэ медаз, азьлапал тазалыксэс эскерыны, визь-кенешлы мед ветлозы. Соку калык тазагес луоз.

Ува-тукляос туннэ мукетыз пумысен лулӟыло на: гуртазы клубзы ӝуамын, егитъёслы люкаськон инты ӧвӧл. Но кин тодэ, матысь дыре, оло, нош ик выль корка пырон карозы.

Елена Сараматова

Туспуктэм: udmurt.ru

Удмурт Дунне
By Удмурт Дунне Сентябрь 9, 2016 08:55