Кам шур гочатӥз чебереныз

Удмурт Дунне
By Удмурт Дунне Сентябрь 5, 2016 09:40

2007-тӥ арын гужем Камбаркаысь Шолья черкогуртын кино пуктӥзы.

Кам дурысь Шолья гуртын пуктэмын «Двенадцатое лето» чеберлыко фильм. Валтӥсь рольёсын - И. Пушкин, А. Келина.

Кам дурысь Шолья гуртын пуктэмын «Двенадцатое лето» чеберлыко фильм. Валтӥсь рольёсын — И. Пушкин, А. Келина.

Нылпи фильмлэн нимыз нырысь «Приключения Миши Каверзина» вал, нош потӥз со «Двенадцатое лето» нимын. Фильмез дасян бордын ужаз Екатеринбургысь «Снега» компания, пуктӥсь режиссёрез — Павел Фаттахутдинов, кыкетӥ режиссёрез — Андрей Титов.

Кино пуктон бордын ужасьёс кема утчаллям тупамон инты, вуылӥллям Челябинск, Пермь улосъёсы, Башкирие, шаерысьтымы Сарапул ёросэ. Но чебер инкуазен синмаськытэм Кам шур дуре интыяськем Шолья черкогурт — пужымъёс татын ульчаын ик будо. Киноез пуктӥзы Дачной ульчаысь 5 но 6 номеро коркаос котырын, татын, пе, уло Мишаен Катя — фильмысь валтӥсь геройёс. Рольёсты шудӥзы 11 аресъем Иван Пушкин но 10 аресъем Анна Келина. Анайёссы интыын асьсэлэн ик мумыоссы вал. Черкогуртысь калык но пыриськиз огъя сценаосы. Киноез пуктон понна арендае кутоно луизы вертолётэз, катерез, «Волевой» паромез, асфальт лэсьтон машинаез, лесовозэз.

Фильмлэн пуштросэз огшоры — возьматэмын пыдло интыяськем гуртлэн  улонэз, нылпиосты яратон, эшъяськон. Валтӥсь герой весь кытчы ке бызе: атайзэ автобазаысь пумитаны, эшъёсыныз шуре пыласькыны, кинлэсь ке вуэ выем чассэ утчаны, яратонэн пачылмись сюлэмзэ буйгатыны. Мышказ весь кылӥське анаезлэн ӧтемез: «Мишка!..» Нош Мишка дыртэ улонысьтыз 12-тӥ гужемзэ ортчытыны.

Бадӟым городысь гуртэ песянаез дорын шутэтскыны анаеныз ӵош вуэ Катя. Нылаш соку ик тодматске бускель пияшъёсын, пӧлазы — Мишка Каверзин но. Ӝоген со ваче пумит луэ  мукет пияшен (шудӥз Егор Каратаев). Но фильм пумын пиос матысь эшъёс луо.

Пиналъёс пыласько, шунды шорын пыжо, велосипедэн ворттыло. Катя соослы лушкемен ивортэ, бизнесмен атаез гуртсэс выльдыны малпа шуыса, татын, пе, «Лас-Вегас» луоз.

Фильм учкисьёс доры вуиз 2008-тӥ арын. Со аре ик басьтӥз пиналъёс но быдэ вуымтэос понна Москваын ортчем 25-тӥ калыккуспо фестивальлэсь «Золотой лебедь» гран-призэ. 2009-тӥ арын «Артекын» ортчем нылпи фильмъёсъя 17-тӥ калыккуспо фестивальын устоез луиз семьяен учкыны чаклам фильмъёс пӧлын.

Кино пуктӥсьёсын ӵош мон инты утчанэ пыриськи, артистъёсты пумитай но келяй, огъя сценаосы пыриськи. Адӟи берло кадръёс бордын ужамзэс: туспуктылӥсь луыса 2 нунал куспын 600 пала фотографиос лэсьтӥ.

Нош маин йылпумъяськиз фильм но Кам шурлэсь чеберзэ адӟон понна «Двенадцатое лето» киноез  Интернет пыр адӟыны быгатоды. 6+

Разиф Мирзаянов, Камбарка

Удмурт Дунне
By Удмурт Дунне Сентябрь 5, 2016 09:40