«Калашников» паймытъялоз на!

Удмурт Дунне
By Удмурт Дунне Сентябрь 21, 2016 12:29

«Калашников» паймытъялоз на!

Мукет сямен радъяськыны кулэ обороналы выль ож тӥрлык дасян но.

Кыӵе ужпумъёс пуктэмын Россиысь обороная предприятиос азе? Кызьы азинтӥськоз матысь аръёсы «Калашников» огазеяськон? Та ужпумъёс эскеремын Ижын Россиысь Военно-промышленной комиссилэн кенешоназ. Отчы пыриськиз Президент В. Путин.

20-тӥ сентябре нуназе бере 2 часын Ижысь аэропортэ пуксиз Россилэн Президентэзлэн самолётэз. Владимир Путин татысен дыртӥз «Калашников» концернэ. Пумиськиз отысь ужась коллективен, ортчиз выль цехъёстӥ, тодматскиз  производствоен. Пусйиз: завод берло дыре тодмантэм воштӥськемын — вылтусызъя со туала искусствоосъя музейлы кельше. Малпасько, вылтусызлы тупа пушкыз но.

Зэмзэ но, берло дыре «Калашников» концернын кутӥське туала куронъёслы тупась техника — талы 3 миллиард манет висъямын вал. 2017-тӥ арозь эшшо 10 миллиард манет чакламын. Заводысь конвейеръёс тэк уг сыло: Россиысь 95 процентэз пыӵал тӥрлык бичаське татын, кошке со 30 пала кунъёсы. Производство ялан выльдӥське. Кылсярысь, кемалась ӧвӧл малпазы ӵыжак-выль автомат. Секталаез 2 но ӝыны килограмм гинэ, быдэсак сямен лэсьтэмын туж юн пластиклэсь. Пыӵал али  келямын эскеронъёсы.

Зэм, 2014-тӥ арын концерн санкциос улэ шедиз. Соин ик татын троссэ выль сямен радъяно луиз — кунгож сьӧрысь воштос ёзъёс вуэмысь дугдӥзы угось. Но туннэ нуналлы ваньмыз пуксиз ас интыяз — ужан тӥрлыксы, станокъёс гинэ но Россиын поттэмын.

Владимир Путин ваньзэ тае туж умоен лыдъяз. Но алӥз: пыӵал тӥрлыкен ӵош поттыны кутсконо огшоры улонын кулэ луись вузъёс но.

— 21-тӥ — 22-тӥ дауръёс вискын оборона удыс тодмантэм воштӥськоз, соку тамында  ож тӥрлык кулэ уз луы ни, — шуиз Президент. — Но таин валче предприятиослэн цехъёссы медаз бушалэ, коллектив медаз пазьгиськы.

putin

Россиысь но Удмуртиысь кивалтӥсьёс тодматско «Калашников» концернлэн ужаменыз.

Кыӵе куронъёс пуктӥськозы Россиысь армилы, мар возьма оборона удысэз — та сярысь вераськон мынӥз Россиысь Военно-промышленной комиссилэн кенешоназ.

Ортчиз со «Калашников» концернын. Россилэн Президентэныз Владимир Путинэн ӵош отчы пыриськизы Россиысь Кышкытлыклэсь утиськонъя кенешлэн секретарез Н. Патрушев, обороная министр С. Шойгу, Россиысь Правительстволэн Тӧроезлэн воштӥсез Д. Рогозин но Россиысь мукет вылӥ кивалтӥсьёс.

Шуэмын: армиын матысь дыре бадӟымесь воштӥськонъёс луозы. Россиысь пыдлось гарнизонъёс гинэ но ог-огенызы герӟаськозы огъя ёзэ. Иворъёсъя но разведкая центр кылдытон борды кутскемын ни.

Мукет сямен радъяськыны кулэ обороналы выль ож тӥрлык  дасян но. Та дырозь Россиысь Наукаосъя академие пырись институтъёслы но армилы выль технологиосты дасянъя мукет институтъёслы уно коньдон висъяськылӥз. Но ӵемысь соос ас понназы, ог-огенызы кенешытэк, ужаллязы. Озьы но луылӥз: ӵектонъёс кылдо, нош улонэ соос пыӵаса уг вутто. Табере вань институтъёс огъя кыткетын ужано луозы.

Кенешонлы йылпумъянъёс лэсьтыса, журналистъёс азьын вераськиз Правительстволэн Тӧроезлэн воштӥсез, оборона понна кыл кутӥсь Дмитрий Рогозин. Шуиз:

— 2013-тӥ арын мон Россилэн Президентэзлы вазиськи «Ижмашез» но «Ижмехез» огазеяса «Калашников» концерн кылдытыны ӵектонэн. Сюризы кужмо инвесторъёс. Озьы 2 но  ӝыны ар куспын «Калашников» тодмантэм воштӥськиз. Татын ужасьёс дышизы ни: конвейеръёссы уг сыло, асьсэос уждунтэк уг пуко. Азьланьын но озьы ик мед луоз шуыса, али вераськонъёс нуиськом, пыӵал тӥрлык поттонэн ӵош татын эмъян но лэсьтӥськон удысъёслы тӥрлык дасянэз радъяно на шуыса. Россилэн Президентэз та малпанэз умоен лыдъя.

Россиысь Военно-промышленной комиссия туэ ноябрь-декабрь толэзе чакла бадӟым конференция ортчытыны. Отчы люкаськемъёслы возьматэмын луоз «Калашников» огазеяськонлэн ужаны быгатэмез, выльдӥськемез.

 

Сергей Захаров

Туспуктӥз А. Поздеев

Удмурт Дунне
By Удмурт Дунне Сентябрь 21, 2016 12:29