Гондырлы пумит Кион

Удмурт Дунне
By Удмурт Дунне Сентябрь 8, 2016 13:00

Удмуртие вуылӥзы Финляндиысь Тампере университетысь студентъёс. «Нюлэс школа» спектакльзэс адӟытӥзы «Шундыкар» лагерьын, Пичи Пурга ёросысь Брангуртын, Кечолын, Шаркан ёросысь Быгыын, Ижысь «Лифт» штабын.

нюлэс

Финляндиысь студентъёс поэмалэн автореныз Л. Черноваен ӵош.

Финъёс  — 12 задор мылкыдо егит артистъёс — али дышетско 3-тӥ курсын. Соосын ӵош вуизы режиссёрзы Паулина Хулкко, вераськыны дышетӥсьсы Тина Сыръя но удмурт кылэ берыктӥсь Симо Кантеле. Актёръёслэн дышетскон программаязы пыре мукет кылын спектакль шудон, озьы учыр тупаз удмурт постановка лэсьтыны. Удмуртъёсын ӟеч тодмо Симо дэмлаз Лидия Черновалэсь «Нюлэс школа» нылпи поэмазэ. Пуштросэз огшоры: нюлэскысь пӧйшуръёслэн школае ветлэмзы потэ, нош Кион но Балян йыртэманы дышемын, Гондыр дышетӥсьлэсь уг кылзӥсько.  Нылпи произведениез туала карон понна Паулина пыртӥз спектакле Алексей Арзамазовлэсь но Богдан Анфиногеновлэсь кылбур чуръёссэс. Лейтмотив луыса, лулэз бугыртӥзы веранъёссы: «Удмуртъёслэн ӧвӧл али дырзы…», «Мой народ не больше миллиона…» Спектакль пумын та чуръёс, рэп луыса, фин кылэ выжизы но возьматӥзы кадь, макем шара, макем эрико чузъяськыны быгатэ анай кылмы. Учке, удмурт кыл но, фин кыл кадь, азьланяз гудыръялоз ай!

Паулиналэн верамезъя, со ӵемысь кылбуръёсты бугоре бинялтэ но пьеса пӧрмытэ. Кызьы со быгатӥз нылпи произведение мур пуштрос, удмуртлыкез утён мылкыд пыртыны?

— Мон малпасько, та поэмаын вань ини конфликт, Гондырлэн но Кионлэн ваче пумит луэмзы, — вера Паулина. — Мон сое муромытыны тырши. Озьы пыризы «чудь вотяцкая» сярысь чуръёс. Учконо ке, таӵе югдур ӵем пумиське: кин ке кужыменыз мукетсэ зӥбыны турттэ. Удмуртъёс бере кылемзэс шӧдо. Стереотипъёсын шудонэз возьматэме потӥз.  Татын Кион аутсайдер луэ, нош алнаш дэремен Гондыр дышетӥсь сое ворме.

— Нош малы Гондырез нылкышно шудэ?

— Удмуртъёслэн, финъёслэн кадь ик, матриархат золгес. Мынам ӧз поты, Гондырез, властез возьматӥсь персонажез, воргорон мед шудоз шуыса. Ваньмыз шоры выль сямен учкыны кулэ. Мон Удмуртие кӧня ке пол вуылэмын ни, кылэме вань, егитъёслэн туала удмурт культураын улэмзы потэ. Инъетэз солэн вашкала, нош кызьы берыктод сое туалае, кызьы? Финъёс но та выллем малпасько: Европаын ми — пичи калык, ми но ляб луэммес шӧдӥськом. Студентъёсы нырысь кожазы, та огшоры нылпи спектакль. Нош мон соослы шуи: тӥ пиналъёс кадь луэ, туала кариське. Малпасько, соос удмурт учкись понна валамон потӥзы.

Финъёс текстъёсынызы оштолэзе тодматскизы, гужем куспын кылъёссэс дышетӥзы, нош гудырикошкон пумын Ижкарын репетициосын ваньзэ волятӥзы. Юха чырткем маде: «Ӟечбур, мон Сёрпи! Кыдёкысь лыктӥ, дыртӥ». Утыр телефонзэ уськытэ но англи кылэн суро вера: «Damn! Мон ӧвӧл easy!» («Шайтан! Мон капчи адями ӧвӧл!»).

Финъёслэн та ужзы удмурт учкись понна выль шӧмо, сюлэмез чепыльтӥсь пӧрмиз. Литератураез эскерись Лариса Дмитриева Интернетын мылкыдзэ шараяз: «Удмурт кылын мукет театр учки (наконец-то!). Фин артистъёс возьматӥзы спектакль, кыӵе ке но мукет, эрикогес но огшорыгес, но туж бадӟым, усьтӥськем дартэн. Мон понна, ворсаськем но чакласькись удмурт адями понна, со укыргес. Но та спектакль кылдытэмын, эсэпсэ валаса».

Дарали Лели

Туспуктэм: vk.com/shtab.lift

Удмурт Дунне
By Удмурт Дунне Сентябрь 8, 2016 13:00