Яр ёросысь Дусыгурт: Табере ульчаын мушъёслэн гинэ гужетэмзы кылӥське

Удмурт Дунне
By Удмурт Дунне Август 4, 2016 10:47

Куке татын но улон пӧзем

Яр ёросысь Дусыгурт Вортча муниципал кылдытэтэ пыре. Солэсь 7-8 иськеме интыяськемын. Нош райцентрозь 25 иськем пала луоз.

Палыз кулэм бере В. Сысоев огназ улэ.

Палыз кулэм бере В. Сысоев огназ улэ.

Виктор Сысоевъёс

— Со гуртъёс пала озьы гинэ мыныны но, пырыны но уд быгатэ, — пичи гуртъёсты гожтыны лыктэммы сярысь тодыса, вера Вортча муниципал кылдытэтлэн йырыз Зинира Вершинина. — Уката ик азьло нунал (валлян) куазь жаль-жаль зориз. Ма, азьло но отчы озьы гинэ пырыны ӧз луылы. Легковой машинаеныды токма эн ик ветлэ отӥ. Сюресъёсмы лекос уродэсь бере, милям администрациямы нимысьтыз со понна «Уазик» возё. Дусыгуртын 3 коркан 4 адями сяна улӥсез ик ӧвӧл ни. Гурт сярысь юалляськыны бен кинэ ке шедьтоды меда? Чисто коркаос пытсаськемын ни.

Зинира Мингараевналэсь куронзэ ёрос кивалтӥсьёс соку ик быдэстӥзы — кема ик дыр ӧз ортчы, ми доры «Уазикен» Михаил Попов вуиз. Дусыгуртэ зэмзэ ик сюрес вылымтэ. Отчы вуытозь, машина пушкын тэтчаса но зуркаса, вань лул-пуштӥрлыкмы  кыре-буре потӥське вал, шокан пытсаськиз. Телефон связь быриз. Машина ӧсэз усьтыны уг луы — маке быдӟаесь лузьёс бызгетыса ик бордэ лякисько.

Дусыгуртэ вуим но, Зинира Мингараевналэн верам кылъёсыз зэмазы. Ваньмыз сямен ик коркаос шол-шол бушесь сыло. Ульчаын кускозь ик турын будэ. Одӥгаз, кыказ ӟезьы азе вамыштӥсько, юнме — укноос кечат-вамат пуэн шуккылэмын. Ульчаын чал-чал. Кытчы меда, кудаз корка кожоно на шуыса паймыса сылонъям син азям шуак-дуак воргорон кылдӥз. Улэп адямиез адӟыса, мылкыды ик ӝутӥськиз. Воргорон ассэ Виктор Сысоев шуиз.  Бускель Йӧкачгуртысь соос татчы улыны выжиллям. Ай соку Дусыгурт бадӟым на вылэм. Школа но, клуб но, сельсовет но татын вылӥллям.

Корка љужда турын.

Корка љужда турын.

— Мар ужаськоды?

— Кыӵе милям, пӧй, татын уж луоз на? Колхоз кемалась быремын ни. Палы кулэмын. Огнам тани тазьы каллен улӥсько. Асьмелы асьмеос сяна кинлы ми татын кулэ на? Пичи дыръямы та гуртэ школае дышетскыны ветлӥськом вал, вочак ӵаӵӵаетӥ. Татын 8-тӥ классозь дышетскыса, 9-тӥе Вортчае мынылӥмы. Всё быдтӥзы. Нырысь ик вордскем гуртэ быриз, калыкез чисто кин кытчы улыны кошкиз. Валлё колхозмы «1 Май» шуыса нимаськылӥз, собере сое «Ворцинский» совхоз каризы. Сюресъёс ӧвӧл бере, татысь но калык кошкыны кутскиз. Газ но, ву но милям ӧвӧл ук. Пенсие потыны дырмы ӧз вуы на — уж быриз.

— Пенсия уд на басьтӥське. Мар   сиыса улӥськоды?

— Ма, каль гужем ук. Бакчае потӥськод но сугон сииськод. Ӝоген кубиста, картошка, гордкушман йыръяськозы. Табере пудо ум ни вордӥське. Пызь басьтӥськом но асьмеос нянь пыжиськом. Ӟепмы (кисымы) буш шуыса, улонлы ум ёрмиське.

Виктор Сысоевен вераськыса сылонъямы одӥгез ӟезьы азьын воргорон адӟиськиз.

— Кошкыса медаз вутты вал, ӧте ай сое дорамы, — сюлворисько тодмоме.

Дряхлов кузпалъёс пиналъёссы дћне кошкыны малпало.

Дряхлов кузпалъёс пиналъёссы дћне кошкыны малпало.

— Уз, уз кошкы. Со гурт пумын сылӥсь корка гинэ ветлоз. Отын улӥсез ӧвӧл ни, мушъёсты эскероз но берен тапала вуоз. Бускелелэн но мынам сямен ик Витя нимыз, фамилиез но Сысоев. Отчествоосмы гинэ пӧртэмесь. Витя но мон сямен ик огназ улэ.

Кема ик дыр ӧз ортчы, кыкетӥез Сысоев ачиз дорамы лыктӥз.

Ульчаын шыпыт, мушъёслэн гинэ гужетэмзы кылӥське.

— Семьятэм воргоронъёслы мӧзмыт уг поты-а таӵе пичи гуртын улыны?

— Милям чус татын, ӟеч. Нокин милемыз исась ӧвӧл. Укыл, малы милем со кышноос кулэ. Пичи гинэ курытсэ веръяд ке, куаретозы. Йыр висён со токма. Айда оген ик лучше шуыса, улӥськод ини.

Дряхловъёс

Ульчалэн мукет пумаз, воксё одӥгназ, чебер но йыг-йыг корка сылэ. Отын, пе,  Любовь но Геннадий Дряхлов кузпалъёс уло. Егит дырысенызы ини муш вордо. Азбаразы пыреме бере ик монэ мушъёс одолизы. Басьтэ йырысьтым, басьтэ,   киосыным шонаськыса, кесяськисько.

— Мога, мога (дугды ай, дугды), соос дортӥ ведь туж ӝог кошконо, — егит дырысеныз мушъёсын улэм воргорон лачмытак гинэ мон шоры вазиз. — Каль мон сое басьто.

Геннадий Николаевич та гуртын ик вордскем, нош кузпалызлэн Любовь Филипповналэн ныл йырыз Ижысь. Солэн айиз Сепыкысь вылэм. Нылкышно та гуртын воксё удмурт луэм. Дряхловъёс кыкназы ик, шутэтскыны потытозязы, колхозын тыршиллям. Любовь Филипповна кунян сюдэм, нош Геннадий Николаевич тракторист вылэм. Кузпалъёс 4 пинал вордӥллям. Сюрес ӧвӧлысь матысь дыре кузпалъёс Яр посёлоке выжыны дасясько, отчы, пе, пиналъёсмы доры матэ корка басьтӥмы ини.

Тополь калыклэсь мќзме.

Тополь калыклэсь мќзме.

— Бадӟымез Надя нылмы Ижын улэ, нылпи садын ужа, — семьяеныз тодматэ нылкышно. — Шоретӥез Валямы Ярысь шор ёзо школаын удмурт кыллы но литературалы дышетэ. Коля пимы но дышетӥсь, со Вортча школаын физкультуралы дышетэ. Рудик Глаз карын улэ. Маке газ котырын ужа.

— Гужемзэ улонмы допустимо, пиналъёс лыктыло, — кышноез борды итӥське Геннадий Николаевич. — Огез бертэ, эскерыса кошке, мукетыз вуэ. Мӧзмыса улыны дыр ӧвӧл. Вот пудо ум ни вордӥське. Кык ар талэсь азьло скал но, ыж но возимы на вал. Колхозысь зерно сётъяллязы. Ми сое асьмеос ик изылӥм, нянь пыжылӥм. Табере ульчаын но турын лачак ни, живот но уг ветлы ни. Соос турынэз лёгасалзы ке, милемлы коть ветлыны капчигес луысал, шуиськом. Валлё пудо сиёнлы но ёрмылӥмы, ваньзэ колхозлы дасяно луылӥз. Улонмы бен милям татын ӟеч, ядохимикъёс укыл (ӧвӧл), инты чебер. Но деревняез уг учко ук. Нокинлы со кулэ ӧвӧл ни. Колхозын ужасез бен ку дунъязы ини? Валлё котыр лудъёс гырисько ке вал, табере быдэсак ӵаӵӵа будэ. Ӧйтӧд, мар луоз ини азьпалан?

Любовь Тихонова

Удмурт Дунне
By Удмурт Дунне Август 4, 2016 10:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*