Шунды мумыосты вӧлозы Дэбесын

Удмурт Дунне
By Удмурт Дунне Август 2, 2016 11:13
дерево

Котьку сямен фестивале пыриськозы республикаысьтымы Ува, Алнаш, Пичи Пурга, Эгра но Яр ёросъёсысь пуэз вӧлӥсьёс.

1-тӥ-6-тӥ гудырикошконэ Дэбесын ортчоз пу скульптурая «Улон писпу» фестиваль.

Та ужрад кыкетӥ арзэ ини калыккуспо лыдъяське. Туэ сое доразы ортчытыны мылкыд кариз Дэбес ёрос. Удмуртиысь, Россиысь но кунгож сьӧрысь кибашлыос 5 нунал ӵоже Шунды мумылы, семьялы но нылпиослы, калык сям-йылолъёслы сӥзем скульптураос кылдытыны кулэ. Киужъёсъя элькун центрлэн кивалтӥсезлэн воштӥсез Алексей Кузнецов верамъя, туэ фестивале пыриськоз 36 усточи.

— Котьку сямен фестивале пыриськозы республикаысьтымы Ува, Алнаш, Пичи Пурга, Эгра но Яр ёросъёсысь пуэз вӧлӥсьёс. Озьы ик дорамы вуозы Мордовиысь, Белоруссиысь, Даниысь усточиос. Усто скульптура лэсьтонын вожвылъяськозы 20 аресысен 60 аресозь пиосмуртъёс. Вормисьёс пусъемын луозы пӧртэм номинациосъя, — шуэ Алексей Анатольевич.

Вань та скульптураос азьланяз шулдыртозы Дэбесысь паркез. Вормисьёс тодмо луозы 5-тӥ гудырикошконэ, соку ик сӥё-дано йылпумъяськоз таиз фестиваль.

Галина Семёнова

Туспуктэм:  minkultura.udmurt.ru

Удмурт Дунне
By Удмурт Дунне Август 2, 2016 11:13