Алнаш ёросысь Горд Намер: Кык коркан чай пӧзе

Удмурт Дунне
By Удмурт Дунне Август 11, 2016 08:07
DSCN0844

Татьяна Кондратьева котькуд нунал Кутыр ошмес дуре васька.

 Ошмес дуре сюрес уг быры

Алнаш ёросысь Горд Намер (Верхнее Кузебаево) пыре Кузёбай муниципал кылдытэтэ. Гурт кылдӥз 1929-тӥ арын, отын 3 урам вал,  ог 20 корка, бадӟымесь семьяос улӥзы. Но пичи гуртъёсты быдтон вакытэ татысь ульчаос но шыпытазы. Тодэме потӥз: кин туннэ улэ Намер гуртын?

 Табере кытчы?

Намере паськыт сюрес нуэ. Гуртэ пырон дорын ик, паллян палаз,  сылэ Кузёбайысь Юрий Никитинлэн бадӟым фермаез, турын возён лапасэз, пилорамаез. Отын скал кыске Кузёбайысь ик Ирина Антонова. Кышномурт  котькуд ӵукна вить часэ, великаз пуксьыса, татчы лыктэ. Сизьым час бере фермае Можгаысь молоковоз, пе, вуэ, отчыозь скалъёсты кыскыса вуттоно, нош толалтэзэ фермер И. Антоноваез машинаен нуэ-вае. Гуртэ пыронлэн бур палаз, кускозь турын пӧлын, мак сяська кадь сылэ горд таксофон. Телефон-автомат ужа, но со вылэ чиньы зӧкта тузон пуксемын, озьыен, татысен нокин уг жингыръя. Васьконо кариськи урам кузя, оло, кинэ ке пумитало. Но сюрес пилорама дорозь гинэ вылэм, отӥяз урам пумын кузёяське ӝужыт турын.

Йӧнгес коркаосын тунгон ошемын, вужъёсаз кенеръёс ӧвӧл ни, капкаос усьямын. Вашкала штораосын возъям укноос шоре мӧзмыт учко, соос уг валало, лэся, малы татын будэм нылпиос вордӥськем юртазы уг ни берто. Лабрес беризь улын  — колодча, жильы борды думем ведраез но интыяз ик. Жадем сюресчилы вӧзаз пуксьыса шутэтскыны ӵектэ кадь со. Куд-ог коркаослэн бервылъёссы но уг адско ни, садъёс гинэ сыло, яблок, вишня, ирга зын котыр вӧлске, гуртлэн нимыз ик ческыт ук. Кыӵе чебер но шыпыт татын. Луговой урам, озьы гожтэмын огез корка бордын,  борддор кадь пыкиське нюлэсэ. Табере кытчы?

3. Кондратьев кузпалъёс муш вордо, умортозы 50-лэсь трос, 100-лэсь ӧжыт, пе.

Кондратьев кузпалъёс муш вордо, умортозы 50-лэсь трос, 100-лэсь ӧжыт, пе.

Тазалык инкуазь бордын

Паймыса сылонъям бур палась писпуос сьӧрысь кылӥськиз пуны утэм куара, озьыен, отын эшшо одӥг урам. Писпуос пӧлтӥ но нюк вамен потыса, вуи гуртлэн мукет палаз. Син азям усьтӥськиз воксё мукет суред. Адӟиське: татын  улон пӧзе. Огез капка вӧлак пась, возь вылын турын ишко кечъёс, коткето курегъёс, садын гужето мушъёс. Капка азьын сыло кык трактор, кык машина но мукет техника. Гидкуазьысь чебер дӥсяськем кышномурт потӥз. 73 аресъем Татьяна Дмитриевна Кондратьева вылэм.

— Васяен Алнаше ветлом, шуисько вал, давлениез ӝутӥськиз, огшап лёгасько ай шуыса, ураме потӥз вал, — веранзэ мытэ нылкышно.

Татьяна Дмитриевна — Кузёбайысь. Картэз Намере улыны лыктэм 1998-тӥ арын, пенсие потэмез бере кышноез но татчы ик лыктэм.

— Гужем ужлэсь маза ӧвӧл, кытӥяз усьымон ик луоно.  Толалтэ бон мӧзмытгес. Но мон киужен вырисько, Вася гозы пунэ. Уж ке ӧз луы, висемдэ гинэ кылзӥськыса улод ук. Мон кык ар талэсь азьло пу пильылӥсько вал ай, зарядка шуыса, али уг ни, — шуэ Татьяна Дмитриевна.

Та чебер коркан нокин уг улы.

Та чебер коркан нокин уг улы.

— Мар куноез капка азьын возиськод? — муш бакчаысь дорамы вуиз юрт кузё, 74 аресъем Василий Кондратьевич. — Татьяна арня понна табань пыжиз, ойдо чечыен чай юом, — кунултыса ик корказ пыртӥз Васягай.

Ческыт чай юон сяменымы Васягай вераз улэм-вылэмзэс:

— Ми Татьянаен 50 арлэсь кема ӵош ини. Мон Венгриын служить карисько вал, сое кышно басьтӥ, отчы нуыны малпасько вал. Но Татьяна висьыны кутскиз. Бертӥ гуртэ. Голюшурмаын но Усоын школаын ужай,  собере Кузёбайын автобус нуллӥ. Тазалыке лябӟыны кутскем бере малпай, инкуазьлы матэ кариськоно, мушъёсын вераськоно. Соин ик Намере лыктӥмы. Туннэ нуналлы 50-лэсь трос, 100-лэсь ӧжыт умортомы. Капка азьысь турынэз но ӧй турна, мушъёс мӧль мед бичалозы шуыса. Туэ чечы трос, тани кунояськы.

— Чайды ческыт, — шуисько кузё кышнолы, — урамады колонкаос ӧвӧл, кытысь ву нуллӥськоды?

— Нюлэскысь, ошмес дурысь, ойдо васькалом, возьмато, — ӵектӥз Татьяна Дмитриевна.

 Музъемез уг аналто

Ми урам кузя нюлэс пала васькимы. Гурт пумысь капка азьын машина сылэ.

— Татын, Писэй Микышлэн коркаяз, 71 аресъем ӟуч кышно улэ. Челны палась вуэмын, нюлэс дорын улэмез потэ шуыса, Намере лыктэм. Гужемзэ нылпиосыз берто, но солэн капкаез  котьку ворсамын. Нош тани татын, писпуос пӧлын, намеръёс  Ю  вӧсьсэс ортчыто вылэм. Ми улыны лыктыку, пурты пуктылэм бервылзы вал ай. Вашкала сям медаз быры шуыса, туэ Петролэ ми но татын вӧсяськыса така вандӥм но ӝук пӧзьтӥм.

Тазьы вераськыса мынонъямы ӝыны иськем нюлэс пушкы пыримы, собере эшшо 15 тубатэтӥ (Васягай, кышноезлы тубаны-васьканы умой мед луоз шуыса, пагӟа лэсьтэм) уллань васькимы но вуимы куакъёс пӧлын жильыртӥсь ошмес дуре.

— Тае Кутыр ошмес шуо, Мадэй Трокай (Трофим Михайлов али Можгаын улэ) татчы дырды пуктэм, со дырысен ошмес, синзэ вошъятэк, бызе. Ву ке но кулэ ӧвӧл, котькуд нунал татчы ветлӥсько, сюрес медаз быры шуыса, — веранзэ азьланьтэ Татьяна Дмитриевна.

— Кутырын будӥз кадь ук «Виль синь» газетлэн редакторезлэн Константин Яковлевлэн Илля пиез.

— О-о, Илля дядяй ӵем ми доры куное вуылэ вал. Вералляз, Кутырын, пе, 5 корка, одӥг мунчо вал. Ойдо пуксьы машинае, ачим нулло Кутыр бервылэ, со вӧзамы ик, — «Нивазэ» заводьтыса, шуиз Васягай.

 Кузёбайысь фермер Ю. Никитин скалъёссэ Горд Намерын возе.

Кузёбайысь фермер Ю. Никитин скалъёссэ Горд Намерын возе.

Сыӵе экскурсия ӵек-тыкузы, кызьы соглаш уд луы. Ширтӥмы Намер сюрес кузя азьлань. Веттаськись бусыос шоры возьматыса, Васягай шуэ:

— Тани татчы ми 3 гектар чабей кизимы, соиз 2 гектар вылын — йыды, тӥни отын картошка. Азьло ми фермеръёс вал, табере — пенсионеръёс. Но музъемез уд аналты ук, каллен ужаськом. Туэ 40 рулон турын дасямы. Мон шумпотӥсько, нылпиослы юрттыны быгатӥсько шуыса.

Кутыр (Малое Кузебаево) Намер вӧзын ик вылэм. Солэн бервылыз уг ни адскы. Кин ке татчы пул гинэ шуккем, отын гожтэмын, та гурт 1935-тӥ арын бырем шуыса.

Горд Намерысь нуназе бере гинэ кошки. Доре бертон сямен малпай, тросгес мед луозы вылэм Кондратьев кузпалъёс кадь адямиос: музъемез яратӥсьёс, инкуазез гажасьёс но куспазы тупаса улӥсьёс, соку гуртъёс ӧй бырысалзы, дыр.

Галина Семёнова

Удмурт Дунне
By Удмурт Дунне Август 11, 2016 08:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*