Ӟуння Люба. «Сьӧлыктэм Анна» мадёс

Удмурт Дунне
By Удмурт Дунне Июль 6, 2016 17:00

Ӟуння Люба. «Сьӧлыктэм Анна» мадёс

Гажано лыдӟисе!

Та мадён — вашкала воршуд выжымылэн Анна вӧсез сярысь. Учыръёс но адями нимъёс, лыдпусъёс гожтэмын Кузон кар архивысь басьтэм ревизской сказкаосъя (перепись), вашкала пересьёслэн верамзыя но аслам малпанъёсыя.

Мон туж мудрон-визьмо адями ӧвӧл, дышетскеме но тырмыт ӧвӧл. Озьы ке но сюлэм шымырске, куке адӟиськод вашкала пересьёсмылэсь аналтэм, вунэтэм, жуг-жаген шобырскем вӧсяськон интыоссэс. Уть, Инмаре, уг косӥськы, уг куриськы чутрак кужмысь со вӧсьёсын вӧсяськыны. Котькинлэн аслаз Инмарез. Но вераме потэ, со интыослы тодмет пус пуктылоно вылэм. Будӥсь нылпиосмы мед тодозы, вашкалаос Куазь-Инмарлы оскыса, солэсь куронъёссэ чакласа, улӥллям шуыса. Медаз сантэмалэ-таркалэ сыӵе интыосты, санэ мед басьтозы. Оло, соку куд-огезлы пыӵалоз Инмарлы оскон мылкыд, азьтэм-бертэмез сабырлалоз, лек сямоез буйгалоз.

Кемалась вал со. Пельысь пеле, ымысь ыме вераса кельтэмын, кагазэ нимтулзы кылемын.

Кык ӟуч эшъёс, нимзы-тулзыя Михайло Петрович но Григорий Павлович Завольскийёс, гуртоосмылэн верамзыя, ми пала вуэмын Волга шур сьӧрысь. Тодӥсь ӧвӧл ни, отысь-а, татысь-а, кагазын но гожтэмын ӧвӧл, асьсэос тодо вал, дыр, кытысьсэс. Со бордын ужпум ӧвӧл. Мар тужгес тунсыкоез? Та пиослэн 1834-тӥ арын лэсьтэм перепись кагазын фамилизы вань. Куд-ог удмуртъёслэн (вотякъёслэн) со вакытэ фамилия сярысь кылэмзы но, оло, ӧй вал. 17-тӥ-19-тӥ дауръёсы гурт калык ревизской сказкаосы (лыдъян-чотан) пыртамын ас но атай нимзыя гинэ. Вотякъёслы фамилия сётказы 1905-тӥ-1915-тӥ аръёсы. Гуртэн-гуртэн — воксё ке революция бере гинэ.

Фамилия сярысь ке верано, ӟарлы*, куанер вотякъёслы фамилия сётказы, пересь песятай выжыысьтызы языческой нимъёссэс но православной нимъёсты чакласа. Байёс но ӟечгес улӥсьёс асьсэлы дунэн фамилия октӥзы. Малы ке но гуртамы, ужан ӧнерзэс чакласа, фамилия сёткамын ӧвӧл. Трос уморто муш возисьёс гинэ Пчеловодов фамилиез нулло. Соос чиновникъёслы чечыен кузьмаськизы, малпасько.

Гуртмы ӟучен-бигерен (башкыртэн), ар калыкен суро-пожо вал. Шаплы визьмоосыз ньыль кылын эркын вераськизы: угось поръёс но вӧзамы улӥзы. Вал, дыр, вашкала выжыосмылэн пӧртэм дыръёссы, тэрыса-тэрытэк улон вакытъёссы. Пересьёслэсь тодэ ваёнъёссэс али ке но йырам возисько. Соиз ини мукет ужпум, музон история.

Али вераме потэ та кык ӟуч пиос сярысь, кудъёсыз улыны кылиллям милям гуртамы. Бератаз асьсэды воксё «вотяк» шуиллям, кагазын озьы гожтэмын. Ми пала таос вуиллям выт бичанъязы. Вашкала кылын — «мытари».

Гуртысь вашкала воршуд выжыез утись пурысьтам пересьёс лыктэм ӟучъёсыз огшоры гинэ, эскерытэк пӧлазы ӧз пыртэлэ, луоз. Со вакытэ воршуд выжыез туж чаклазы, мурт адямиез, кураськисез гуртэ кӧлыны но кельтэмзы уг поты вылэм. Гуртамы улыны мылкыд карись муртэ, ӟин* люкаса, кенешо вылэм: пыртоно-а, ӧвӧл-а тодмотэм адямиез ас воршудазы. Куриськись мурт мар ке но быгатэмзэ возьматыны, пе, кулэ вал.

Огезлы «пришлой» пилы гуртоосмы синмаськизы, луоз. Пӧлазы пыртэм сяна, солы удмурт ним сётӥллям — Ӟандыгар. Нимызлэн «Ӟ» букваез возьматэм воршуд нимлэсь кутсконзэ. Эшез воршудэ пыртэмын ӧвӧл. Ӟуч нимыз Григорий вылэм ке, гуртоосмы ас сяменызы Горей шуиллям. Малы осконзы ӧжыт вылэм Григорийлы, уг тодӥськы. Пересьёслэн адями лул-сямез шӧдон-валанзы мур вал, дыр. Ӟуч пиослэн гуртэ выжы лэзёнзылэн мугез таӵе вылэм: коркась корка пыраса, тыриськон тэргаса-кураса ветлонъязы Михайло Петрович Галан Митрейлэн ошмес дурысьтыз вераны луонтэм чебер нылэз пумитам. Со удмуртомем ӟуч Леприньлэн (Ефрем) но Базака гуртысь бигер ныллэн Мадэйлэн Ӟаннэй нылзы вал.

Мадэен Леприньлэн дас кык кузя улэп нылпиоссы, кулэмъёсыз но вань. Сомында нылпи пӧлын пӧртэмез вал, дыр: шаплы-чырткемез, визьмоез-востэмез, тӧдьы но сьӧд йыроосыз. Тусбуйын нош ваньзы чылкытэсь. Уката ик чебереныз висъяськиз Ӟаннэй. Солэн чиль-чиль сьӧд суй зӧкта йырси пунэтъёсыз пыдкупыриёзяз вуылӥзы. Йырси пунэт йылъёссэ, уко* туген думылыса, нуллӥз. Шуген улэменызы, Лепринь кыкто пиоссэ, Устинзэ но Леонтейзэ, гуртысьтызы ик Галан Митреен Огапъялы вордосэ сётӥз. Таосызлэн нылпизы ӧй вал.

Леприньлэн кыкетӥ нылыз Тутай (Татьяна) мертчан кадь ӵуж йырсиё, лыз синмо. Но Тутай пичи дыръяз пал син кылиз. Чырткем вынъёсыз ӟольгыриосты пукыӵен ыбылыку, ньӧл, палэнэ пезьдыса, апайзылэн синмаз мертчиськем. Эмъясь ӧйлась. Пелляськисьлы возьматъязы но, уг быгатӥськы, шуиз.

Лепринь, ёрмыса улэменыз, тыриськонзэ но тырыны ӧз быгатылы. Выт бичасьёс Лепринь доры ӵемгес пыраны кутскизы. Михайло Петрович Леприньлэн юртысьтыз ошмес дурысь адӟем нылэз нош ик пумитаз. Синзэ вошъятэк, учкиз ныл шоры, синмаськиз. Ӟакты Насьтык, Леприньлэн анаез, нуноксэ мурт адямиос азьысь замангес пегӟыны косӥз. Улонэз улэм пересь чаляк валатскиз: ӟуч мытарь нылзы шоры сиись-ӝуась синмын учке. Ӟакты кышнолэн тодэмез вань, шуэ вал гурт калык. Кылыныз каргаз ке, каргушез* одно усёз. Вож нуны шоры учкиз ке, син уськытоз. Ачиз ик пельтылоз но вылэм.

Михайло Петрович Завольский сокем урод сямо адями ӧй вал, дыр. Воршуд утись пересьёс но сое валазы, луоз. Со угось быдэсъяз ӟуч государь-императорлэсь куронзэ. Вераны кулэ, калык выт бичасьёсты вашкала дыръёсы но, али но уг яраты. Уката ик кипырмес вал Горей. Калык солы юнме ушкуйчи* ним ӧз сёты, луоз. Михайлолы Леприньлэн семьяез жаль потӥз. Тыриськонзэс капчиятон понна, пӧртэм амал утчаз, Кузонысь выт бичанъя конторае куриськонъёс гожъяз. Нош Горей адямиез зӥбиз, «сюлзэ кыскиз», каторгаен, ссылкаен кышкатъяз. Лепринь шузимем куеныз чылкак ӟудэм бераз малпаськытэк куалькак ымзэ усьтӥз: «Коть нылъёсыным шат пунэмме тыром?»

Ӟуч пиослы, оло, со ик кулэ вал? Лепринь шӧдытэк кылиз, кык нылъёссэ шуак-дуак тыриськонъяз вузаз. Ярам, шуод ини, Тутайлэн бызён вакытэз ортчемын вал, но пиосын костаськемез ӧй вал. Нош Ӟаннэй — Ӟакты Насьтыклэн яратон нунокез — ӝужаса ӧзгес вуы вал на. Кӧня каргаз ас пизэ, Лепринез, Насьтык! Лепринь сётэм кылзэ быдэстӥз. Каргаськыны но уг яра вал, дыр, нылъёслы одӥг пол бызёно ук! Нош каргуш яратон мурт вылэ усе, шуо.

Горей малпаз: Тутаен толэзь мында шудоз-погылляськоз но, акыльтӥз ке, куштоз. Михайло зуркатӥз: «Мон улэп дыръя Тутаез уд кушты, кышно луоз со тыныд, Инмар азьын кылдэ сётод». Горей пумитъяськыны ӧз дӥсьты. Кыӵе ке но валантэм кужым герӟаз та сямзыя пӧртэм пиосты. Азьвыл кусыпсы но ӵыжы-выжыоссы сярысь нокинлы ӧз поттылэ.

Тутай но бызён инты шедьтэмезлы шумпотӥз вал. Лепринез но валаны кулэ: сизьым кузя нылъёстэ ваньзэс ас бурд улад возёд шат? Ӟаннэй сярысь ке верано, Ӟандыгар (Михайло) Ӟаннэез эриктэм ӧз кары. Со ас сяменыз мусозэ вакчияк Анна шуиз. Валаз со, яратонэз кужмын но, тыриськонэн но уд басьты. Анналэн абиезлы, Насьтыклы, туго горд-курень шаль кышет кузьмаз. Анаезлы — Мадэйлы — ӟарт-лыз чеспыриё* пель угы. Анназэ утиз гуль сяськаез кадь. Усьтӥськемзэ возьмаз, бордаз дышемзэ, яратонлэсь кенжемзэ, ӧз дыртыты. Нырысь ик тупал ураме корка басьтӥз. Кузёез, Яндыгар Эштэрек, корказэ пришлойлы куинь но ӝыны мыскалэн* вузаз, ачиз музон пала ӟеч улон инты утчаны кошкиз.

Дыр вуиз, сяська усьтӥськиз, емыш кисьмаз. Ӟандыгар кышнозэ ас юртаз вайиз. Кызьы бен егит дыр яратытэк улоз? Собере, Ӟандыгар визьмо, мугорын ӝужыт, тусбуен чылкыт, ужлы кибашлы воргорон вылэм. Гуртысь пересьёс сое кадырлазы. Кема ик дыр ӧз ортчы, Ӟандыгарез гурт тӧрое пуктӥзы, толмачын* ветлӥз. Ӟаннэйлэн абиез но Ӟандыгарез яратӥз. Ӟакты кышно Насьтык Инмарлы осконзэ, пелляськонзэ ноку ӧз кушты. Дэрем сӧзулаз будэтэм яратон нунокезлы но пичи дырысеныз оскон пычатӥз. Табере тани Ӟандыгар понна но вӧсяське ни. Ӟечлы пумит луод шат? Ӟандыгарлэн сотэк но мылкыдаз Инмар улӥз. Инмарез буре вайытэк, ымтыр няньзэ но ӧз куртчылы. Ӟакты кышно Насьтык шуэ: «Карттэ, Ӟаннӥе, Инмарез кадь яраты, со но мед яратоз. Кабан вӧзады кабан мед тутоз*, дас кыклэсь ӧжыт медаз луы. Кузъям-палъям нылпиосмы ванен-бурен, куспазы татулыкен*, ӟеч муртъёсын сиыса-юыса, шудо, визьмо, тазалыко нылпи вордыса, вордэм нылпизылэсь кадырзэ адӟыса, кузь гумырозязы мед улозы. Югыт Инмаре-куазе лек гудырилэсь, кыллэсь-дэйлэсь, тыллэсь-пулэсь, каслэсь-леклэсь, сьӧд черлэсь, нужналэсь* уть! Воршуд мумымы, вашкала выжыослэн лулзы! Будӥсь нылпиосмылы дэлет-берекет сёт!»

Ӟакты кышнолэсь «осто» шуон, вӧсяськон кылъёссэ дышыса, Инмарез буре вайытэк, уж борды ӧз кутскылэ но ӝӧк сьӧры ӧз пуксьылэ Ӟандыгарен Анна. Туж ке куриськод, Инмар кылэ, шуо. Улыса-вылыса Анна картсэ сокем яратӥз, оло, Инмарез но куддыр вунэтъяз.

Синмаськымтэ но вожъяськымтэ мурт ӧй вал та кузпалъёслы. Удмурт калык пӧлысь шер адӟылод таӵе шудоосты. Тупаса улӥсь семьяе шудбур но дурыныз пыре, шуо. Со сяна, Ӟандыгар куаӵак ӟеч музъем басьтыны быгатӥз.

Палда* кузя кыстӥськись возьёс но сайкем му, кызь десятинэз но куамын сажемез, со вылын вал. Муш вордоно кадь, яплак* чебер сяськаё, чылкыт ошмесо инты. Ӟандыгар возь нимаськиз. Ул но ул, нылпи ворды вылэм. Озьы гинэ уг луы уго. Инмар мар ке но адӟон сётэ. Огнад йырад ке кайгу уг лыкты, калыкен ӵош куректон лыктэ. 1812-тӥ арын Наполеон Россия вылэ война ӝутӥз. Ӟандыгар ратник луиз. Эшсэ Гореез жугиськонэ ӧз басьтэ. Кышноез пал син шуизы, со сяна, со вие соослэн кыкто нылпиоссы вал ни. Ма, Горей ачиз но аналтӥськыны амал шедьтӥз. Со вакыт угось со, Ӟандыгарлэн музъем вылысьтыз кызъёсты кораса, аслыз корка бугро ӵупиз. Гогыез вырӟиз ке шат, оло? Рекрутъёсты ӧтчан вакытэ купыртћськыса ветлэмъяськиз. Воргоронъёс ожмаськизы, со корка жутӥз.

— Мон берто, одно берто, — оскытӥз Ӟандыгар егит кышнозэ. — Возьма, Анна, вӧсяськы.

Гуртысь трос воргоронъёсын ӵош Ӟандыгар но войнае кошкиз. Егит кышноезлы Ӟандыгар трос гинэ индылонъёс-кенешъёс сётӥз:

— Тӧри ужпиез сюдыны ӧд ке быгаты, вузам дундэ зарниен гинэ басьты, со асьмелэн ӟеч выжы. Туж секыт ке луиз, гырыны-кизьыны Горей юрттӥськоз. Ӝынызэ музъемез арендае солы сёт. Шори вылэ ужалэ. Туж но туж мынэсьтым ке мӧзмид, нуллэм йырулэт пон, соку монэ вӧтаса адӟод. Палдаысь котресамы мын но уӵы чирдэмез кылзы, мӧзмонэд буйгалоз, мынэсьтым куараме кылод. Мон яратӥсько тонэ, Аннушка. Соин ик эшшо огпол верасько: мон берто, уг кулы, уть, мар вань.

Анна но оскиз: берытскоз солэн картэз. Уз люкы Инмар яратӥсь сюлэмъёсты. Веть улыса но ӧз вуэ на. Нылпизы но ӧвӧл. Апаез — Тутай — нош ик кӧто ни.

— Вань улытозям возьмало, яратӥсько тонэ, Ӟанды! Мон кужмо, мон чидало, оскы, Ӟанды, берытскы, — шыпыртӥз Анна, бусы капка сьӧрын келяськыкуз.

Ӧз тоды соку Анна секыто кылемзэ. Егит кышнолэн мӧзмонэз буш корка пырем бераз ик пӧсьтӥз ке но… Анна чидаз, возьмаз, Инвожомумы, Инкуазь инмар солы оскон, кужым сётӥз.

Дыр ортчиз. Мӧзмыку одӥг нуналэз ортчытон кема потэ, нош Анна ассэ ужлы сётӥз. Войнае кошкемъёс пӧлысь гуртэ сӧсырмем отставной ратникъёс вуылыны кутскизы. Куд-огез ивортэк чиптэм-чаптэм ышизы-быризы. Анна валзэ ӧз вуза, кызьы валтэк гурт уж куспын? Сьӧд тӧри валзы, нимызъя Тӧри ик, чигын* сямо вал, малы ке Ӟандыгарлы укша, потылӥз Анналы. Визьмо, сэзь но сак, провор Тӧри Анналы матысь эш луиз. Егит нылкышно оген йыраз но ужлэсь ӧз курда. Картэныз кутскем ужзэс азьланьтӥз. Ачиз ик буш вал вылын ворттылыны дышиз. Уката ик секыт вал гужем. Музъемзы сяна, соослэн ӝужыт кызъёсын котыртэм котрес возязы сюйкорказы* вал. Со сайкосын ик кыз вайёсы ошылэм пуппы гыркъёсы мушъёс чечы бичазы. Мушмумыос котырын берганы яратылӥз Анна. Соосын со пичи нуныосын кадь вераськиз. Огпол но лексемзы ӧвӧл.

Одӥг пол мушъёсты чакланы лыктӥз но паймымон суредэз адӟиз. Таӵеез ӧй вал на: кенер тэчет но тӥямын ӧвӧл, сюйкорказы но изъянтэмын ӧвӧл (со ноку ӧз тунгонаськылы), нош бадӟым кыз улын сюсь карасъёс* лошъясько, мушъёс алекмыса эли-кеби лобало. Лёгам пытьыосъя Анна валаз: гондыр ӧвӧл, кык пыдо лушкаськись чечы гыркъёсыз тазатэм. Ярам ини шол, одӥг пол гинэ ке луысал. Кыкетӥ радаз воксё гыркъёс кыз вайёсысь куямын вал. Анна лушкаськисез чаклано-кутоно кариськиз. Тӧризэ корткечере* кыткиз но завод базаре мынэм амал дорысьтыз ог кык уйлы сюйкоркаязы улыны выжиз. Уробозэ но валзэ ӵем ӵашшае ватӥз. Кема ик возьмано ӧз луы: ӝомал усем бере ушкуйчи вуиз. Писэй кадь ӝабыръяськыса, одӥгаз ӝужыт кызэ тубиз. Анна ӧз чида, кияз лобыт* кутыса, ватскемысь потӥз.

— Сюрид, кутӥ мон тонэ! — кеськиз Анна, чус уез сайкатыса. Лушкачи лоп! Анналэн азяз тэтчиз. Огшаплы синъёссы ваче вуизы. Анна куаляк луиз. Синъёсызлы ќз оскы, паймыса юаз:

— Кырси, то-о-он?!

Чыртыяз чечы дузэн* Ӟандыгарлэн эшез Горей сылэ. Анна нырысь паймиз вал, собере вожпотонэз пӧсьтӥз:

— Кызьы озьы тон, кырси, кызьы киыд пыре ас иськавыныдлэсь лушканы? Ӟандыгар войнаын, нош тон… Юрттэм интые, монэ таркаськод?!

Горейлэн синъёсыз уй пеймытын балянлэн кадь ӝуалскизы.

— Нош мар тыныд, Ӟаннэй? Кылемез уг тырмы шат? Тӥляд сотэк но ваньмыз пальккаське, музъемды бусьтыр, юды нап, пудоды удалтэ, картэд яратэ.

— Инмарлэсь вожзэ эн потты, кырси! Мон тӥледлы дурыныз кисьтӥсько. Тӥ сяна, мынам сузэр-вынъёсы вань на, соослы юрттӥськоно. Тынад маин кӧтыд уг тыры? Тон астэ гинэ яратӥсь адями. Апае но тон возын куасьме ини. Ӟаукал*, какал* адями тон, шундылэсь ӝужамзэ уд адӟиськы, куреген ӵош изьыны выдӥськод, кышноед гинэ вӧзад мед луоз. Тодӥсько, кылӥсько кышноосын калгемдэ.

Та кылъёс бере Горей пурӟиз.

— Сялай мон тынад сукыр апаед вылэ. Чоньдыны уг вормы, сомында тышкаса. Одӥгзэ умой тодэ — нылпи культыръя.

— Бен со тынад нылпиосыд ук, жаль уг пото шат, анайтэк ке кылизы?

— Писэй сӥтянысь писэй бырымтэ. Кышно сюроз.

— Собере тон ачид кышнояськид ук!

— Ачи-им?! Тынад Ӟандыгаред монэ кышнояз… Мынам солы йыркуре кемаласен тани татын возиське, — гадь бордаз мыжгаз Горей.

— Я, кырси, чалмытскы, эсьма, тон Напаллёнэн уд ожмаськиськы. Небыт миндэр вылын кышноед вӧзын кӧласькод. Ӟандыгарен азьло луэм учыр-кусыпты сярысь мынам тодэме уг поты. Огзэ тодӥсько: тон Ӟандыгарлэн музъем вылаз нылпидэ сюдӥськод, корка но отысь коръёсын пуктӥд! — ӧз сётскы Анна.

— Вот тон кызьы кутскид! Монэ пыкылӥськод? Ымдурысьтыд анай йӧлыд куасьмемын ӧвӧл на. А мынам тонэ утчам потэ, апаед кадь ик-а, эшшо пӧсьгес-а? Ӟандыгар кыдёкын, уз тоды, уз кылы. Тодытэмед ке потэ, мон ачим верало, бертӥз ке ай…

— Кош дорысьтым, ӝуштэ кисьто! — лобытсэ урдӥз Анна.

— А-а, тон озьы, кырсиед шоры лобытэн! Мон тӥляд музъем вылады ужасько, нюлам ву кисьтӥсько…

— Сотэк-а! Трос ужад ини тон, пӧсям вуэд потымон, ужаськод ӟимыр-кусӥнь* аслэсьтыд кӧттэ тырон понна гинэ. Кикур быдӟа музъемед ӧвӧл, сайкыны мылыд уг поты, кускыд тӥяськоз! Музъемлы тыриськон ми вылэ лыктэ, ми сое тыриськомы.

— Ох, кылыд, Анна! Мон веть али тынэсьтыд уг курдаськы, асьмемыз нокин уг адњы, уг кылы. Сюпсисько тӥледыз, валасько. Малызэ — Ӟандыгарлэсь юа.

Горей Анна киысь лобытэз чальтчытӥз но дораз матэктӥз.

— Вай, Ӟаннэй, мон тынад Ӟандыгаредлы кузьым лэсьто, бертыкуз уа-уа! мед кароз

— Кош азьысьтым, ӟуляр*, ушкуйчи, кышно ӝуш! Кышноед уг тырмы шат?

— Весь кеньырен сурам шыд сием уг поты, Ӟаннэй, сӥльын, зумытсэ но веръям потэ.

— Тон мар, кырси, сазьтӥськы, урмид шат, ас выжыдэ… — сюлвориз Анна.

— Кыӵе выжые тон мынам? Мынам выжые сизьым шур йылын. Мон тӥ понна «пришлый, ушкуйчи». Ӟечкын выд яке кужымен басьто, астэ вӧсь карыны эн сёты. Пумитъясько ке, мон уката вожомисько.

— Уг! Мон Ӟандыгарлы верало, со бертоз.

— Мон ачим верало, — серектӥз Горей.

— Мон секыто, кырси, эн йӧтылы, — тэльмыриз Анна.

— Ма, соку эшшо умой.

Аннаез, лӧбак ӝутыса, кыз улэ погыртӥз.

— Юрттэ-э-э-э, виё! — кинлы кесяськемзэ ӧз вала Анна. Куараез палда возь йылъёстӥ кыдёке шуккиськиз. Анналэн валэз, кузёезлэсь куаразэ кылыса, тодмаса гырдалтӥз, нырпыртӥз соргетӥз.

— Тӧри, Тӧри! — ӧтиз Анна валзэ.

Со куспын Аннаез зӥбыны могтӥськись Горей жоб куараен черетскиз но кыз выжые палдӥз. Анна ӝогак музъем вылысь султӥз, валлэн изнэсаз ӝабырскыса, тыбыр вылаз пуксиз. Кыз улын, гольык берзэ маялляса, Горей ӝуштэ. Тӧри солэсь берпалзэ куаӵак куртчем но, ассэ, кучапиез музэн, бер пыдыныз ӵыжыса, кыз борды шуккем.

— Ну, Ӟаннэй, тодад ваёд та учырез. Берыкто пунэмзэ, тодыса ул! Пукты монэ вал вылад, бертэме уз луы, валэд укыргес вӧсь кариз, лыозь куртчыны шедьтӥз кадь.

— Мон тонэ татчы ӧй ӧтьы, кызьы лыктӥд, озьы ик берты. Чечыесь ымдурдэ нюл. — Анна валзэ корткечер уробояз кыткиз но гуртаз бертӥз. Одӥгзэ гинэ жаляз: вордӥськоно нуныез сярысь юнме гинэ вераз. Веть турттэ вал шумпотэмзэ абиезлы вераны, дыр ӧз шедьты.

Кема погылляськиз валес вылын Горей, вал куртчем яразэ бурмытыса. Кышнозэ алданы муг шедьтӥз. Ма, Тутай шораз вазьылыны ик ӧз дӥсьты. Ӟегзы му вылаз кисьтӥськыны кутскиз, Тутай пичи нуныеныз ӧз ваньмы, сямыз но дыггес луиз, угось Горей йыраз мыжгаз. Анна ужасьёс медъяз. Горей, одӥг пол бусыысен Анналэсь оген дырзэ шедьтыса, возьыттэмак юаз:

— Я, Ӟаннэй, кыӵе будэ нунымы, зол-а ӵыжаське?

— Тьфу, — сялӟиз Анна пумитаз.

— Тон эн сяласькы тӧллы пумит, — серектӥз Горей, нокыӵе кариськытэк.

Ӟандыгарен кема возьмам нунызэс Анна суслонъёс улын вайиз. Ачиз ик гогыяз. Анаез арлы быдэ кадь пияз бере, адӟемез вал нунылэсь кызьы вордӥськемзэ. Нунызэ но ассэ шуныт кошкись вуын гылтыса, уй вуэмез сюйкоркаязы возьмаз. Кизёно-арано бусызылы та котыртэм шулдыр интызы кыдёкын ӧй вал. Нунызэ кышетаз бинялтыса, уйин, нокин адӟымтэ дыръя, дораз бертӥз. Бератаз Ориназэ утьыны абиез юрттӥз.

Ӟандыгарлэн иворез ӧй вал. Исьтапан Эшкемей гинэ, пал пыдын бертэм мурт, адӟемзэ вераз. Одӥг редутын*, пе, сылӥмы. «Трос вераськыны маза ӧй вал. Прансуз* йӧнтэмъяськиз. Гадяз чачаосыз трос вал ни Ӟандыгарлэн. Ож бырем бере ог-огмес ӧм ни шедьтэ. Прансуз зол быдтӥз соку расей калыкез. Мон пыдме ыштӥ, лазаретын сазьтӥськи. Со ожысь тросэз ӧз потэ, быриз, дыр, Ӟандыгар — мылкыдыз сэзь, йырыз укыр шаян вал. Сыӵе кышкасьтэмъёс котьку азьпал радын. Соос ик, кут кадь, ожын сапрало, быро», — таӵе ивор басьтӥз Анна арлыдо Эшкемейлэсь. Эшмекей верамъя, со ачиз но кулонлэсь вись кеме кылем. Пуштэм омырен пезьдыса, сюй улэ пачкам. Шӧй бичасьёс улэпкын гуэ сого вылэм ини. Ваземе но, суйме-пыдме но вырттэме, пе, уг луы. Улэпкын сого ни шуыса, синвуосы, пе, потӥзы. Со куспын одӥгез шӧй бичась шуэм: «Мар, таизлэн синвуэз вия кадь». Шӧдтэк шорысь тодмотэм адями кышноелы — Чокойлы — пе, пӧрмытӥськиз. Олокытысь, пе, куарае потӥз, «Чокой!» шуыса, туж зол кеськи. Отӥзэ уг ни тодӥськы, шуэ вал. Кема вераськытэк улӥ, «Чокой» шуыны гинэ быгатӥсько вал, пе. Дыр ортчемъя каллен кыл-ымыз потӥз ик. Только Эшмекей туж шуген, могаса вераськиз. Анна сюлмысьтыз осконзэ ӧз ышты. Котькуд нунал Инвожомумы инмарлэсь бакельзэ куриз.

Туно но шуиз: картэд улэп, бертоз. Анна ассэ ужен буйгатъяз, мӧзмонлы маза ӧз сёты. Нылпи ваемез бере эшшо чеберскиз. Синмаськымтэ мурт ӧй вал, ожысь бертэмъёс но, кышнотэм пиос но ымдурзэс нюлӥзы, ваёбыжъёс кадь, котыртӥз гожеръязы. Анна нокинэ кулэ ӧз кары. Куд-ог воргоронъёс визь-кенеш юаны но ветлӥзы. Ужась медъятэк но ӧйлась. Коньдон поттон понна вуз карытэк но улыны уг луы вал. Чечызэ но ю тысьсэ ужан тӥрлыклы, дӥськутлы, басмалы вошъяз. Вуз карон гожтэт тодэмез кулэ кариз.

 

*

ӟарлы — куанер,

ӟин — собрание,

каргуш — юриськем кыл,

уко — векчи зарни сӥньыс,

ушкуйчи — бандит,

чеспыриё — векчи весь,

мыскал — золотник, секталаез мертан амал,

толмач — кылысь кылэ берыктӥсь,

тутны-вытны — тросгес луыны,

татулык — тупан, эшъяськон,

нужна — кайгу адӟон, ёрмыса улон,

палда — пинал нюлэс пушъет, ӵашша,

яплак — быдэс,

чигын — ваменэс,

сюйкорка — землянка,

карасъёс — соты,

корт кечер — тарантас,

лобыт — культо сётканы лэсьтэм кузь ныдо кык ваё саник,

дуз — сарва,

њаукал, какал — азьтэм,

ӟимыр-кусӥнь — мырдэм,

њуляр — шузи, нодтэм,

редут — окоп,

прансуз — француз.

 

Гуртамы ыль ыргон поттон шахтае ссыльнойёс келямын вал. Соосты кин но со доры, оген улӥсьёс вӧзы, патере интыязы. Каторжнойёс курадӟыса, кӧтсы сюмаса улӥзы, сютэмъёслэн сямзы урод вал. Нылъёсты матазы ик ветлыны ӧз лэзьялэ. Но дунне умой мурттэм ӧвӧл, шуо. Соос пӧлын вал сабырлы воргорон, визьмо першал-доктур. Со гуртысь байлэн коркаяз — Дадайган дорын — улӥз. Анна одӥг чечы дуз понна куриз гожтэтлы дышетыны. Пижные* сюрем ссыльной пумит ӧз луы.

Та першаллы дурыстэм синмаськемын вал Дадайган Макарлэн нылыз Пакка (Прасковья). Паккалэн та яратон тылӝулэсь пиез вордӥськиз. Пакка пиезлы туганэзлэсь нимзэ сётӥз — Пётр. Макар нылызлэсь сьӧлыксэ ватон понна Паккаез  кужмысь куанер-ӟарлы улӥсь Камай Яркейлы сётӥз. Доктур сьӧраз нуыны медэ вал но, дырызлэсь вазь сое дораз ӧз лэзе.

Собере Пакка но тодмотэм каре вож нуныен огназ уз мыны ук! Гуртамы та визьмо ӟучлэн кидысэз выжыяськиз.  Бератаз Камай Петырлэн нылпиосыз дышетӥсь но доктор луизы. Ӵыжы-выжыоссы трос гинэ, элькунамы тодмо адямиос.

Одӥг ӝытэ почтовой курьер Анналы Михайло Петрович Завольскийлэсь (Ӟандыгарлэсь) депеша* вуттӥз. Трос гожтэмын ӧй вал. «Лазаретысь потӥ, йӧнай. Табере ачиз Кутузов егит рекрутъёсты ожтӥрлыкез валаны дышетыны косэ. Али Мускоын, но кема уг улы, берто. Яратӥсько тонэ, Анна, уг вунэтӥськы, возьма».

Ӟеч ивор гуртэ чаляк вӧлмиз. Анналэн мылкыдыз бурдъяськиз. Картсэ шумпоттон понна уката уж борды ӝабырскиз. Чечызэ но вузаны йӧндыриз. Котрес возь кушысьтызы, нянь но чечы вылэ ужась медъяса, сисьмем кенер майыгъёсты, тэчетъёссэ, пуџъёссэ вошъяз.

Улыса-вылыса кема возьмам нунал вуиз, Ӟандыгар гуртэ берытскиз. Со вакытэ сӥзьыл гужем кадь ик чебер улӥз. Аран быремын ӧй вал на. Та иворез аран удысэ вуттӥзы Эшмекейлэн нылпиосыз. Угось сыӵе йылол вань: ожысь яке солдатысь мурт дораз пырыны кулэ ӧвӧл, нырысь ӵыжы-выжыосыз яке эптэшез* доры мед пыроз. Ӟандыгар Эшмекей доры пырем. Анналэн пыдъёсыз музъеме ӧз йӧтэ, киосыз бурдлы пӧрмизы. Гуртэ лобиз мӧзмем кышномурт картэз пумитэ, инмарез доры. Ӟандызэ адӟыса, катьтэмак пыд азяз погыраз.

— Ну-ну, — шуиз Ӟандыгар. — Шудэз погылляськыса пумитало шат?

Со кужмо киосыныз Аннаез лӧбак ӝутӥз но омырын кема бергатӥз. Шумпотонлэн пумыз ӧй вал. Уката ик шумпоттӥз но паймытӥз Ӟандыгарез пичи нылыз Орина. Юрт но ланьырамын ӧвӧл, Ӟандыгарез йыг-йыг возьмам. Ужан тӥрлык но ӟырк-ӟырк. Сьӧд тӧри валэз но коргидаз ӵабъяське, кыткемез возьма.

— Ну тон, Аннушка, кык сюлэмо вордӥськемед. Ӧй малпа вал мон, мынам кышное ужлы таӵе сук шуыса. Кытысь-о сомында кужымед но визьмыд та пичи мугорад? — эшшо но эшшо, буйганы вормытэк, ӟыгыръяз кышнозэ Ӟандыгар.

— Ӟандӥ, мынам тонэ яратэме кужым но берекет сётӥз шуг-секытэз вормыны, ужаны чидан сётӥз. Уж буйгатӥз мӧзмонме. Тон вал монэн ӵош, тонэн кенеши уйёсы, тынэсьтыд визь-кенеш юалляй. Эшшо мыным Инмаре юрттӥз, оскон сётӥз. Мӧзмонме адӟылӥз тыр толэзь, синвуме ӵушылӥз ӵук шунды. Тон бертӥд но, лябӟи, каньсырай. Яратӥсько  тонэ, Ӟандӥ, — кык киыныз  њыгыртӥз мусозэ Анна.

— Анна, нош мон ӧй ке яратысал? Оло, Муско пала кыльысал, со палан но чебер, визьмо кышноос трос, — исаз Ӟандыгар.

— Ой-ой, зэм ик-а меда? Мон кадьзэ уд шедьты, — ымдуръёссэ пеперъяз Анна.

— Зэм но, чебер кышноос трос, но тон кадь сюлмоез, монэ яратӥсез, ужаны быгатӥсез ӧжыт. Тон одӥг мынам… Мон асме куно кадь возисько, нош киос лыдо, ужъёс возьмало. Акыльтӥз со ыбылӥськон уж. Мынам сюлэмылы матын музъем уж. Я бен, мыноме бусые, учкомы шулдыр возьёсмес, яратӥсь шудэн пачылась котресмес. Коркамы ӧз на куашка, дыр? Солэн вӧлдэт коръёсыз тыпылэсь тыремын, оло, ай сю арлы чидалозы.

— Я, мон чаляк Тӧриез кытко, огмынэмен чечы возён дузэз басьтыны эн вунэты.  Мушъёсы мынам тыршисесь, соос тыныд чечы бичазы, луоз, — ушъяськиз Анна.

Та дыре гуртын соослэсь шудоез нокин ӧй вал. Сыџе муртъёс шоры учкыса, адямилы но, пе, шуд палаське. Ракатланэм* лулъёслы инкуазь но шумпотэ.

Аранзы быриз, кабан сюронзы гинэ кылиз на. Лымы усем бере культоосты иншыре кутсаны нуллоно луоз, куасьтӥськон обинез тупатъяно. Ӵуказеяз Ӟандыгар кабан сюрыны сьӧраз Гореез ӧтиз. Быдэс нуналлы бусые кошкем мурт, ӝытэз возьматэк, ури-бери дораз бертӥз. Тӧлпери кадь пыриз корказ Ӟандыгар. Тӧрилэн кыкпал кӧтурдэсысьтыз ӵуж шукы вия.

Гур котырын бергась Анна куалектӥз:

— Мар луиз?

— Тынэсьтыд юаны кулэ, мар луиз?! Озьыен, тон монэ алдад, кескич бигер ныл, пӧечи! Я, вера ай, кинлэсь ныл вордӥд? Кинэн погылляськид тон котресысь сюйкоркаямы, мон прансузъёсын ожмаськыку? — кузь сюмыс сюлозэ вакчиятыса кияз биниз, пиньёсыныз сьӧсь кадь гизьыртӥз Ӟандыгар.

— Мар тон, Ӟандӥ, Инмар тодэ, нылыд тынад! — пыдесъяськиз Анна Ӟандыгар азе. Шуак тодаз лыктӥз: соос туннэ Гореен кабан сюризы. — Горей мар ке вераз шат? Эн оскы солы…

— А-а-а, ачид поттӥд дусымедлэсь нимзэ, озьыен, ваньмыз валамон, шонер.

— Эн оскы солы, Ӟандӥ, мон ваньзэ ачим верало!

— Уг поты кылзэме нокинэ! — шлач! сюлоен шуккиз кышнозэ Ӟандыгар. Собере эшшо но эшшо сюло омырын шулаз на.

Ӟандыгар вожомиз, ӧз вала ни мар дауртэмзэ. Лек вожан но сьӧсь урмем мылкыд ӝуатскизы Ӟандыгарлэн синъёсаз. Анна нырысь ымнырзэ гинэ кык киыныз ӵоксаз, собере ӟигарыз быриз. Дыбыртэмез кылыса, изись Орина сайказ. Со чирак! черектӥськыса бӧрдыны кутскиз. Бӧрдэм куара сайкытӥз Ӟандыгарез. Яратоно кышноезлэсь катьтэммем но вирын сульпӧзись мугорзэ адӟиз.

Толэзьлэсь кема катьяськыны выриз Анна. Оло, кулысал но… Аслаз но улэмез ӧз поты, нылыз жаль потӥз. Палда кушысь суред син азяз пуксиз. Шып улӥз, Ӟандыгарлы но номыр ӧз вера, луэм учырез шонеръяны но ӧз туртты. Кулысал, дыр… Каторжной доктур ке ӧй йӧнатысал. Кӧня муртэз кулэмлэсь утиз та ӟеч сюлэмо ӟуч пиосмурт!

Анна кылӥз: Ӟандыгарез со куаретӥз, индылӥз, визьмаз, либатӥз. Ӟандыгар аслэстыз ваменэс сямзэ ӧз вормы, ньылонзэ аракыен гылляз, но ӧз кудӟылы. Горей кышно Тутай Анна пыдъяськем бере ассэ ачиз быдтӥз, угось солы акыльтӥз вал ини ушкуйчи картэзлэн ултӥямез. Гурт калык сое тодытэк ӧз улы. Горей кема ӧз куректы, дораз соку ик выль кышно вайиз. Ӟандыгар, оло, Гореез но ӵогъясал, дыр, но… Мар ке но ортчемез, азьлоез герӟаз таосты, мае соос гурт калыклы ӧз шараялэ. Сюлмыныз ӧз оскы Ӟандыгар Горейлы, но лулыз пыжиз, гадь вылзэ вожан ӵабъяз. Сокем чебер но чылкыт яратон адямилэн жоб кылызлы луыса син куспын сьӧд эгырлы пӧрмиз.

Гореез гурт калык адӟемпотостэм кариз. Со шоры ӧз ни вазьылэ, пумиськем мурт чутрак урамлэн огпалаз кожылӥз. Горей валаз янгышсэ, уката ик Ӟандыгарлэсь но курдаз, угось со котькуд дыре прансузлэсь ваем пыӵалэныз сое ыбыны быгатысал. Ог уе, нылпиоссэ Мадэй доры кельтыса, выль кышнозэ но дӥськут нергеоссэс вал уробое тырыса, гуртысь пегӟиз. Гурт караулчи адӟем, Кокшан завод пала, пе, кошкизы.

Ӟандыгарен Анналэн нош пилиськем кусыпсы ӧз ни лякиськы. Анналэн

мылкыдысьтыз шумпотон вайись задорез быриз. Со ӧз ни серекъя, ӧз мыня. Ваньмон дырзэ ортчытъяз нылыныз ӵошен, инкуазь улосын. Апаез кулэм бере сопал дуннее кошкиз яратоно абиез — Ӟакты Насьтык. Вылаз ик, гурт вылэ кӧшкемыт висён  сьӧдкыль (холера) вӧлмиз. Суй-пыдыз юскиськиз Анналэн, нокинэ адӟемез ӧз поты, ужез йӧназ уг мыны, улэмез уг ни поты. Тӧри валэз доры потыса, ӟыгыръяса бӧрдӥз. Доктур-дышетӥсез, бертон дырыз вуыса, дор палаз кошкиз. Пакка сьӧраз ӧз мыны, ӧте вал ке но… Анаез дорысь нылзэ басьтыса, гужемзэ Анна воксё нюлэс кушысь сюйкоркаязы улӥз. Ӟандыгарлы шуиз:

— Тон мынам ӧвӧл ни, тон виид яратонме, Горейлы оскид. Тон эркын адями, та дырысен мынам картэ Инмар. Нылыд тынад, но мон сое тыныд уг сёты. Валасько уго: уд яратӥськы тон сое. Инмар монэ кулонлэсь утиз. Ныл сюлэмам тон тылӝу кенжытӥд, со али но уг кысы, улэ но улоз мынам сюлэмам.

Ӟандыгар ӧз пумитъяськы, ӧз алы, сюлэм пыдсаз яратон тылӝуэз ноку ӧз кысы ке но… Чал луиз солэн коркаез, быриз ямез*.

Анналэн нылыз кема ӧз улы. Мадэй абиез дорын сьӧдкыль кутыса, ӧз ни катьяськы. Анна сое ас вӧзаз, нюлэс кушысь котресэ, ватӥз. Анна воксё нимазъяськиз, гуртэ анайзэ чакланы сяна ӧз ветлы. Сьӧдкыль со аре љыны гуртэз шайвылэ нуиз. Али ке но каргаськон кыл кылемын — «калера басьтон».

Паймоно кадь, кызьы кыр пӧйшурез, гурт пудоез номыр уг вала шуод! Визьмо тӧри вал Анна доры ветлыны дышиз. Адями музэн, Аннаез нюлыса, мӧзмемзэ вераса, зыраськыса, синкылиез вияса, вӧзаз сылэ вал. Анна но сое ӟыгыръяз, вешаз, адями кылын вераськиз. Угось Тӧри гинэ тодӥз, со сьӧлыктэм шуыса. Со кӧшкемыт уе вал ӧз сёты ушкуйчилы Анналэсь чылкыт лулзэ, мугорзэ саптаны. Быгатысал ке Тӧри адӟемзэ вераны… «Тонэ Ӟандӥ возьма, ыштоз», — пеляз лушкем шыпыртылӥз Анна. Кузёезлэсь нимзэ кылыса, вал пельёссэ чорк-чорк каръяз, кожалод, верамез валалляз. Валаз но, дыр, вераны ӧз быгаты, йырзэ ошыса, дыртытэк гурт пала вамышъяз.

Одӥг пол тём пеймыт сӥзьыл уе Анна вал гырдалтэмлэсь сайказ. Нырысь-валысь ӧз вала, юнме пель сьӧраз-а кылӥськиз, оло нош, уйвӧт-а адӟиз? Ӧз, зэм ик ӧс борды кин ке ӝабыръяське. Гондыр уз луы — соос изьыны выдӥзы ни, мурт уз лыкты — адями вазёз, куара сётоз. Анна ӧз кышка, ӧсэз усьтӥз но абдраз: азяз Тӧри сылэ.

— Мар луиз, мусое? — ӟыгыртӥськиз яратоно Тӧриезлэн чыртыяз Анна. — Ӟандӥен мар ке шат?

Вал сэрпалтӥськиз. Тӧрилэн бам кузяз синвуосыз вияло. Со укыр востэм, кылтым-калтым жадем мурт кадь, катьтэк-ӟигартэк, мырдэм вамышъяса, васькиз ошмес доры тодмо пытьыетӥ. Ӧз, ошмес ву но ӧз юы, одӥг кырым турын но ӧз куртчы. Шуак пыд йылысьтыз горд сюй вылэ ланьыраз. Сӥзьыл уй югак луиз. Оло инвис усьтӥськиз, оло кизили чилектӥз? «Осто! Инмаре-Куазе, Кылдысинэ, уть!» — шуиз Анна но валлэсь йырзэ ал вылаз понӥз. Кема мусояз, маялляз Анна Тӧриез. Валаз, Тӧри со доры кулыны лыктэм шуыса. Тӧриен ӵош бӧрдӥзы соос, люкиськыны ӵыдытэк. Тӧрилэн султэмез ӧйлась ни, ӵукна пал, шунды ӝужамлэсь азьло, кулӥз. Анна либытак, вал йырез ал вылысьтыз басьтыса, усьтэм синъёссэ люгы куарен ӵоктаз. Вал дорысь палэнскыса гинэ вуиз — Тӧри вылэ лопак горд яр куашказ.

 

* * *

Анналэн абиез турын-куаръёсыз вала вал. Юнме гинэ гурт калык тодэмез вань уг шуы вал, дыр. Яратон нунокезлы сыӵе тодон-валанзэ кельтӥз. Тросэз гурт калык сьӧдкылен бырем бере Анна турын-куаръёсын куд-ог нылпиосты эмъяны быгатӥз. Табере со доры, ымысь ыме, пельысь пеле кылыса, эмъяськыны ветлӥзы. Со сяна, Анна адямиосыз ӟеч валалляз. Уката ик со доры кыстӥськизы кышноос. Анна дорын соос сюлэмзэс буйгатъязы, лулпушсэс эмъязы, кужым люказы. Аннаен ӵош Инмарлы вӧсяськизы, шуд, тазалык, картэн улыны ӟеч но татулыко кусып курыса. Нош нылпитэк кылемъёс Инвожомумылэсь нылпи куризы, со куриськон ортчылӥз инвожо толэзьлэн 21-тӥ нуналаз. Та нуналэ Анна кулэм Орина нылзэ буре вайылӥз. Гуртысь кышноос, пинал нылъёс ӧтчаме ветлылӥзы. Татын соос вӧсяськизы, асьсэлы йӧно карт, шуд курылӥзы, бератаз шулдыръяськизы. Пиос кенер пушкы пыраны ӧз дӥсьтылэ. Та кышноослы сӥзем вӧсяськон вал. Шекляос кенер тэчет вылын, ческыт пыжиськем возьмаса, пукылӥзы. Шулдыръяськон бырем бере капчи мылкыдын доразы бертылӥзы.

Анналэн уйвӧтъёсыз вераны быгатэмез, мугорез куаръёсын йӧнатэмез, лулэз эмъямез, азьланьзэ вераны быгатэмез котырысь гуртъёсы вӧлмизы. Та кушлэн нёжалаз будӥз воршуд мумылэн лулкужым сётӥсь пусэз — ӟаннасяська. Палда кушысь котырес музъемез Анна утялтӥз. Котырак кызэн котыртӥз, нылызлэн шайгу вылаз люкыр-люкыр тӧдьы ӟаннасяська ӝужаз. Узы-борыез но, легезь-намерез но тачак вал татын. Нош мушъёслы кибер луиз, чечы трос ӧз кыльы, Анналы веръямон гинэ.

Анна пересьмытозяз ӧз улы, сюлмыз путӥз, луоз. Кулон азяз Ӟандыгарез вӧтатӥз: «Ӟанды, мыным та дунне вылын улон ӟоскыт, инме лобӟеме потэ. Нылмы доры кошко. Тон янгыш ӧвӧл. Ӟанды, астэ эн йыр-йы. Мынам но лулы тон азьын чылкыт. Яратонмес мон сьӧрам нуисько. Тонэн чупаллям бамъёсме нокин ӧз чупа, тонэн ӟыгыръям мугорме нокин ӧз ӟыгыръя. Сьӧлыке ӧвӧл мынам тон азьын, Ӟандӥе. Кемалась ни тонэ адӟеме. Яратско тонэ, лыкты берпумзэ мон доры сюйкоркаямы».

Ӟандыгар вӧтэзлэсь сучырмыса сайказ. Сюлмыз шӧдӥз: маке умойтэм, Анна ӧте. Азьвылгес ни коркаязы ишан пыраз вал. Акшан вакыт ӧс ас понназ усьтӥськиз но, кияз бодыен Ӟаннэйлэн абиез пыриз. «Тани тыныд, Ӟандыгар, сокем тузӥ нылме арам карид!» — бодыеныз шуккыны турттэ вал но, кӧкыысь нуны бӧрдыны кутскиз. Вужер ышиз. Ӟандыгар корказьзэ, куалазэ, гидкуазьзэ но чаклаз — нокин ӧвӧл. Капка сьӧрын, урамын но пытьы ӧй вал. «Ма, Ӟакты кышно Насьтык кемалась кулӥз ни», — малпаз Ӟандыгар. Вӧтсэ адӟем бераз ӵукна ик, кашка валзэ корткечере кыткыса, палда куше ворттӥз. Тӧл пельтэмъя шаугето ӝужыт кызъёслэн йыл вайёссы. Кыз йылысь кырныж, крок-крок кесяськыса, уйпала лобӟиз. Ворсам ыбес, ӟукы-ыр! вазьыса, ас понназ усьтӥськиз. Чал-чал но шим-шим татын. Ӟандыгарлэн мугорыз юзыр-кезьыр луиз. Музъем пушкы бурмем сюйкоркалэсь ӧссэ мырдэм усьтӥз, куаляк луиз. Паськыт кӧлан ӟус вылын, турын-куаръёс пушкын, нокинэн йӧтылымтэ, сисьмыны сётӥськымтэ, чылкыт, егит чебер тусбуё, гадь вылаз лэзьям уко туго йырси пунэтъёсын Анна кылле, ӝамдэлы ял карыны выдэм кадь. Кӧня кыллем Анна тазьы, тодӥсь ӧвӧл. Кулонзэ шӧдӥз, луоз, сотэк дӥсясал-а со вылаз Ӟандыгарлэсь пинал дыръяз кузьмам вож пильыс дэремзэ, зарнивуам пель угызэ но тӧдьы марӟан зундэссэ? Сюйкоркан кыӵе ке ческыт турын-куар шӧм лӧсъяське. Ӟандыгар ӧз вала, усьтэм осэтӥ шунды-а пыриз, Анналэн лулыз-а озьы корка пушкын югак син мальдымон югектӥз.Ӟандыгар катьтэмак Анна азе пыдесъяськиз. Зур куалекъя солэн мугорыз, шарак кисьтӥське ноку но виямтэ-потылымтэ синвуэз. Анналэсь кезьыт киоссэ шунтыны турттыса, лэся, пелляз-кырмаз, бамъёссэ чупаз, мугорзэ маялляз, пыдъёссэ кырмаз. Пыд азьысьтыз юромо дасям ӝуткам шобретэз адӟыса, Аннаезлэсь мугорзэ шобыртӥз. Котырак учкиз аслэсьтыз лэсьтэм сюйкорказэ. Номыр мултэсэз ӧвӧл татын. Ваньмыз азьло кадь. Куке но татын соос туж шудоесь вал. Анналэн кыллён вадьсаз сюй медаз куашка шуыса, пулъёслэсь сэндра лэсьтӥз. Корткуй кутыса, кунян кызьпуйыэн возъям ӝопы* выллем укноосты, пыран-потан ӧсэз ожо карсэн тып-тып ӵоктаз. Сюйкоркалэн тыпы вӧлдэтэз сотэк но вож ожоен но куак будосэн шобырскемын, ӝуйыаськемын вал. Шунды сиосын мальдӥсь куакъёс вискы люкен-люкен ӟаннасяськаос ӝужаллям. Со ик луиз Анналэн шайгуэз.

Ӟандыгар кема улӥз, 102 аресозь. Анна бере со куинь пол кышнояськиз. Трос нылпиосыз вордӥськизы. Нош яратон тылӝу сюлмаз нокин гомӟытыны ӧз быгаты. Даурез  уго котькызьы ортчытыны луэ. Ӵем дыръя, гужем инвожо вакытэ, пересьмем, пурысьтам Ӟандыгар, йырзэ ошыса, малпаськись тусын кема пукылӥз лысэз усьыны кутскем ӝужыт кыз улын. Кулытозяз кенер тэчетъёсты, майыгъёсты тупатъяз, вошъяз. Сюйкорка — Анналэн шайгуэз — ӧз куашка, вырйыллы пӧрмиз.

Гурт калык та интыез Анна вӧсь шуыса нимам. Нош палда кузя пӧзись ошмес синъёс Палды шурлы пӧрмиллям. Вадьла вакытэ инвожо толэзьлэн 21-тӥ нуналаз гурт кышноосмы одно ик арлы одӥг пол, турнаны потэмлэсь азьло, татчы вӧсяськыны ветлылӥзы. Соослы угось пересь абиоссы вераса кельтӥллям, сьӧлыктэм Анна но солэн нылыз татын ватэмын шуыса.

Ӟандыгар кулэм бере палда кушысь котресэз утялтӥсь ӧз луы ни, кенерез сисьмиз. Турынзэ гинэ пудолы турналлязы, куддыр воксё боры бичасьёс турын-куарзэ но, тас* кадь, лёгало вал. Но Анналэн лулыз татӥ поръя, со кыдёке кошкемын ӧвӧл. Со вылӥысен учке-чакла гуртын улӥсь выжыоссэ. Та интыез гуртоосмы Анна вӧсь шуо ке но, вӧсяськыны уг ни ветло. Одӥг-ог тодӥсь-валасьёс, чылкак улонлэсь йӧнзэ ыштэмъёс, ӟудэмъёс семья кусыпсэс тупатон, нылпи ваён понна куриськыны пырало. Сотэк тӧласалзы-а татын куак вайёсы ошылэм буртчин лентаос, мунё дӥськутъёс: дэрем-айшетъёс но нуны такъяос.

Кин ке, вашкала йылолэз чаклась мурт, сӥзиськем кылзэ быдэстэм. Кулэм ӵыжы-выжыезлы йыр-пыд сётыкуз, вал-а, скал-а йыркобыос татчы ваем. Та вӧсь интыез куркуян кожам-а, мар-а?

Пичи дыръямы боры бичакумы, та интые пырыса, валаса но валатэк асьмеды кирос каръямы. Сьӧлыктэм Анналы одӥг кырым борымес яке нянь юдэсмес куак выжые понылӥмы. Боры трос мед сюроз шуыса, куримы, мукетсэ ӧм валалэ, шузи-мазигес вал на уго.

Анна вӧсь — со ӟуч вӧсь. Пичи дыръямы аби-чужай сьӧры калъяськиськомы вал. Быдэ вуыса но ай войналэсь азьло но война дыръя та вӧсяськонэз мыло-кыдо муртъёс ортчытъязы. Вӧсяськыны ветлэммы вань, шуо вал гуртысьтымы вашкала пересь кышноос.

Тӥни озьы, ас выжы чиньы-пӧлызэс кельтӥллям гуртамы ӟуч Завольскийёс. Бератаз соос бытыннэй* удмуртомизы. Мынам анаелэн абиезлэн анаез но ӟуч Завольский выжыысь вылэм. Вашкала ӵужатай выжые — Дадайган Макар — одӥг-ог, вожпотон дыръяз, кышноез шоры «ӟуч, урус» шуыса, пе, куаретоз вал. Мукет урод кылын ноку вераськымтэ.

Мед юрттоз али улӥсь-вылӥсь воршуд выжыосмылы сьӧлыктэм Анналэн лулыз.

 

Пижны — силок,

депеша — ивор,

эптэш — эш, тодмо мурт,

ракатланэм — гань-гань луэм,

ям — чеберлык,

љопы — ӵын потон пась,

тас — кабан улэ тырем векчи пуӵъёслэсь инты,

баттынэй — чылкак, воксё.

 

Йылпумъяса вераме потэ, осконэ вань, кин ке но утялтоз ай воршуд выжыысьтымы вашкала вӧсяськон интыосты: Анна вӧсез, Быдӟым Булда вӧсез, Керемет но Луд вӧсьёсты. Таос пӧлысь Быдӟым Булда вӧсь ми гуртын гинэ вылэм. Татчы куинь армысь одӥг пол вӧсяськыны ветлӥллям котыр гуртъёсысь удмуртъёс, поръёс, крашинъёс, удмуртомем ӟучъёс.

Быдӟым Булда вӧсьысь тылэз асьсэ котыразы, палазы нуиллям ёросысытымы музон гуртъёс, соослэн со вӧсьсы Пичи Булда вӧсь шуиське вылэм.

Милям гуртмы — бигер шаерысь Удмурт Элькунэ пыран-потан ӧс, со ар сюрес вылын сылэ. Та гуртысен кутско удмурт калыклэн сям-йылолъёсыз, сӥ-данэз, кадырез. Ар сюрес дурын сылэ Эшкемейлэн коркаез, кудӥзлэн корка сэрег пазъёсыз ӵупемын но чутламын вашкала амалэн. Со сяна, гуртамы вань но ужа Пукролы сӥзем черк. Та гурт котырысь интыос но улӥсь калыкез тунсыко ӧй потысалзы меда котьмае тодыны турттӥсь нылпиослы но туристъёслы?

Удмурт Дунне
By Удмурт Дунне Июль 6, 2016 17:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*