Удмурт шӧмо ужрадъёсын узыр пӧсьтолэзь

Удмурт Дунне
By Удмурт Дунне Июль 6, 2016 16:30

Удмурт шӧмо ужрадъёсын узыр пӧсьтолэзь

4-тӥ-8-тӥ пӧсьтолэзе Дэриын «Шудкар» лагерь ортчоз. Дэриысь школа-интернатэ люкаськозы Дэри, Кез, Пичи Пурга, Шаркан ёросъёсысь 25 пиналъёс. Ваньзы соос мылысь-кыдысь пырисько «Шундысиос» движенилэн ужаз. Огазеяськонэз азинтон сярысь вераськозы, проектъёссэс возьматозы.

7-тӥ пӧсьтолэзе Геннадий Красильниковлэн Ижысь музеяз писательлэн вордӥськем нуналэзлы сӥзем ужрад ортчоз. Со огазеялоз гожъяськисьлэсь вань ӵыжы-выжыоссэ но татчы лыктэм куноосты.

7-тӥ пӧсьтолэзе  Удмуртиын 3-тӥ арзэ усьтӥськоз «ИжЖенева» фестиваль. Ижын, Воткинскын ортчозы концертъёс. Асьме артистъёс сяна, отын люкаськем калыкез шулдыртозы Швейцариысь, Франциысь но Италиысь куноос но. Радъясез — Удмуртиысь калык артистка Надежда Уткина. 0+

10-тӥ пӧсьтолэзе Пичи Пургалась черкогуртын ортчоз «Учке мынэсьтым дэремме!» элькун фестиваль. Сӥземын со удмурт калык дӥсьлы. 0+

12-тӥ-16-тӥ пӧсьтолэзе Шаркан ёросысь Быгы гуртэ «Быг-быг» фестивале люкаськозы быдэс фин-угор дуннеысь пӧраськисьёс. Татын усьтӥськоз удмурт сиён-юонъёслы сӥзем музей. Ужрадъёс дыръя удмурт сиён-юонъёсъя поттэм путеводительлы презентация ортчоз. Яркыт бичетын возьматэмын, кыӵе ёрос кыӵе сиёнэн данъяське. 0+

16-тӥ пӧсьтолэзе Москваысь город шорын «Эрмитаж» садын 2-тӥ арзэ ортчоз Гербер шулдыръяськон. 0+

22-тӥ-26-тӥ пӧсьтолэзе Кияса ёросысь Вуж Салья гуртэ люкаськозы удмурт вакчи кино лэсьтыны мылкыд карисьёс. Сое егитъёслэн «Шунды» огазеяськонзы радъя. Сценарий гожтэ азьвыл «Узы-боры но «Пузкар» 2 удмурт кинолы сценарийёс гожтэм нылмурт Алёна Петрова (Дарали Лели).

Удмурт Дунне
By Удмурт Дунне Июль 6, 2016 16:30