Удмурт кылэз дышето кунгож сьӧрысь студентъёс

Удмурт Дунне
By Удмурт Дунне Июль 21, 2016 12:26
турнан

Кунгож сьӧрысь нылъёс турнаны дышетскизы.

Удмурт кун университетын али мынэ удмурт кылэз дышетонъя гужем школа. Сое арлы быдэ радъя Удмурт кылосбуръя, финноугроведениея но журналистикая институт. Отчы вуэмын кунгож сьӧрысь 2 адями.

Шаерамы удмурт кылэз дышетыны арлы быдэ ветло кунгож сьӧрысь егитъёс. Кылем аръёсы гужем школае тросгес калык лыктылӥз. Миым вуиз ке 11 адями, туэ 3 сяна ӧвӧл: Венгриысь Богата Тимар, Германиысь Аника Вейланд, пӧлазы воргоронзы вань — Санкт-Петербургысь Максим Кузнецов. Со гужемлы быдэ Удмуртие бертылэ нэнэез доры.

Гужем школа кыстӥське 3 арня. Нуназе егитъёс удмурт кылэз дышето, удмурт культуралы, сям-йылолъёслы сӥзем англи кылын лекциосты кылзӥсько, куд-ог нуналъёссэ гуртъёсы но потало. Озьы соос зэмос удмурт гурт улонэз адӟо. Кылем арняе егитъёс потазы Шаркан ёросэ удмурт сиён-юонъёсъя «Быг-быг» фестивале. Кунгож сьӧрысь нылъёс турнаны дышетскизы, удмурт сиён-юонъёсты оскалтӥзы, дышетӥзы выль кылъёсты, кылсярысь… сябась!

— Тӥляд ваньмыз сураськемын: туалаеныз ӵош уло вашкала сям-йылолъёс. Со умой, Германиын озьы ӧвӧл. Мынам городам котькуд ар таӵе фестивальёс ортчыло, мон но отчы пыриськылӥсько, — вера Аника. — Но отын калык дӥсен одӥг-кык адями гинэ ветлэ, тӥляд кадь ӧвӧл.

Тросэз кунгож сьӧрысь улӥсьёс кадь ик, Боги но Аника малпало вылэм, Россиын гондыръёс кӧбертэк ульча кузя ветло шуыса. Но кураторъёс Вика Титова но Юлия Степанова дышетскисьёссылы «визь тыриллям» ни. Вуоно арняе егитъёс вуылозы Кияса ёросысь Уддяди гуртэ, толон паймизы Сарапул карлы.

Мария Векшина

Туспуктӥз А. Горбунов

Удмурт Дунне
By Удмурт Дунне Июль 21, 2016 12:26