Учке мынэсьтым дэремме!

Удмурт Дунне
By Удмурт Дунне Июль 6, 2016 15:54
мосвина

Удмурт дэремъёсты тупатъясь-выльдӥсь Татьяна Москвина.

 Ма возьма удмурт дӥсез

Пичи Пурга ёрос культура юртын 10-тӥ июле ортчоз удмурт калык дӥсья элькун фестиваль. Кыӵе со луоз? Маин висъяськоз шаерамы ортчылӥсь мукет фестивальёслэсь? Та сярысь кенешим  «Дэрем» студилэн кузёеныз, «Удмурт Кенеш» огазеяськонлэн Пичи Пурга ёросысь ёзэныз кивалтӥсен, фестивалез радъясен  Василий Москвинэн.

— Дӥсьлы сӥзем фестивальёс вазен но ортчытъямы, — вераз Василий Ермолаевич. — Ӝутскем мылкыдын отчы пыриськылӥзы дӥсь возьматӥсьёс но, ужрадъёсты дасясьёс но, учкисьёс но.  Со милемлы мылкыд сётӥз дӥсь бордын ужмес азинтыны.

Берло даур ӵоже удмурт дӥсьлэн тусыз ӧз воштӥськы. Калыкын улӥсь мода туж кужмо угось. Соин ик нырысетӥ возьматонмес-фестивальмес озьы ик нимам вал — «Вераме потэ!» Верамез потэ дэрем вурись кибашлылэн, кыӵе чебер уж со лэсьтэ. Дэремлэн но верамез потэ, кыӵе мур солэн пуштросэз, кыӵе бадӟым кужмыз. Удмурт дӥсь вурисьёс котькуд ёросын, гуртын шедё, соос модаез возё, удмуртлыкез азинто, шуыны луоз. Озьы ке но асьмеос ум тодӥське соослэсь нимтулъёссэс, мылкыдъёссэс, ум шараяське тодон-валанзэс. Соин ик ми соосты огазе люканы, тодматскыны малпам. Та бордысь потӥз таиз фестивальмылэн нимыз — «Учкелэ мынэсьтым дэремме!»

— Озьыен, Пичи Пурга черкогуртэ вань удмурт дӥсь вурисьёсты возьмаськоды?

— Озьы, кинлэн мылкыдыз вань — ваньзылы туж шумпотом. Медаз возьдаське чебер ужзэс возьматыны. Дунъет соослы сётозы удмурт дӥсь нуллӥсьёс, тодосчиос, удмуртлыкез эскерисьёс. Со сяна, нимысьтыз семинаръёс, мастер-классъёс ортчытэмын луозы.

Дӥсь туж пӧртэм луыны быгатоз. Удмуртъёслэн воршудъёссы гинэ ог 70 пумо. Котькудӥзлэн аслаз дӥсяськон манерез. Ваньзэ сое люканы-адӟытыны быгатӥм ке, шуомы: одӥг фестиваль ӵоже удмурт дӥсьлэсь историзэ но пӧртэмлыкcэ возьматӥм.

Пургалан ми 8 пӧртэм дэрем вуриськом. Ваньмыз туж матын луо выжы дӥсьлы, вашкалаезлы. Со чеберлы гинэ ӧвӧл, cо выжыдэ буре ваён, сое гажан луэ. Зэм, туала вуриськисьёс ужазы быгатыса куто ни выль, дуно, векчи, капчи басмаосты, быгато дӥсез выль пужыосын чеберъяны.

ДЭРЕММЕ— Кызьы учкиськоды удмурт дӥсьлэн азьланьын улонэз шоры?

— Вить ар талэсь азьло гинэ удмурт дӥсез эскерон, сое возьматон ужрадъёс ӧй вал, шуыны луоз. Оло, ми ик сое пичияк ке но вырӟытӥм. Табере сыӵе возьматонъёс тросаз гуртъёсын но ортчо ини. Туж бадӟым шумпотон со. Уг кельшы соиз гинэ: куд-огез, удмурт дӥсьлэсь пуштроссэ, историзэ, котькуд вурысэзлэсь кулэлыкcэ рос-прос тодытэк, кызьы мылзы потэ вандылыны турттэ. Сирестэм, вӧл-вӧл мугортэм, сӧзултэм, вакчи саесо дӥсез удмурт дэрем шуод шат? Нош малы удмурт дӥсь борды легезьпу сяська кадь пужы лякод меда? Эшшо ик паймисько, куке фестивальёсын сыӵе дарманьтэм ужъёслы дун сёто, удмурт дӥсь шуо!

Удмурт дӥсья асьмеос ог-огмес тодмаськом, ог-огмы борды кыстӥськиськом, удмурт кылын вазиськом, ӵош кырӟаськом но эктӥськом. Сое адӟо мукет калыкъёс но. Туж зол удмурт дӥсьмес быдэс дуннелы возьматӥзы Брангуртысь песянайёс. Маизлы ке но синмаськыса, Женеваысен милесьтым удмурт дэреммес басьтӥз Катарысь посоллэн кузпалыз. Швейцариын ог 20 адями дӥсяcькиз удмурт дӥсен, Москваысь егитъёс удмурт дэремен Бадӟым театре ветло.

Кыӵе азьланяз луыны кулэ удмурт дӥсь — ми кылзом фестивале гуртъёсысь, ёросъёсысь лыктэм калыклэсь. Собере ини вералом, мар возьма удмурт дӥсез. 0+

Наталья Фролова,

Пичи Пурга ёрос

 

Удмурт Дунне
By Удмурт Дунне Июль 6, 2016 15:54