Сьӧлта ёросысь Зямай гурт: Пичи ке но, юн

Удмурт Дунне
By Удмурт Дунне Июль 28, 2016 14:04

Сьӧлта ёросысь Зямай гурт: Пичи ке но, юн

Тыпыос пӧлын кужмо калык улэ

Сьӧлта ёросысь Зямай гурт туж усто интыын пуксемын: Сьӧлта черкогуртозь пыдын вуымон — ог 2,5 иськем. Татын пудо вордыны вӧлак возьёс, машинаос но калык трос ӧвӧл.

ЗЯМАЙ4

О. Пчельников гурт понна трос сюлмаське.

Табань сиыны — тымет дуре

Сьӧлта черкогуртэз ортчыса, асфальтэз воштӥз кӧльыен шобыртэм сюрес. Тодэмея ӵапак та сюрес Зямае вуттэ, но кытын гурт интыяськемын, указательёс ӧвӧл, чурен будӥсь ӝужыт писпуос сьӧрысь номыр уг адӟиськы. Иськем пала ортчыса, ыж бӧксэм куара чузъяськиз — иське, шонер мынӥсько. Ӝоген  садъёс пӧлы ватӥськем липетъёс адӟиськизы.

Зямай интыяськемын тымет дурын ик. Татчы, кызьпу арама саюлэ, ӟусъёс, ӝӧк, гур пуктэмын, спорт площадказы вань. Нуназе шорын урамъёстӥ ветлӥсез ӧвӧл, ыжъёс но кечъёс сяна. Одӥгысьтыз коркась кышномурт потӥз. Людмила Чиркова — трос нылпиё анай. Кыкез пиналъёсыз ужало ини, одӥгез городын тодон-валан басьтэ, кыкез покчиосыз анай-атайзы бордын на — школаын дышетско. Л. Чиркова семьяеныз татчы кӧня ке ар талэсь азьло гинэ выжизы. Черкогуртын корка басьтыны чаклало вал, но кельшизы Зямайысь пудо вордыны тупась вӧлак интыос.

Тымет дурын шутэтскон инты.

Тымет дурын шутэтскон инты.

Та гуртын улэ Кильмезь муниципал кылдытэтлэн йырыз Олег Пчельников.

— Одӥг вакытэ гурт бырыны ӧдъяз вал ини, — вера со. — Но али татчы  музъем басьтон пумысен юалляськисьёс вань. Сьӧлталан улӥсьёс юрт пукто ини, эшшо одӥг адямилы участок висъямын. Гуртэ сюрес вань: тол но, гужем но сое утялтыса возиськом, черкогуртозь но кыдёкын ик ӧвӧл. Калыклэн пудо вордэмез потэ на ай.  Али милям татын 11 йыр сюро таза пудомы. Пастуханы, ужаны сямен, нуналлы быдэ ветлоно луиз но, гуртоосын кенешыса, загон пуктӥм. Гурт сьӧрамы 2 гектар музъемез арендае басьтӥм но кенерам. Кылем арысен отын пудоосмес возиськом. Сюроосмылы туж кельше: пӧсьлэсь ватӥсько писпуослэн саюлазы, зорлэсь — куштэм скал гидъёс улэ, юыны васькало шуре.

Гуртамы 2 ульча — Полевой но Дубовцевлэн. Кыкетӥзэ, гуртысьтымы пияшез, Афганистан ожын бырем Николай Дубовцевез сӥлы карыса, нимамы.

Гуртмы пичи — 14 коркан ог 50 адями улэ, ог-огенымы тупаса, эшъяськыса улӥськом. Тани кылем арын гуртмылэсь нуналзэ пусйим. Шулдыръяськонлы шуыса шутэтскон инты дэмен асьмеос лэсьтӥм. Та серегмы сярысь тодыса, табере черкогуртысь калык но дорамы я табань сиыны, я шашлык пыжыны, я пыласькыны-чорыганы вуылэ. Туэ тымет дурамы нырысьсэ ортчиз  шаерысьтымы инвалид чорыгасьёслэн фестивальзы. Азьланяз малпаськом липет улэ лэсьтыны теннисэн шудон ӝӧк.

Л. Столбова кеч вордэ.

Л. Столбова кеч вордэ.

Олег Викторович спортэз гажа, муниципал кылдытэтысьтыз калыкез но ӵошатсконъёсы пыриськыны ӝутка.  Ачиз О. Пчельников ялан ёрос ӵошатсконъёсын но шаерысьтымы Гурт шудонъёсын кужымзэ мерталля. Та вакытэ ёросын арлыдоос пӧлын ортчись спартакиадаын быгатонлыксэ возьматэ.  Бере уг кыльы Лариса кышноез но. Со Сарапул ёросысь Сигаево черкогуртын ортчем Гурт шудонъёсы гира ӝутканы ветлӥз.

Пушъетъёсын узыр семья

Людмила Ивановна Столбова быдэс улонзэ пиналъёсты дышетонлы сӥзиз. Со пӧртэм гуртъёсысь школаосын покчи классъёсты визьнодаз. 12 ар пала нуналлы быдэ пыдын ветлылӥз ог 15 иськемысь Сьӧлта ёросысь Юмга, собере 3 ар — ог 18 иськемысь Кейлуд гуртъёсы. Пенсие потыса но, тэк пуконэз уг вала: трос кечъёс вордэ. Эшшо Сьӧлта черкогуртэтӥ но Зямае почта нуллэ.

Нуналлы быдэ сомында пыдын ветлэмзэ тодаз вайыса, мыньпотыса вера:

— Али эшшо но тросгес ветлоно луэ ай. Почтальонъёс тырмымтэен, ӝыны Сьӧлта черкогуртэтӥ гожтэтъёс, журнал-газетъёс нуллӥсько.

А. Дубовцевлы 86 арес ини.

А. Дубовцевлы 86 арес ини.

Зямай — Дубовцевъёслэн но Крестьяниновъёслэн гуртсы. Юнме ӧвӧл, дыр, со — гурт котырын трос тыпыос. Гуртоос верамъя, тужгес бадӟымезлы тыпылы 100 арлэсь трос ни.

Аркадий Дубовцев — тужгес арлыдоез, али солы 86 арес. Воргорон тымет котырысь уг пыралля — яратэ чорыганы. Ярам, прудзы бакча сьӧрын гинэ. Аркадий  Павлович али ке но пудо котырын выре, ыжъёссэс ачиз утялтэ. Кык ар талэсь азьло гинэ скаллэсь куштӥськиз.

Гуртоос Аркадий Павлович доры азьвыл вуылӥзы куазь сярысь юалляськыны, мерттӥськон-кизёнлы, турын калтонлы тупась вакыт сярысь тодыны. Воргорон куазь календарь лэсьтылӥз: толалтэ нуналъёсты пусйылыса, котькуд гужем нунал сярысь вераны быгатылӥз. Но берло дыре куазь зол воштӥськемен, чакламъёсыз тупамысь дугдӥзы но, та ужлэсь куштӥськиз.

Аркадий Павлович быдэс улонзэ колхозын ужаз. Юртъер котыраз ачиз сад мерттӥз. Ческыт емышъёсын кузёзэс шумпотто яблокпуос, чияпуос, сливапуос.

— Садысьтым одӥгез улмопуэ 1920-тӥ арын мерттэмын. Куасьмыса, сисьмыса 3-тӥ пушъет сётӥз ни, — вера А. Дубовцев. — Нош тыпыелы 56 ар ни.

зямай

Гуртоос данъясько егит спортсменэн Иван Дубовцевен.

Аркадий Павловичлы котьку оскымон юрттӥсь вал кузпалыз Клавдия Алексеевна.  Табере соос 22 внукъёсын но 21 правнукъёсын узыр песянай-песятай.

Гуртоос данъясько егит спортсменэн Иван Дубовцевен. Пияш 8-тӥ классэ выжиз. Со школаязы но ёросын ортчылӥсь вожвылъяськонъёсы пыриськылэ. Яратэ куасэн бызьылыны. Анай-атаез солы юромо ӟеч куас но басьтӥзы. Ёросын арлы быдэ ортчыло Афганистан ожын бырем Николай Дубовцевез сӥлы карыса вожвылъяськонъёс. Ӵапак та воргорон Иванлэн ӵужмуртэз луэ. Пияш таӵе ӵошатсконъёсын одно вормон басьтэ. Алигес Иван бертӥз Ижысь, гужем биатлонъя тренировкаысь. Озьы со дасяське шаерамы ортчоно ӵошатсконъёсы пыриськыны.

Ангелина Снигирёва

Удмурт Дунне
By Удмурт Дунне Июль 28, 2016 14:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*