Шудон но, сылал возён но

Удмурт Дунне
By Удмурт Дунне Июль 21, 2016 08:16

шудонСарапул ёросысь кибашлыослэн юртысьтызы методист Ксения Микешкина аспӧртэм погремушка лэсья.

Шудон быдэсак бичаське кызьпу туйлэсь. Вашкала дыръя та шудонэз нылпилы дэмдорез сямен сёто вылэм, ас куараеныз уродэзлэсь, син усёнлэсь мед утёз шуыса. Мед шальтыртоз шуыса, коробка пушкы поно 6-7 кӧжы я ю тысь.

Туй арлыдогес кызьпуос бордысь басьтоно. Туж чакласьконо: пурт муре пыриз ке,  писпуэз вӧсь кароз. Векчи гинэ туйзэ басьтоно ке, писпу уг быры. Бичам туй бумага выллем шонер мед куасьмоз шуыса, сое вӧлдоно но вылаз секыт зӥбет пононо. Озьы арлэсь кема возьыны уг яра, со пыргись луэ.

6 огкадь прямоугольник дасяно. Котькуд прямоугольник пушкын инъетэз — квадрат. Урдэсъёссэ бурдъёсты кадь куасалтоно. Туйлэн тӧдьы палыз пушказ мед кылёз. Котькуд детальлэсь бурдъёссэ, вылысьтыз вылаз поттаса, бичано, квадрат пӧрмытоно. Воксё клейтэк.

Шудон медаз сэрттӥськы, сэрегъёсыз ог-огзы борды юн мед кырмиськозы шуыса,  бичам коробез котыр ласянь огдырлы думылоно но быректэм вуэ 3-5 минутлы котоно. Куасьмытозяз сӥньысэз пертчыны уг яра. Соку шудон аслэсьтыз туссэ ноку уз ышты ни. Бурдъёсыз тач-тач лякем кадь пуксёзы. Сӥньыссэ басьтэм бере, одӥг бурдзэ каллен висъяса, пушказ кӧжы я тысь пононо.

Коробез  сакыр я сылал нуллон арбери чот но кутыны луоно.

Елена Сараматова

Удмурт Дунне
By Удмурт Дунне Июль 21, 2016 08:16