Секыт изэз вырӟытӥз

Удмурт Дунне
By Удмурт Дунне Июль 20, 2016 14:00
евсеева

Анна Евсеевалэн та 3-тӥ книгаез луэ ини. Ваньмыз сямен ик соос Удмурт театрлы но отын ужам но ужась артистъёслы сӥземын.

Удмурт Республикаысь культура удысысь дано ужасьлэн Анна Евсеевалэн «Из сокровищницы души» книгаеныз тодматскон ортчиз Удмурт театрын.

Анна Евсеевалэн та 3-тӥ книгаез луэ ини. Ваньмыз сямен ик соос  Удмурт театрлы но отын ужам но ужась артистъёслы сӥземын. Книгаен тодматскыны лыктӥллям  артистъёс, журналистъёс, библиотекарьёс, культура удысын ужасьёс, Анна Яковлевналэн матысь эшъёсыз но тодмоосыз. Ужрадэз усьтӥз Удмурт театрысь валтӥсь режиссёр Алексей Ложкин. Шуныт кылъёс вераз «Удмурт Кенеш» огазеяськонэн кивалтӥсь Татьяна Ишматова:

— Книга вера театрлэн азьвыл но туннэ вакытысь историез сярысь, котькуд артистэн тодматскыны луэ спектакльёсысь образъёс но туспуктэмъёс пыр. Тӥ, Анна Яковлевна, секыт изэз вырӟытӥды — асьме калык кие Удмурт театр но яратоно артистъёсмы сярысь книга вуттӥды.

Анна Яковлевналэн ужезлы ӟеч дунъет сётӥз Удмуртиысь театр критик Нина Пузанова:

— Шаерысьтымы одӥг театр сярысь но таӵе узыр книга поттэмын ӧвӧл на. Кылсярысь, Сарапулысь драмтеатрлы 100 ар тырмиз ини. Нош со сярысь тамында нокин  ӧз  гожты на.

Анна Яковлевналэн пичи дырыз театрын ортчиз, малы ке шуоно анай-атаез но Вася агаез, солэн кузпалыз Нина Бакишева артистъёс вал. 1993-тӥ арын А. Евсеева ачиз но лыктӥз Удмурт театре — литературая ёзэн кивалтӥсь вал.

Любовь Тихонова

Туспуктэм: «Удмурт театр»

Удмурт Дунне
By Удмурт Дунне Июль 20, 2016 14:00