Салкым книга

Удмурт Дунне
By Удмурт Дунне Июль 22, 2016 15:51
книга

«Тайная история» (1992) маде Вермонтэ колледже дышетскыны вуэм пияш сярысь.

Тросэз критикъёс Донна Тарттэз Америкаысь выль быдӟым писателен нимало. Россиын солэн нимыз тодмо луиз «Щегол» (2013) романэз Пулитцер премия басьтэм бере.

«Щегол» зэм но лыдӟымон книга — быдэ вуон сярысь берло дыре кӧня ке вунэм жанрлэн туала тусыз, выль «Оливер Твист». Романлэн быдӟалаез гинэ но азьло вакытъёсысь романъёс сярысь тодэ вайытэ — али со быдӟа книгаос шер гожъяло ни, нош сюжетэз лыдӟисьлы огминутлы но мӧзмыны уг сёты.

Но мынэсьтым мылкыдме золгес бугыртӥз писательлэн нырысетӥ романэз — «Тайная история» (1992). Со маде Вермонтэ колледже дышетскыны вуэм пияш сярысь. Вашкала грек кылын тунсыкъяськемез герӟа сое 5 студентъёсын, кудъёсыз палэнско мукет дышетскисьёслэсь но дышетӥсьёслэсь. Калленэн-калленэн герой выль эшъёссэ валаны кутске, соослэн лушкем ужъёссы но сямъёссы сярысь тодэ. Но ваньмыз воштӥське, куке студентъёс асьсэлэсь эшсэс виё. «Кин но ма понна вииз?» детектив жанрлы тупан воштӥське лулусьтӥсь мадёнэн — но туала Раскольниковъёслэн ӧпкелёнзы мукет ини.

Америкаысь тодмо писатель Д. Тартт.

Америкаысь тодмо писатель Д. Тартт.

Университет но кампус, студентъёслэн улон-вылонзы — дышетсконзы, ужамзы, юмшанъёссы — син азе пуксё. Валтӥсь героез мон палэсмуртэн ӵошатысал — улонэзлэн одӥг палыз огшоры студентъёс пӧлын ортче, нош мукетыз — вашкала грек кылэз дышетӥсь студентъёс пӧлын. Дышетӥсьёс но шуыны уз луы, шонергес луоз — грек кылын висисьёс, сокем егитъёсты античной вакыт, солэн эстетикаез, йылолъёсыз бордазы кыско. Кӧшкемыт йыружзы но со тунсыкъяськеменызы герӟаськемын. Нош герой-палэсмурт, одӥгаз но дуннеын аслыз инты шедьтыны быгатымтэеныз, оген луонлэсь зӥбетсэ ялан тыбыр вылаз шӧдэ.

Мон понна котькуд книгалэн вань аслаз температураез. Вань пӧсь но кезьыт, шуныт но салкым книгаос. Таиз книга — салкым. Сыӵе салкым луэ университетлэн вуж аудиториосаз, библиотекаосын, музейёсын. Сыӵе салкым луэ, куке вашкалаез, ортчемез сярысь малпаськиськод. Донна Тарттлэн гожъяськон манерез но, кылыз но юзмыталэсэсь. Ошмес ву кадь: пылаты соин ымнырдэ — нырысь кудэ чепыллялоз, нош собере визьмыд сайкыт кариськоз.

Анастасия Шумилова

Удмурт Дунне
By Удмурт Дунне Июль 22, 2016 15:51