Пушказ — ин но музъем

Удмурт Дунне
By Удмурт Дунне Июль 1, 2016 12:50

Пушказ — ин но музъем

Tutchev

Ӟуч кылбурчи Фёдор Тютчев (1803-1873) — мур философ.

Ӟуч кылбурчи Фёдор Тютчев (1803-1873)  — мур философ. Быдэс дуннеез — Инэз но, Музъемез но герӟаса — со ас пушказ возе.

Визьмын гинэ валамон учыръёсты со киын кутылымон, шӧдскымон каре. Вылаз ик, со оске, ӟечсэ утьыны луоз шуыса. Дунневаланэзлэсь сыӵе аспӧртэмлыксэ автор ачиз ик валэктэ, усьтэ кадь «Кылбуран» («Поэзия») кылбураз. Ф. Тютчев шуэ кадь: кылбуран — со задормем инмысь музъем вылэ лыктӥсь ӟеч кужым.

Озьы ачиз кылбур задор кужымлы пӧрме. Макем ваче тупаса кошко ог-огзылы чылкак пумит луись валанъёс, кужымъёс! Макем бадӟым энергия потэ со пумитъяськисьёслэн ваче вуэмысьтызы! Ӟечезлы оскись Кылбурчиез со пырак герӟа Инмын бугыръяськись кужымъёсын.

Василий Ванюшев

Кылбуран

Гудыръянъёс, тылъёс пушкын,
Ӝуась, пӧзись мылкыдъёсын
Ас лул пушказ задормыса,
Инмысь ваське асьме доры,

Музъем вылэ, инбам пыры.
Чагыр ин луд кадь синъёсыз.
Уродъяськись зарезьёсы
Буйган кисьтэ со сузьёсын.

* * *
Марлы тон вӧсяськид, оскид марлы,
Мае утид, тужгес юн дунъяса,
Учыр сётӥз керӟег супыльтонлы,
Лек кыл улэ сализ пальпотыса.

Калык уллё донгаськыса пыриз
Лулад-сюлмад, шокась пуш дуннеяд.
Соку, дыр, тон сокем юн возьдаськид!
Вань чылкытэд юрӟым адскиз тынад.

Уллё вадьсын лобам лул бурдъёсыд
Мед вормозы вылэм ултӥянэз!
Озьы ӧз лу.
Льӧль бурд сое ӧз вормы…
Ӧз…

* * *
Ӝыт пеймыт, зоро-кото…
Мар куара та?
Тюрагай?!
Тон-а со, ӵукна куно?
Та вакыт?
Акшан ук ай!
Жингырес инбам гурен
Пеймытэз куалектытӥд.
Шузимем мурт серектӥз кадь.
Вань лулме мыддоринтӥз!..

Нева вылын
Кизили нош ик шудэ
Невалэн вогырияз,
Яратон нош ик оске
Ас пыжзэ солэн вылаз.

Вогыри но кизили
Вискытӥ со пыж уя.
Кык пӧртэм вужер отӥ
Шып гылӟе бызись вуя.

Нылпиос-а со озьы
Уй дырзэс вакчиято?
Кинлэн ке-а уртъёссы
Мукет дуннее выжо?

Тон, зарезь кадь ик вӧлмыт,
Невалэн вогыриез!
Возь пушкад шараятэк
Та пыжлэсь тодмантэмзэ.

* * *
Тон сёт, Инмар, шумпотондэ
Пӧсь гужеме ёрмем муртлы,
Кураськисьёс сямен мырдэм
Садъёс вӧзтӥ вамышъясьлы!

Со мурт учке кенер пыртӥ:
Писпу вужер, сяська гырлы,
Небыт салкым, капчи ыр тӧл
Солы ӧвӧл — мукетъёслы.

Солы ӧвӧл уясь пилем,
Арамалэн тусыз-буез.
Солы ӧвӧл ӵын пыр выллем
Фонтан вулэн пызйиськемез.

Зарезь дурысь вужеро грот
Юнме кыске учкемъёссэ.
Тузон выллем ву пырыос
Йырзэ уз коттылэ солэсь.

Тон сёт, Инмар, шумпотондэ
Улон сюрес кузяз быдтыр,
Кураськисёс сямен кыштыр
Шумпотонтэк ортчись муртлы!

Фёдор Тютчев

Удмурт Дунне
By Удмурт Дунне Июль 1, 2016 12:50