Пудолы гидын ёркыт

Удмурт Дунне
By Удмурт Дунне Июль 20, 2016 16:31
Пудо тэлеӟе возь вылын.

Пудо тэлеӟе возь вылын.

Сӥльлы вузан вылысь ошпи басьтыны малпасько. Маин но кызьы сюдоно сое, ӝоггес мед будоз шуыса?

Ольга П.

Можга ёрос

Сӥльлы ошпиез гинэ уг будэто. Ветыл но туж ческыт но быгыт луэ. Огзэ тодэ: улошо карымтэ ошпи ӝоггес будэ. Кылсярысь, аресъем ошлэн секталаез 15-20 килограммлы секытгес, улошоямезлэн сярысь. Одӥг но ӝыны аръемез 20-30 килограммлы секытгес луэ. Со дыре ик улошо карымтэ ошпилы 10 процентлы ичигес сиён кулэ, сӥльыз но ческыт, быгыт луэ.

Тросэз юало: улошо кароно я ӧвӧл? 1-3 толэзь дыръяз ошпиез улошояды ке, быгытыз люкаськемысь дугдоз, пудо зол куаёз, озьыен, сӥльыз ӧжыт луоз. Сиён но солы уногес кошкоз. Нош 6-12 толэзь дыръяз улошо кариды ке, лыосыз но юнмаса вуозы, быгытъёсыз но кылдозы.

Шонер но ческыт сюдон бордын возиське кунянлэн ӝог будонэз. Пудо живот уг висьы ке, арес тырмытозяз, секталаез 7-8 поллы уногес луыны кулэ, вордскыкуз сярысь. Нош 18 толэзяз — 11-12 поллы секытгес. Ошпидэс сӥзьыл вузаны малпаськоды ке, возь вылысь пыртэмды бере сое зол сюдоно. Гидын пудолы быдэс тол ӵоже инты вань ке, сое гужем гинэ вузаны малпаськоды ке, соку сӥзьыл бакча сиён сётъяны яралоз. Сыӵе дыръя пудолы уй-нунал куспын 400-500 граммлы сяна будыны сётоно ӧвӧл. Секталазэ люканы кулэ со гужем возь вылысен.

Вордӥськем кунянлы нырысь кык толэзь ӵоже одно ик люктано йӧл. Бадӟым кужымзы ӝукъёслэн. Одно ик сиёнэн ӵош сётъяно протеинэн узыр комбикорм. Со дыре ик кунянэз дышетоно турынлы, 4-6 толэзяз со турын сиыны кулэ ни. Огзэ тодэ: ӝушез но сюлыз ляб ужало на, соин ик шуак но трос сиськыны шедьтӥз ке, шугомоз. Таин валче пудоез ӵемгес но ӧжытэн сюдэ. Кӧтыз медаз сӧриськы шуыса, аптекаысь басьтыса, пробиотикъёс сётъяно.

Ошпидэс 700 килограммозь ӝог будэтэмды  потэ ке, сюдоно нуналаз 3 пол: 6 час котырын, 14 часын но 22 часын. Сюдон азьын котьку тазатоно кыедзэ. Музэ усем сиён медаз саптаськы. Пудоез ӝог будэтэ фураж. 2-3 толэзьем кунянлы уй-нунал ӵоже 0,5-0,6 килограмм тырме. 6 толэзь тырмытозяз, 3-3,5 килограмм фураж сётъяно, аресаз — 6-9 килограмм. Тазьы сюдыса, арес тырмытозяз, 320-400 килограмм луоз ни. Тужгес пайдаё луоз, йыдылэсь но чабейлэсь изэм фуражез, огмындаен сураса, сётъяды ке.

Вандэмлэсь 2-3 толэзь азьвыл пудоез рос-прос сюдон но кыре поттан борды басьтӥськоно. Жалятэк сётъяно турын, бакча сиён, жом (гордкушманлэн кылем мылемъёсыз, вузасько брикетэн). Берлояз туж трос калиез но кальциез, кислотаосыз. Уй-нунал ӵоже 100 граммен сётъяно кормовой кӧй, фосфорлэсь лэсьтэм олокыӵе но добавкаос, яралоз лылэсь изэм пызь но. Одно ик сиён пӧлаз 50 грамм сылал пызьнано. Туж пайдаё луэ патока но аракы пукем пыды. Берлозэ сётъяно, куроен суралтыса. Сенаж шедьтыны быгатӥськоды ке, турын интые сое сюдэ. Сенажын уго минерал веществоосыз уногес.

Кин но со оскиське силослы. Таиз пайдаё луэ, 100 килограмм животлы 5-7 килограммен сётъяса. Но силосын ӧжыт сакырез, протеинэз, фосфорез. Соин ик умойгес луоз, кушман, мочевина  но сакыр 50 граммен сётъяса. Собере, учконо на, кыӵе ӟечлыкез силослэн. Чырс силос пудолэсь ӝушсэ сӧроз гинэ.

Кунянэз одно ик инкуазе поттано. Ю-нянь, кӧжы бервылъёсы пыртады ке, эшшо умой. Вож турын ачиз ишкыса мед сиёз. Зэм, шуак возь вылэ но лэзьыны уг яра. 5-7 нунал ӵоже вож турынлы дышетоно, кӧня ке часэн поттаса. Сиёнэз шуак воштӥськиз ке, кӧтыз сӧриськоз, соку кематэк уз катьяськы. Соин ик нырысьсэ вож турын сётыкуды, уй-нунал куспын со 12-15 килограммлэсь трос луыны кулэ ӧвӧл.  Отӥяз 70 килограмм сётыса но яралоз. Куазь сётыку, животэз 15-16 час возь вылын возьыны тыршоно. Артэ одно ик луыны кулэ ву но вужер.

Каллен будэ шуыса, адӟиськоды ке, кӧлъёслэсь эмъюм сётэ, витаминъёс басьтэ. Таза животлэн тодметъёсыз: гадьыз паськыт, лыосыз юнэсь, гонэз чиля но уг усьы.

Удмурт Дунне
By Удмурт Дунне Июль 20, 2016 16:31