Татьяна Ишатова: Пилемъёс пӧртэм, шундымы одӥг

Удмурт Дунне
By Удмурт Дунне Июль 6, 2016 08:50

 

061086,Ишматова Татьяна,заместитель министра национальной политики

Татьяна ИШМАТОВА, «Удмурт Кенеш» огазеяськонлэн тӧроез

Конгресс ортчиз, но солэн ужез ӧз йылпумъяськы на — огъя  резолюция юнматэмын ке но, ӵектонъёс кутӥсько на сӥзьылозь. 

Соку ик пусйыны кулэ, конгресс — со фестиваль ӧвӧл, со тужгес сюлэмшугъяськытӥсь ужпумъёсъя ӧтчам. Мон нырысетӥ конгрессэ уг пыриськиськы ни, соин вераны быгатӥсько, макем будэ та ужрадлэн кужымез. Кылсярысь, 4 ар талэсь азьвыл  Венгриын ортчем конгрессын трос вал отчёт выллем вераськонъёс:  кин мар лэсьтӥз. Ваньмыз со туж умой — одно ик лэсьтоно, но  котькуд уженыд ушъяськыса улӥд ке, азинлыкез уд адӟы. Соин таизлы ужрадлы дасяськыку, ӝот-ӝот верамын вал: дэмен утчано тужгес висьытӥсь юанъёслы валэктонъёс, соосты сэрттон-пертчон амалъёс. Соин мыным туж кельшиз, кызьы радъяськиз секциослэн ужзы: одӥг бадӟым доклад, собере комментарийёс но юан-веранъёс. Жаль, ваньзэ кылзыны нокызьы уг луы: секциос огдыре пӧртэм интыосын мынӥзы.

Шумпотымон, милям пичи делегациямы 3 профессоръёс вал: Н. Стрелков,               Н. Кондратьева, А. Загребин, ваньзы соос докладъёсын  вераськизы, ӝутӥзы зэмзэ но туж висьытӥсь ужпумъёсты: дышетон, тазалыкез утён, калыклэн властен кусыпъёсыз.

Азьвылъёсаз конгрессъёсын кунгожсьӧръёс трос пыкылӥзы Россиез: милям ваньмыз умой, тӥ зӥбемын. Бен, милям трос сюлмаськонъёсмы, но озьы шуыны нокызьы уг луы — туала вакытэ калык быгатэ ни ассэ гажаны. Нош шугъяськонъёссы вань ваньмызлэн — туэ тани, паймоно кадь, асьсэлэсь пӧськыоссэс усьтӥзы кунгож сьӧрын улӥсь ӵыжы-выжыосмы но — сое шумпотыса уг вераськы, дунъяса — озьы уго вераськон зэмлыкогес пӧрме. Кызьы пусйиз удмурт тодосчи Алексей Загребин, конгресс — со калык дипломатилэн институтэз, татын, ваче син вераськыса, кылдо кыӵе ке выль малпанъёс, сюро сыӵе амалъёс, кудъёсыз ӧвӧл гожтэмын нокытын.

Мар ӧз тырмы? Чик ӧм тодматске Финляндиысь огшоры калыкен, татысь улон-вылонэн. Талы пумит фин эшъёсмы шуизы: милем номыр возьматыны, ваньмыз тани таӵе, огшоры — Европалэн стандартъёсызъя. Тӥляд со  али ке но вань зэмос гуртъёсты, кытын вашкала дырысен утисько сям-йылолъёс, сиён-юонъёс. Сыӵе кылъёс бере шаеренымы данъяськон мылкыд кылдэ, соин валче сюлмаськон но — утёно улэп узырлыкмес — удмурт гуртэз!

Удмурт Дунне
By Удмурт Дунне Июль 6, 2016 08:50