Оскон: Кык бурдъёс вылын

Удмурт Дунне
By Удмурт Дунне Июль 11, 2016 13:00

 шкляев11-тӥ июлёзь кыстӥське Пётр но Павел апостолъёслы сӥзем кӧсутён, нош ӵуказеяз, 12-тӥ пӧсьтолэзе, асьмеос сӥлы кариськомы та святойёсты, пусйиськомы Петролэз.

 Чорыг лым яке коллё ву

Пётр но Павел апостолъёслы сӥзем визьдыр сиськон ласянь гинэ сокем чурыт ӧвӧл, нош вань мукет куронъёсты таяз но кӧсутёнэ сак чакланы кулэ. Ар ӵоже пӧртэм визян вакытъёс луо, соос юртто асьмелы сьӧлыкъёслы ляльчи луонлэсь утиськыны-мозмытӥськыны. Тодӥсь адямиос шуиллям: луллы вылӥегес ӝутскыны юртто кык бурдъёс — визьдыр но молитва. Иисус Христос возьматӥз ас вылаз, кызьы 40 нунал кӧсутьыны луэ. Бӧрысь солэн дышетскисьёсыз, тужгес но Пётр но Павел апостолъёс,  дышетӥзы христианъёсты лулзэс чылкытатыны но Инмарлы матэгес луыны. Лул-сюлэм бордын трос ужаны кулэ. Дун-чылкыт Павел ӵемысь шуылӥз: улонлы   шумпотыны луэ ёрмыку но, узырлык пӧлын пыласькыку но, шуг-секытъёс ӧвӧл дыръя но, сюлмаськонъёс зӥбыку но. Со гожъяз, улон — со Христос. Нош кулон? Апостол тодэ вал, адямилэн лулыз мугорыныз ӵош уг кулы шуыса. Кулон — со Инмарлэн дуннеяз, Ин Эксэйлыке выжон сюрес гинэ, адями Инмарен валче но Иисус Христослэсь курон-косонъёссэ чакласа улэ ке.

20-тӥ даурын юн осконзэс но кужмо лул-сюлэмзэс ӧз ыштэ Инмарлы зэмос оскисьёс. Кылсярысь, Соловки лагере келямъёс пӧлын вал баӵкоос но. Соос векчи чорыген кизер шыдэз шумпотыса ӟузьылӥзы но Инмарлы тау карыны ӧз вунэтылэ та лым понна. Озьы, кӧтсы тырыса, султылӥзы ӝӧк сьӧрысь. Нош йыртэмасьёс, та сиёнэз адӟыса, вожпотонзэс кутыны ӧз вормылэ: нош ик коллё ву! Соин ик сиськыса но кӧт сюманзы ӧз бырылы. Тау карыны но мар вань сое дунъяны быгатӥсьтэм адями котькыӵе вакытъёсы но учыръёсы курадӟоно луэ. Архиепископ Иларион гожъяз: Соловки — чиданы, визяны но вӧсяськыны зэмос школа.

Инмарлы осконлэн но сюлмысь вӧсяськонлэн бадӟым кужымез сярысь калыклы вералляз Иоанн Креститель но. Та святойлэсь нуналзэ христиан калык пусйиз толон, 7-тӥ пӧсьтолэзе. Иоанн Креститель  Дун-чылкыт Мария Нылмуртэн ӵош котькинлэсь но матын сыло Ин Эксэйлыкын  Инмарлэн престолэзлы. Музъем вылын улыкузы, соос нылпи вайыны быгатӥсьтэм арлыдо анай-атайлэсь вордскизы. Инмар сыӵе шуд кузьмаз шонер улӥсь семьяослы, соос калыклэсь чеберлыксэ, визьзэ, чылкыт лул-сюлэмзэ возьматӥсь адямиос луизы. Кылсярысь, Вуж Сӥзён вакытэ святой Авраамлэн Исаак пиез вордӥськиз, шонер улӥсь Анналэн — Самуилэз (азьланяз со Израильлэн берпуметӥ судьяез но тодмо пророк луиз). Выль Сӥзён  вакытэ Дун-чылкыт Елизавета но Захария кузпалъёслэн вордӥськиз Иоанн пизы, ӵапак со пылатӥз Иисус Христосэз Иордан шурын, нош арлыдо Иоакимлэн но Анналэн  — Мария нылзы, со дуннелы кузьмаз Утисьмес, Инмар Пиез.

Святая-Ольга-13

Дун-чылкыт Владимир но Ольга.

700-лэсь уно обросъёс

Пӧсьтолэзе асьмеос сӥлы кариськом Инмар Анайлэсь уно обросъёссэ. Данъяса но юрттэт курыса, вазиськиськом Богородицалэн Владимирской, Тихвинской, Казанской, Боголюбской иконаосызлы но «Троеручица» обросэзлы. Тросэз адямиос  уг валало, малы сокем сћлы каронэз та иконаосты? Соос яратыса утё, дунъяло, ӵем учкыло но адӟиськись интыын возё сюлэмзылы дуно луись адямиоссылэсь, ӵыжы-выжыоссылэсь туспуктэмъёссэс. Оскись калык ӵапак озьы ик тодаз возе, вӧсяське но, юрттэт курыса, вазиське Инмар Анайлы, вань адямиослэн Анайзылы. Дуннелы Дун-Чылкыт Мария Нылмуртлэн 700-лэсь уно чудотворной обросъёсыз тодмо. Соос пӧлын  ик «Троеручица» нимаськисез но. Та обросын Инмар Анай куинь киё возьматэмын. Икона тодмо луиз преподобной Иоанн Дамаскинэн валче.  Та адями вашкала дауръёсы улӥз Сирилэн шоркараз — Дамаскын. Богослов но  христиан философ Иоанн туж сӥлы карылӥз вашкала обросъёсты, трос гожъяз соосты утён сярысь. Уноезлы  солэн таӵе ужез ӧз кельшы. Пиосмуртэ юнме шорысь янгыше уськытӥзы. Со вакытэ кивалтӥсь эксэй косӥз Иоаннлэсь кизэ ӵогыны но мукетъёссэ кышкатон понна кизэ адскымон интые ошыны. Огшап дыр ортчыса, Иоанн Дамаскинлы берыктӥзы ӵогем кизэ. Пиосмурт Инмар Анайлэн обросэз азьын сюлмысь вӧсяськыны кутскиз, Иисус Христосэз вордэм Нылмурт кизэ мед бурмытоз шуыса. Умме усемез бере преподобной Иоаннлэн уйвӧтаз  ӟеч иворен вуиз Инмар Анай. Киыд йӧнамын, табере со мед юрттоз тыныд Иисус Христосэз данъяны, шуиз.  Тросэз ӵапак та оброс азьын вӧсясько, черлам ӵыжы-выжыоссылы бурмон курыса. Молитваосын вазисько, киоссы-пыдъёссы, синъёссы мед йӧналозы, Инмар Анай семьязэс, юртъерзэс мед утёз шуыса.

Шундылэн зэмлыкез — Христос

24-тӥ пӧсьтолэзе буре вайиськом  православной княгиняез, Дун-чылкыт Ольгаез, нош 28-тӥ июле сӥлы кариськом солэсь внуксэ Владимир князез. Ӵапак Владимир Святославович  кивалтыку, 10-тӥ даурлэн пумаз, Вашкала Русьын христианство кун осконлы пӧрмиз. Со ачиз пылатӥськиз, 12 пиоссэ, ӵыжы-выжыоссэ чукындырытӥз, язычество вӧсьлэн сульдэръёсыз интые черкъёс ӝутыны косӥз. Историкъёс князез Владимир Великий нимазы, черк — Дун-чылкыт Владимирен, нош калык сое Горд Шунды шуиз. Со вакытысен зэмзэ но асьме странаямы ӝужаз зэмлыклэн шундыез — Христос. Малы шундыпуксён палан улӥсьёс Россиез уг валало? Соос сюресъёссэс майталаса мисько, нош лулзэс чылкытатон, Инмар азьын ӧпкелён сярысь уг малпасько, вунэтӥзы ини Иисус Христослэсь вань курон-косонъёссэ. Соин ик уг валало сюлмазы Инмарлы осконэн улӥсь адямиосты.

Пусйыны кулэ: огез тужгес гажамонэз святой Сергий Радонежский ас вакытаз трос лэсьтӥз Россиысь музъемъёс, калыкъёс мед огазеяськозы шуыса. Туннэ но асьме странаын со выллем ик воштӥськонъёс мыно. Кышкыт 1990-тӥ аръёсысь, куке котькудӥз сюлмаськиз ачиз сярысь гинэ, выжиськомы «Вунонтэм полклэн» вакытаз, куке Россиын улӥсьёс огъя калыклы пӧрмыны кутскизы.

Шумпотыса вераны кулэ, Дун-чылкыт  но равноапостольной Ольгалы но Владимирлы сӥзьыса, Ижын пуктыны чакламын храм. Ар ӵоже ини котькуд арнянуналэ  Дэри ёросысь Вараксиноын, кытын чакламын ӝутыны черкез, та святойёслы акафист лыдӟе баӵко, протоиерей Константин Абрамайтис. Дун-чылкыт Владимирез буре вайыса ик,  28-тӥ июле Серафим Саровскийлы сӥзем черклэн улӥысь храмаз туэ нырысьсэ служба ортчоз.

Туннэ нуналлы шоркарамы черкъёслэн лыдзы 4 поллы тросгес ини, революцилэсь азьло вакытэн ӵошатыса, нош калыкмы йылӥз  6 поллы. Но ваньмыз та лыдпусъёс, нош Инмар возьма асьмелэсь зэмлыко оскеммес. Храмъёс вӧсяськон инты но молитвалэн коркаез луыны кулэ, соос медаз пӧрме вал «черк супермаркетъёслы». Та пумысен ас вакытаз туж шонер гожтӥз  архиепископ Иоанн Златоуст. Со шуиз вал, мар пайдаез зарнияськем черкъёс ӝутыса, адями матысьёссэ жаляны (ёрмись муртлы юрттыны,  ӝоже уськытэмзэ  буйгатыны) уг ке быгаты. Мар толыкез зарни чаша лэсьтыса, отчы дун ву ке уд понӥськы. Маин сое ӵошатыны луоно? Шуом, пумитад кемалась сиськымтэ адямиез, нош тон солы шыд ӵектэм интые ӝќк вылэз тырмытод азвесь  но буш посудаен. Со адями шумпотоз-а, ӝожомоз-а? Озьы ик Христос но.

 

 

Удмурт Дунне
By Удмурт Дунне Июль 11, 2016 13:00