Нылкышно шӧмо мадёсъёс

Удмурт Дунне
By Удмурт Дунне Июль 20, 2016 13:35

ганькова«Удмуртия» издательствоын потӥз Любовь Ганьковалэн «Малпанъёсам уло аръёс» книгаез.                                                

Алнаш ёросысь Любовь Ганькова — паськыт лул-сюлэмо но лэчыт визьмо кышномурт. Лад-лад арлыдаз вуэмез бере ини солэн шӧдон-валанэн но быгатонлыкен тырмытэм пуштросо шыкысэз усьтӥськиз. Табере Любовь Леонидовна — дасо пала книгаослэн авторзы. Солэн пӧртэм жанръёсын гожтэм произведениосаз син шоры пуксе улон-вылонэз ӟеч-ӟеч адӟем адями.

Та верамез уката яркыт возьматэ «Малпанъёсам уло аръёс» книгаез. Татчы кылбуръёс, веросъёс-мадёсъёс, визькылъёс но такмакъёс пыртэмын. Кылбуръёсын нылкышнолы гинэ тупась мылкыдъёс но малпанъёс суредамын: лирической героиня, одӥг ласянь, котькуд югдурез сюлэм пыртӥз сӥсъяса кадь поттэ но та пумысен туж сюлэмшугъяське. Мукет ласянь, со вань сюлмысьтыз синмаськыны, вожаны но яратыны быгатэ. Оглом учкыса, вань шуг-секытъёсты чида но чигиськыны уг сётӥськы.

Веросъёс сярысь ке, соос туж матын мадёсъёслы, котькудӥз, улонысь кыӵе ке учыр яке югдур вылэ пыкиськыса, гожтэмын. Мукет сямен вераса, лад-лад мадемын. Соин ик туж оскымон но валамон пӧрмемын. Соос пӧлын тунсыко луэменыз нимысьтыз висъяське «Сьӧлыктэм Анна» произведение. Ачиз автор гожтэ: «Та мадён — вашкала воршуд выжымылэн Анна вӧсез сярысь. Учыръёс но адями нимъёс, лыдпусъёс гожтэмын Кузон кар архивысь басьтэм ревизской сказкаосъя (перепись), вашкала пересьёслэн верамзыя но аслам омырвӧтысьтым малпанъёсыя».

Книгае пыртэм визькылъёс пыр удмурт калыкмылэн котьмае синйылтыны тыршемез но малпаськыны быгатэмез адӟиське. Со визькылъёс дауръёсын-дауръёсын люкамын но улон радлыклэсь тодметъёссэ возьмато. Такмакъёс сярысь ке, асьмеос туж усто валаськом: та улонын сюлэмшуген артэ шумпотон ветлэ, сьӧд уй бере одно ик югыт нунал вордӥське, нош синкылиос пӧртэмесь луо: кайгулэсь но чуръясько соос, шудон-шоккетонлэсь но быльырало.

Сергей Матвеев,

«Удмуртия» издательствоысь редактор       

 

 

Удмурт Дунне
By Удмурт Дунне Июль 20, 2016 13:35