Малы огез тушо, мукетыз сюро?

Удмурт Дунне
By Удмурт Дунне Июль 21, 2016 14:22

Кызьы будэтоно вольыт, таза ӵужкушман но гордкушман 

Ӵужкушманэз но гордкушманэз будэто вань сад-бакча возисьёс. Но малы куддыр ӵужкушман «сюро» луэ? Малы гордкушман чурыт, сьӧд виштыосын будэ? Та но мукет юанъёслы валэктон  шедьтыны юрттэ Ижысь гурт хозяйствоя академиысь емыш будэтонъя кафедраен кивалтӥсь, гурт хозяйство наукаосъя кандидат Андрей Швецов.

047426,сельское хозяйство,уборка,урожай,морковь

Ӵушкушманэз ӵем но ӧжытэн кисьтаськод ке, емыш тушо луэ, кырыж будэ.

 Ву шедьтэ ачиз

Кыӵе будос меда уг яраты утялтэмез? Пӧртэм ӧвӧл ӵужкушман но. Нырысь ик, гужем ӵоже убоосты ӧжытсэ 4-5 пол небӟытоно. Нырысьсэ но берлозэ — 4-8 сантиметр мурдалае, висказ — 10-12 сантиметр мурдалае. Но бугыръяськоно зор бере яке ву кисьтам бере. Укыр ӵем киземын ке — мултэсъёссэ удъёсты ишкано, висказы 3-5 сантиметр кельтыса.

Убо вылэ гужем ӵоже 2-3 пол гинэ ву кисьтано. Зэм, гужем кӧс ке — ӵемгес. Но кисьтано пуж-пуж — котькуд квадрат метрлы 20-30 литр. Ӵемгес но ӧжытэн кисьтаськод ке, будосъёс тушо луыны, кырыжесь будыны кутско. Нош ву укыр трос луэ ке, ӵужкушман ӝог будыны ӧдъя но туж чурыт луэ — пудо-живот, курег сюдыны гинэ ке шат яралоз на. Ӵужкушман нуйтӥське ни ке, куд-ог сад-бакча возисьёс сое кисьтамысь воксё дугдо. Озьы, пе, будосъёс, ву утчаса, уллань кошко.

Бычыраны кутскемез бере ик ӵужкушман кулэяськыны ӧдъя удобрениослы. Но убо вылэ выль кыед ватсаны, будосъёсты кыед вуэн кисьтаны ӧй дэмласал — отын трос азотэз. Нош азот мултэс луэ ке, ӵужкушман пушкы нитратъёс люкаськыны кутско.

Туж иназ луоз кема кыллем кыед, сое ватсано тулыс убо вылэ. Музъем урод ке, гужем ӵоже  котькуд квадрат метрлы 4 килограммозь компост тыроно, ватсано минерал сылалъёс: 20-25 грамм аммиак селитра, 30 грамм суперфосфат но 35 грамм хлористой калий. Таосты кисьтано, котькудзэ 10 литр вуэн суралтыса, 1 ведра ву — 1 квадрат метрлы.

Ӵужкушманлэн одӥгез тушмонэз — векчи кут. Соин ик сое ялан одӥг интые кизьыны уг яра, вӧзаз сугон будӥз ке — туж умой. Векчи кутъёсты озьы ик кышкатоз «Децис» сурет. Ӵужкушман трос будэтӥськоды ке, соин пазянлэн уродэз уз луы.

Эшшо ӵужкушман югытэз яратэ, жаг турын пӧлы кыле яке укыр ӵем мерттэмын ке, уг удалты. Музъем улысь вуос 60-80 сантиметрлэсь матын ке, та будослы со уг кельшы ни. Туж умой будэ, 20-22 градус луэ ке.

Утялтоно ӵужкушманэз сентябрь пумын яке октябрь кутсконын кӧс куазен. Куаръёссэ киын ишкано — пуртэн вандыку, будосэз вӧсь карыны кема ӧвӧл, тол вылтӥ со сисьмыны быгатоз. Тодын возёно: ӵужкушман уката зол будэ берло толэзяз.

 Чырслэсь кепыра

Гордкушман вань корнеплодъёс пӧлысь тужгес яратэ югытэз, шунытэз. Соин ик сое саюлъёсы мерттэмлэн пайдаез уг луы. Ӵужкушман сямен ик, со аслыз юон музъемысь шедьтыны быгатэ.  Кӧс гужем, 2-3 пол ву кисьтаса, тырмоз — котькуд квадрат метрлы — 20-35 литр. Киземез шератыны кулэ, но эсэпсэ валаса. Угось эркын будыса, соос укыр бадӟымесь луо, ческытсэс ышто. Соин ик нырысь висказы 3-4 сантиметр гинэ кельтоно. Кизем бере ог 50-60 нунал ортчыса, гордкушман быгыльске ни, пӧраськыны ярамон луэ. Соин ик сое нош ик шератыны луоз, будосъёс вискы  5-8 сантиметр кельтыса.

Гордкушман туж уг яраты чырсэз: уг быгыльскы, куаръёсыз гордалэсэсь луо. Соин ик  убозэ сӥзьылысен ик дасяно, чырс музъеме известь яке доломит пызь пазьгыса. Туж умой луоз, кема кыллем кыед ватсаса. Будыны кутскыкуз, гордкушманлы трос кулэ азот, собере — калий, быгыльскемез бере ни — фосфор. Музъемды урод ке, та микроэлементъёсты черодэн ватсано, азотэз но фосфорез котькуд квадрат метрлы — 6-9 грамм,  калиез — 9-12 грамм.

Гордкушман озьы ик туж шумпотоз пеньлы, мукет удобрение уд ни тыриське ке, со котькуд квадрат метрлы 100-120 грамм кулэ луоз.

Гордкушманэз утялтоно сентябрь шорын кӧс куазен. Туж чакласьконо: кӧмез вӧсь луыны медаз сюры — отчы шедёзы микробъёс, емыш сисьмыны кутскоз. Куаръёссэ, ӵужкушманлэсь сямен ик, киын ишкано.

Элина Кумачёва

Туспуктӥз А. Горбунов

 

 

 

 

 

 

Удмурт Дунне
By Удмурт Дунне Июль 21, 2016 14:22