Кытын возёно пудо сиёнэз

Удмурт Дунне
By Удмурт Дунне Июль 21, 2016 11:22
091012,сено,заготовка сена

Турын медаз перелӟы шуыса, сое пирамида кадь вырйыло-вырйыло тыроно. Тужгес ӟеч турынэз шораз интыяно.

Тӧлам турын — тырттэм

Пудо животлы таза луон но чебер будон понна кулэ трос пумо сиён. Огъёсыз кужым сёто, быгытсэ юнмато, мукетъёсыз йӧлзэ будэто, наплыксэ йылто. Кытын но кызьы ваньзэ утёно?

Сиён чебер но чылкыт луыны кулэ. Сисьмыны кутскем, пурысьтам, пыкмем, кырсь но кынмылэм сиёнэз пудолы сётъяны уг яра. Талэсь кӧтсы но ӝушсы сӧриськыны быгатоз, лябӟем пудо котыре отӥяз олокыӵе но чер кутскоз.

Гужем ӵапак дырыз пудоез вож турынэн сюдыны. Витаминъёсыз но лачак, ӝушлы но капчи, сӥль-вир но будэ. Соин ик тыршоно пудоез возь вылын кемагес возьыны. Гидын улӥсезлы — турнаса пыртаны.

Тодосчиос чакламъя, толлы дасяно соку гинэ сяськаяськыны кутскем турынэз. Сяськаян вакытаз погыртэм турынын тужгес трос витаминъёсыз. Соос медаз тӧлӟе шуыса, турынэз ӝог турнано но ӝог куасьтоно. Куаръёсыз куашканы кутско ке, сыӵе турынлэн пайдаез ӧвӧл ни.

Соин ик турнам турын зӧк ке, сэзъяно, векчи валёно, берыкъяно. Куасьмем кадь луиз ке, чуръяно но озьы 1-2 нунал ӵоже куасьтоно. Собере бӧмъяно. Тазьы эшшо 2-3 нунал куасьтоно. Кырмыку ӵаштыртэ, тарс карыса тӥяське ке, турынэз лапас улэ пыртыны луэ, сылалэн пызьнаса. 1 тонна турынлы 6-7 килограмм сылал кулэ. Озьы турын умойгес утиське. Турын медаз перелӟы шуыса, сое пирамида кадь вырйыло-вырйыло тыроно. Тужгес ӟеч турынэз шораз интыяно. Котыр ласянь ӵоксано сое кылем-мылем турынэн. Таиз уте тӧламлэсь, мускытлэсь, кезьытлэсь.

Турынэн ӵошатыса, куроын витаминъёсыз ик ӧвӧл, углеводъёсыз сяна. Соин но пудолэн азяз мукет сиёнэз понӥды ке, куро шоры уз ик учкы. Но мукет сиёнъёс вӧзы со но кулэ. Тужгес но — пызен суралтыса. Пудо куроез ческытэн сиёз, аракы пукем бервылэн сурады ке. Пыкмыса но сисьмыса медаз улы шуыса, куро тюкъёс котэсьгес ке, сэрттоно. Кӧс ке, дырын-дырын тӧлатыны вунэтоно ӧвӧл.

Ю-нянь, кӧжы умой куасьмемын ке, кӧня ке ар ӵоже сисьмонлы уз сётӥськы.   Но кеносэ кисьтон азьын бекчеосты, вышкыосты умой тазатоно. Интыысьтызы вырӟытыны луэ ке, быректэм вуэн пальк-

коно, шунды шорын куасьтоно — вань микробъёсыз но тэйёсыз мед бырозы. Луэ ке, борддоръёссэс ӵынатоно. Собере гинэ отчы ю кисьтыны яра. Вышкыос 3,5-5 метрлэсь ӝужыт медаз луэ. Кин но со тысез мешокъёсын возе. Но тазьы, чылкыт но кӧс омыр тырмыт сюрытэк, со пурысьтаны быгатоз. Пурысьтам но пыкмем зын потэ ке, сыӵе тысен сюдэм пудо тордыны быгатоз. Ю, кӧжы пушкын 20 градуслэсь пӧсь медаз лу.

Етӥн кыдын (жмых) туж трос В витаминэз. Таин сюдыса, пудо ӝоггес будэ, йӧлэз йылэ. Но етӥн кыдын вӧйёсыз но вань бере, 3-5 толэзь ӵоже сяна сое эн уте. Отӥяз уродмыны быгатоз. Котыраз кӧс медло, тӧл азьын возёно.

Кешырын, кушманын туж трос вуэз, куайыны юрттӥсь веществоосыз ӧжыт. Соин таосты кожаз ноку уг яра сётыны — пудо ӟызыялоз. Бакча сиёнъёсты толлы кельтэмды потэ ке, пеймыт азе интыялэ, 0-2 градус медло. Гуды ӧвӧл ке, музъемез 30 сантиметр гудӟе. Отчы сиёнэз соге. Вылтӥз одно ик куроен, сюен шобыртэ. Куро интые пул пызь но яралоз. Котыраз канава копады ке, со бакча сиён доры ву пыронлэсь утёз.

Тужгес бадӟым пайдаез картошкалэн. Пудоез куайытыны малпасьёслы ӵапак тае уногес сётъяно. Пӧзьтыса но, гырезен юдыса но яралоз. Удамын гинэ медаз лу — удын ядэз трос. Озьы ик умой луо кабачок, тыква.

«Берекет»

Туспуктӥз А. Горбунов

 

Удмурт Дунне
By Удмурт Дунне Июль 21, 2016 11:22