Кыллэн кужымезлы оскылӥзы. Удмурт драматургилэн кылдэмез

Удмурт Дунне
By Удмурт Дунне Июль 23, 2016 12:31

арекеева1920-тӥ-1930-тӥ аръёс — удмурт драматургилэн кылдон, огдыре ик тужгес но яркыт азинскон вакытэз. 

Та аръёсы писательёс творческой кужымзэс пӧртэм удысъёсын — прозаын но, кылбуретын но, драматургиын но — эскеризы. Соос ӟеч валазы: драма тужгес но тупа калыкен лэчыт ужпумъёс сярысь вераськыны. Пьесая пуктэм спектакль зэмос улонлы кельше ук: улэп геройёс син азьын куспазы верасько, ваче пумит вуо, ӝоже усё но мукет. Со туж оскытӥсь югдур. Озьыен, драма — со лыдӟисен-учкисен ваче вераськон, солэсь сямъёссэ воштон-умоятон понна, турлы лэчыт юанъёсты ӝутон-эскерон понна тужгес но умоез, пайдаё луись амал. Удмуртъёс, пе, та вакытэ туж мыло-кыдо учкылӥзы спектакльёсты, ог 15-20 иськеме но пыдын мынозы вылэм со понна.

Туннэ нуналлы тодмо ог 60 пьеса, кудъёсыз кылдытэмын вал 20-тӥ-30-тӥ аръёс вискын. Соослэн авторъёссы: Мария Баженова (Льӧм Маня), Григорий Верещагин, Макар Волков, Ефим Ефремов, Алексей Жомбин (Жомбо Очей), Дмитрий Корепанов (Кедра Митрей), Даниил Майоров, Иван Михеев, Прокопий Соколов, Александр Сугатов, Михаил Тимашев, Кузьма Чайников (Кузебай Герд), Константин Яковлев но мукетъёсыз. Тросэз та нимъёс туала лыдӟись понна тодмотэмесь. Куд-огез 1-2 пьеса гинэ гожтӥзы, мукетъёсыз — быдэн 5-6 пьеса. Тунсыкоесь-а соос туала лыдӟись но учкись понна? Луысал-а туннэ соос пӧлысь кудзэ ке но сцена вылын возьматыны? Малпасько, шуггес ик луысал, малы ке шуоно тросэз та пьесаос ӝутэм ужпумъёссыя вужмемын ини. Озьы ке но, кылтӥрлыксыя, интрига пӧрмытон амалъёссыя, син азе пуктымон геройёсты дэмламзыя туннэ но тунсыко чузъяськисьёсыз вань. Кылсярысь, Жомбо Очейлэн гожъямъёсыз: «Сьӧсьёс киулын» но «Лакан выжы». Автор узыръёслэсь но куанеръёслэсь ваче пумит вуэмзэс возьматэ. Та аръёсы со акыльтымон ӵем пумиськись конфликт луэ. Но Жомбо Очей, аспӧртэмлыко амалъёс кутыса, яркытэсь образъёс кылдытыны быгатэм. Кылсярысь, «Лакан выжы» пьесаын со, нимъёсын шудыса, устоесь диалогъёс пӧрмытыса, серемес образъёс суреда. Валтӥсь геройёс — со узыр Лакан, солэн кышноез Пакан но соослэн вакчи визьем пизы Лёгкобы. Шуге-леке вуэм гуртоос пӧлын Лакан кызьы мылыз потэ озьы кузёяське. Шузигес пиезлы со куанер улӥсь нылмуртэ Сяськабеез кышно вайыны турттэ: «Сютэм арлэн вуэмез ӟеч луиз али: визьтэм пиелы но визьмо кышно шедьтомы». Валтӥсь геройёссэ драматург шушесь, жобесь но шузиесь карыса возьматэ, ӟуч кылын ке верано, туж циничноесь, но сыӵе сямъёссэс соос вераськемзы, выросъёссы пыр асьсэос шарае потто. Со ик серекъян мылкыд кылдытэ.

* * *

баженова

М. Баженова, «воргорон» уж борды басьтӥськыса, гожтэ таӵе пьесаос: «Попен пелляськисен огкадесь», «Васи но визьмо луэм ни вал», «Шарае потэ», «Быжйылъёс» но мукет.

михНимысьтыз Мария Баженова сярысь вераны кулэ. Со вордӥськиз 14-тӥ июле, но арез ӝот-ӝот тодмо ӧвӧл: 1902-тӥ яке 1906-тӥ арын. Драма кылдытӥсь нылкышноос, оглом учкыса но, туж ик трос ӧвӧл, нош удмурт литератураын та аръёсы со чылкак огназ вал. М. Баженова, «воргорон» уж борды басьтӥськыса, гожтэ таӵе пьесаос: «Попен пелляськисен огкадесь», «Васи но визьмо луэм ни вал», «Шарае потэ», «Быжйылъёс» но мукет. «Быжйылъёс» пьесаяз драматург возьматэ сектантъёс пӧлы йыромем Лесагурт нылкышноез. Соос сьӧры героиня, семьязэ ик куштыса, кошке. Со вискын картэз но пиез колхозэ пыро, картэз выль семья кылдытэ. Произведенилэн пумаз нылкышно гуртаз бертэ но улонлэсь бере кылемзэ, семьязэ ыштэмзэ вала. «Вот веть муртъёслэн быжйылазы ветлӥмы. Ӟечез ӧм адӟе. Быжйылъёс ик вань асьмеёс», — шуэ Лесагурт.

Кедра Митрей — 5 пьесаослэн авторзы. Писатель басьтӥськиз пьеса пыр вашкала улонэз возьматон борды, огдыре ик ӝутэм темаоссэ ас вакытысьтыз ужпумъёсын герӟаны тыршиз, со понна тунсыко жанровой формаос кутӥз. Гожтӥз «Эш-Тэрек» но «Идна батыр» — трагедиос. Али но удмурт драматургиын ваньмыз-ӧвӧлэз 4 трагедия гинэ — кыксэ соос пӧлысь Кедра Митрей кылдытӥз.

* * *

мих

Пьесаосызлэн ӟечлыксыя висъяське И. Михеев.

Удмурт драматургия удысын пайдаё ужамезъя, пьесаосызлэн ӟечлыксыя висъяське И. Михеев. Солы 19-тӥ июле 140 ар тырмиз.

Иван Степановичлэн пьесаосаз яркыт шӧдӥське авторлэн калыксэ югдытыны-дышетыны тыршемез. Со гожтӥз «Эн лушка», «Удмурт доктор», «Удмурт дышетӥсь», «Визьтэм Онтон», «Пелляськись», «Удмуртъёслэн революци потон азьын улэмзы» пьесаосты. Озьы ик И. Михеев, анонс выллем, ивортэ «Визьмо ныл (пи)» но «Мултан вӧсь» (трагедия) ужъёсыз сярысь, нош Кузебай Гердлы гожтэтаз вера «Сариван Васьлеич» но «Пугачев среди вотяков» пьесаос бордын ужамез сярысь. Вуттӥз-а гожтыса? Яке ӧз-а? Тодмо ӧвӧл.

И. Михеев шудонъёсаз-пьесаосаз кышкатэк пуктылӥз национальной юанъёсты но ужпумъёсты. Мукет выжы калыкъёслэсь удмуртъёсты ултӥяны тыршемзэс но туж дӥсьтыса суредаз. Удмуртъёсты классъёслы люкыса (классово) возьматымтэез туж ӧз кельшы куд-ог критикъёслы. Кылсярысь, К. Иванов (К. Ошмес) курла И. Михеевез вуж сямъёслы дурбасьтэмез понна, сое буржуазной националист шуэ.

И. Михеев юн оскиз кыллэн кужымезлы, искусство пыр пеймыт адямиосыз югытэ поттонлы, пьесаосаз сётэм учыръёс-югдуръёс пыр пелляськисьёслэсь, туноослэсь палэнскыны ӧтиз. Азьветлӥсьёс пӧлын со адӟиз интеллигенциез, соин ик пьесаосаз тужгес но ӟеч мурт карыса сётэмын дышетӥсьёс но докторъёс.

* * *

Удмурт драматургиез но театрез кылдытонын трос лэсьтӥзы А. Сугатов но М. Тимашев. Жаляса верано, А. Сугатовлэн 3 пьесаосыз пӧлысь 1-ез туала лыдӟисьлы тодмо ӧвӧл: «Удмурт сюан» но «Висён» сяна, со кылдытӥз на «Юмшаса ветлӥсь ныл» пьеса, кудзэ утчаны кулэ.

М. Тимашев «Удмурт театрмылэн дас ар тырмемез» ужаз нимысьтыз инты висъя А. Сугатовлы, солэсь биографизэ но пыр-поч гожтэ, тунсыко детальёссэ палэнэ кельтытэк: «Сугатов — Кузон губерняйысь Мамадыш уезысь (кантонысь) Ядыгер волосьысь Куамес гуртысь удмурт кресьянлэн пиез. Пичиысен ик туж курадӟыса будэм марке. Ӝож кӧтсэ аслаз чебер куараеныз кырӟаса, буйгатыса улоз вылэм. Начальной школайын дышетскыкуз ини со куараез понна 5 манет награда басьтэм. Собере, герман ожысен, солы куараез понна, кырӟамез понна, офицеръёс огпол 400 манет уксё сётӥллям…». А. Сугатовез данъян ӝыт сярысь ялыса, М. Тимашев статьязэ тазьы йылпумъя: «11-тӥ араз потыса, Сугатов эш театр уж бордын талэсь но зол юнматскоз, удмурт театрез азинтыны уно юрттӥськоз шуыса оскыса уломе». Но репрессиос кутскемен, 1932-тӥ арын А. Сугатов яратоно ужезлэсь куштӥськоно но палэнэ кошконо луэ.

М. Тимашев — Удмурт клубен кивалтӥсь, усто драматург. Со 5 пьесаослэн авторзы, но туннэ асьмелы тодмо кыкез гинэ: «Насьток» но «Иванов». Шедьтымтэ «Выль улон лэсьтӥсьёс», «Нюръяськонлэн емышъёсыз», «Ожлэн ӟечез». «Ожлэн ӟечез» сярысь «Гудырие» гожтэ Байкаш Кузи (Кузьма Ложкин): «8-тӥ мартэ нылкышноёслэн нуналазы удмурт клубын Тимашевлэсь али гинэ гурысь басьтэм пьесазэ пуктӥзы. «Ожлэн ӟечез» шуса нимаське». Та пьесаослэн пуштроссы сярысь газет бамъёсын печатлам дунъетъёсысь-рецензиосысь гинэ тодыны быгатӥськом. Михаил Николаевич, мелодрама но водевиль кылдытыса, удмурт драматургиез жанръёс ласянь но узырмытӥз.

Удмурт драматургия кылдон аръёс даноесь но данъяськымонэсь. Троссэ эскерыны, утчаны кулэ на. Кузебай Герд «Вотский театр» статьяяз гожтэ: «1918 арын театр улон кужмо тулкымен шобыртэ быдэс воть музъемез. Пуктӥсько спектакльёс, радъясько концертъёс, кылдытӥсько но берыктӥсько пӧртэмесь пьесаос. Лебедев («Праздник дыръя»), Сапаров («Шузимем»), Майоров (нылпиослы пьесаос) но мукетъёсыз устоесь драматургъёс луо». Кин меда со Лебедев но Сапаров? 1966-тӥ арын потэм «Удмурт литература» книгаын гожтэмын: «Данак выль пьесаос гожто О. Жомбо,

М. Баженова, И. Новиков но И. Курбатов». Кин меда со И. Новиков? Со сяна, А. Скобелева драматург сярысь но гожъяло.

Озьы ик пьесаослэн нимъёсынызы герӟаськем юанъёс но вань: Байкаш Кузи одӥгаз рецензияз вера «Безымтэ мылкыд» пьеса сярысь, нош тупен-тупен мадем пуштросэзъя со тупа

К. Яковлевлэн «Сюртэм Карпа» пьесаезлы. Со одӥг пьеса яке пӧртэм?

Тросэзлэн яркыт драматургъёслэн улон но творческой сюрессы репрессиосын валче дырызлэсь вазь чигиськиз. Нош кыӵе синмаськымонэсь но узыресь вал та дасо аръёс удмурт драматургиез кылдытон понна… Кӧня юанъёс со асьмелы кельтӥз…

Удмурт Дунне
By Удмурт Дунне Июль 23, 2016 12:31