Кылдытэм дуннезэ уг вуза

Удмурт Дунне
By Удмурт Дунне Июль 20, 2016 13:02

Кылдытэм дуннезэ уг вуза

кузпалъёс

Можга ёросысь Выль Юбераысь Никитинъёс.

Можга ёросысь Выль Юбера гуртын вань шулдыръяськонъёс ортчо Яшка ошмес дурын. Интыез чеберъяз Николай Николаевич Никитин, сяськаос мерттӥз кышноез — Мария Семёновна.

Николай Никитин вордӥськемын Можга ёросысь Комакын. Но Мария Семёновна картсэ вордӥськем гуртаз кыскем — Выль Юберае. Куке но бадӟым гурт — калык сое 2-тӥ Китай шуылӥз — каллен «куасьмиз», али отын 25 адями гинэ улэ на. Со понна кыӵе инкуазьзы! Солы синмаськыса ик, кузпалъёс татчы кыльыны малпазы, шуизы, корка пуктом  Яшка ошмес дуре. Табере утялтэм ошмес — гуртоослэн аспӧртэмлыко клубзы.

— Татчы вуэммы бере нырысь ик ошмесэз сузям. Уго со шимес вал — синмыз пуосын куямын, котыраз бадьпуос будо, — вера Николай Никитин. — Собере ошмес дуре корка пуктӥм. Со дырысен трос аръёс ортчизы ни. Алигес ошмес котырмес выльдӥмы.

сад

Азбарез уте «дядяй».

Чеберъям капка ултӥ пыриськод, Иншыр бамалысь октэм тӧдьы изъёслэсь сюрес вылтӥ мынӥськод, пӧртэм сяськаослы паймиськод но уд но валаськы, кызьы выжыкыл дуннее сюриськод. Ошмеслэн аслаз азбарез но вань. Отын каръяськемын аистъёс, тулысэз возьма йӧспӧртэм шырчик кар — тусыз пересь дядяйлэн, нош усьтэм ымыз но 2 синъёсыз — пыран-потанъёс. Отчы, пе, 3 шырчик семья тэре — 3 квартираем кар. Ошмес доры пуксемын Матрёна — пыдэстэм ведралэсь сяська посуд, кубозэ «бергатэ» выль кен. Тазэ лэсьтӥллям ӵошен.

— Мунё вылын нэнэйлэн пинал дыр дэремез, — вера Мария Семёновна. — Жаляса-жаляса вози но, дэрем гыжмоз шуыса, поттӥ. Зор дыръя «кенмес» клёнкаен шобыртӥськом.

Ошмес син липет улэ ватэмын. Вузэ вӧсяз Можгалась баӵко. Куд-ог дыръя татчы пырало сюан ортчытӥсьёс — ошмес вамен выж вылтӥ потало.

муне

Ошмес дурын черсӥськыса пуке «выль кен».

Ошмес котырын «улӥсьёс-ты» Николай Николаевич ачиз лэсьтӥз, пуэн вырыны юромо дышетскемын ӧвӧл ке но. Писпу кузя бадӟым зоркибы тубе, губи вылын, зонтик улэ ватӥськыса, пуке бадӟым бака. Нош вань та дуннеез утё нэнэйёс но дядяйёс: кенерын котькуд юбо — адями тусо. Кызьы таӵе кылдытэм дуннеын улэм уз поты?

— Адямиос, ваньзэ тае адӟыса, асьсэлы но мар но со лэсьтыны куро, дыр, ук?

— Вузаны но куро. Таос уг вузасько, — вера Николай Николаевич.

Мария Векшина

Туспуктӥз Чудья Жени

Удмурт Дунне
By Удмурт Дунне Июль 20, 2016 13:02