Кыӵе кужымез огазеяськонлэн?

Удмурт Дунне
By Удмурт Дунне Июль 7, 2016 08:00
фото Загребин Алексей

Удмурт институтлэн директорез Алексей Загребин: Фин-угор калыкъёс культура, дышетон, наука, ивор вӧлмытон но трос мукет удысъёсъя ог-огзылэсь дышетско, ог-огзылы юртто.

Дуннеысь фин-угор калыкъёслэн конгрессы дыръя эскеризы калык огазеяськонъёслэсь азинскон сюрессэс. Та пумысен вераськиз Историяя, кылъя но литературая Удмурт институтлэн директорез Алексей Загребин.

Пӧртэм выжы калыкъёс ас движениоссэс кылдытъяны ӧдъязы 20-тӥ даурлэн пумаз, шуиз Алексей Загребин. Азязы пӧртэм пумо ужпумъёсты пуктылӥзы. Сямъёссэс-йылолъёссэс, культуразэс утёнэн гинэ герӟаськемын ӧй вал соос. Калык огазеяськонъёс пыриськыны турттӥзы улосъёслэсь экономиказэс юнматон ужпумъёсы но.

1980-тӥ  аръёслэн пумазы ваньмаз ик автономиосын кылдӥзы общественной огазеяськонъёс, соос странаямы улӥсь калыкъёсын герӟаськем ужпумъёсты власть азьын сылӥсь валтӥсь ужпумъёс пӧлы пыртыны, национальной ужпумъёсъя кун ёзъёс кылдытыны куризы. Россиын фин-угор калыкъёслэсь огазеяськонъёссэс кылдытыны кичӧлтонэн нырысь ик потӥз наукаен, творчествоен вырись интеллигенция. Озьы ужаны ӧдъязы «Общество карельской культуры», «Удмурт Кенеш», «Коми войтыр», «Масторава», «Мари ушем» но мукет организациос.

Совето Союзлэн куашкамез зол шуккиз национальной движениез. Приватизация кутскем бере книга поттон, печать, культура удысъёслы уката секыт луиз. Калыкъёслэсь сям-йылолъёссэс утён сярысь сюлмаськись муртъёс пӧлысь тросэзлэн осконзы кысӥз.

1991-тӥ-1992-тӥ аръёсы калык движение властен огкыл шедьтон сярысь сюлмаськыны кутскиз. Россиын улӥсь вань фин-угор калыкъёс ортчытӥзы съездъёссэс. Вылӥ кивалтӥсьёс, огласянь, кышказы, общественникъёс сьӧраз ортчозы  шуыса. Мукет ласянь, возьматэмзы потӥз, пӧртэм калыкъёслэсь кылзэс, культуразэс утён сярысь сюлмасько шуыса. Со муген ик кутскизы кылдыны гожъяськон, суредаськон, журналистика удысын ужась фин-угоръёслэн профессиональной огазеяськонъёссы.

Общественной организациос данзэс юнматон вылысь амалъёс утчаны кутскизы. Россиысь фин-угор выжыысь калыкъёс асьсэлэсь ассоциацизэс кылдытӥзы — АФУН. Нырысетӥ съезд ортчиз Ижын, отын ассоциацилы тӧрое быръемын вал удмурт тодосчи М. Шишкин. Озьы соос огкылысь нюръяськыны ӧдъязы культуразэс, кылзэс утён, азинтон понна. Нош отӥяз потӥзы кунгож сьӧрысь выжы калыкъёсмы доры но.

Фин-угор калыкъёс культура, дышетон, наука, ивор вӧлмытон но трос мукет удысъёсъя ог-огзылэсь дышетско, ог-огзылы юртто. Сюлмасько егит кивоштӥсьёсты дасян сярысь, соослы дышетскыны-будыны луонлык кылдыто. Татын бадӟым интыез МАФУН-лэн — Фин-угор выжыысь егитъёслэн ассоциацизылэн. Пусйыны кулэ: нырысетӥ съезд ортчиз Марий Элын 1990-тӥ арын, отын ассоциацилэн правлениезлы тӧрое быръемын вал пор А. Абдулов. Кыкетӥ съезд  ортчиз 1993-тӥ арын Удмуртиын, тӧро луиз удмурт азьветлӥсь С. Смирнова. МАФУН-лэн бурд улаз люкаськемын 30-лэсь ятыр огазеяськонъёс, соос пӧлын удмурт егитъёслэн «Шундызы», поръёслэн  «Марий ушемзы», Карелиысь «Молодая Карелия» но мукетъёсыз.

Фин-угор движенилэн, мукет движениослэн сямен ик, кызьы вормонъёсыз, азинсконъёсыз, озьы ик тырмымтэосыз вань. Но туала улон-вылонын солэн интыез бадӟым.

Элина Васильева

Удмурт Дунне
By Удмурт Дунне Июль 7, 2016 08:00