Котьмаиз удалтэ

Удмурт Дунне
By Удмурт Дунне Июль 20, 2016 11:12
виктория

Пичи Пурга ёросысь Уча черкогуртысь Григорьевъёс 8 сотка боры будэто.

Пичи Пурга ёросысь Уча черкогуртысь Галина Григорьева, шутэтскыны потытозяз, покчиосты визьнодаз. Табере гурт котыраз ужа — бакча сиён будэтэ, пудо котырын берга.

— Со кадь кин ке ужась вань меда? — Галина Петровна сярысь ушъяса верало бускель нылкышноос. — Чупрес, чырткем, ужлы керӟег. Ми изиськом ай, нош со кузпалыныз, вазь ӵукна ик султыса, мар но ужаса уг вутто! Бакча сиёнъёссэ бичаса базаре вузаны нуэ. Вазь тулыс ик теплицаяз вож сугонэз, салатъёсыз но киярез сиыны вуо ини. Нош милям ай со вакытэ теплица котырамы лымымы ик шунаса уг вутты на. Вазь тулысысен кутскыса бер сӥзьылозь бакчаез но азбарез чибориё ковёр кадь пӧртэм буёло сяськаосын шобырске. Борызы гинэ но соослэн 8 соткае мерттэмын. Ведь сонямындаез утялтыны кулэ. Пудоез но, бакча сиёнэз но киыз капчиен, видно, удалто.

Таӵе чебересь кылъёсты кылыса, чидалод на-а, ассэ Галина Петровнаез адӟытэк. Нылкышно сяськаосты но ужез яратэ шуыса, ульчаысен ик шӧдӥське: укно азяз кыӵе гинэ сяськаосыз уг сяськаяло, коркаез ӝик-ӝик утялтэмын. Воргорон киос но туж зол шӧдӥсько: котырак ӝикыт но жон-жон лэсьтэмын.

— Гуртын улӥсь адямилы ноку изьыса улыны, — ачиз сярысь дӥсьтытэк мадьыны кутскиз Галина Петровна. — Ма, ми бон маин пӧртэм мукетъёслэсь? Номырин ум висъяськиське кадь. Гуртын ваньмыз ик ми сямен уло, дыр, толалтэзэ пудо котырын бергаськом, лымы мычиськом… Юртъер котырын ӧжыт-а ма уж? Тулыс вуэ ке, вот соку ини бер сӥзьылозь бакчаысь ум пыраське. Гужем 3 часын џукна корка югыт пыре ини, изем луоз на-а? Ярам коть, шутэтскон нуналъёсы нылпиос юрттӥськыны бертыло.

Григорьевъёслэн кык пиналъёссы — Дмитрий Васильевич, Чайковскийысь физкультурая институтэз йылпумъяса, асьсэ ёросысьтызы ик Баграш-Бигра шор ёзо школаын физкультуралы дышетэ. Туж умой арганэн шудэ. Нылзы, анаез сямен ик, Можга педучилищеын дышетскыса, тодон-валанзэ будэтӥз Удмурт кун университетысь филология факультетын. Светлана Васильевна тырше Пичи Пурга черкогуртысь нылпи творчествоя юртын.

Любовь Тихонова

 

Удмурт Дунне
By Удмурт Дунне Июль 20, 2016 11:12