Котькуд мунёлэн аслаз сямыз

Удмурт Дунне
By Удмурт Дунне Июль 22, 2016 08:22

Мусо, ненег, задор — пӧртэм сямо но тусо пӧрмо Ижысь  Анастасия Фоминыхлэн небыт мунёосыз.

Вурем, керттэм мунёос.

Вурем, керттэм мунёос.

— Декретын пукыкум,  малпай: киужен вырыны кутсконо, — вера Анастасия. — Но  со огшоры ваньмон дырме быдтонлы гинэ медаз пӧрмы, пичи ке но барыш мед ваёз. Озьы кутски бугыръяськыны Интернетын, синйылтӥ Татьяна Коннэлэн амалъёсызъя лэсьтэм мунёосты. Дышетски лэсьтыны, видео учкыса. Нырысетӥ мунёме арня пала выри пӧрмытыны.  Нылы солы синмаськиз, аслым но та киуж мылкыдыя луиз. Озьы пичиен-пичиен кылдӥз 6 мунё. Соосты туспуктыса Интернетэ поттӥ. Ужъёсме синйылтӥзы но ӧтизы пыриськыны Ижысь одӥгаз вуз карон центрын  радъям киужъёсъя адӟытонэ. Отын вань мунёосме басьтӥзы. Озьы выль ужъёс борды басьтӥськыны эшшо но мылкыды пуромиз.

Мунёзэ лэсьтэмезлэсь азьвыл Настя солэсь туссэ суреда. Басьтэ њеч басма. Ачиз анай бере, туж вала но сюлмаське пичиослэн тазалыксы сярысь. Зэм, таӵе мунёосты мӧйыос но туж кельшыто. Кылсярысь, одӥгзэ шудонзэ басьтћз 72 аресъем нылкышно. Кудӥз-огез мунёосты юромо басьто корка пушсэс чеберъян вылысь.

Настя шудонъёсызлы дӥськут ачиз ик вуре-керттэ: изьыос, пыдкутчанъёс, дэремъёс…. Одӥгез но мунё мукетызлы уг тупа, котькудӥзлэн аслаз тусыз.  Одӥгез лякыт сямо, писэйзэ бордаз ӝиптэм, мукетыз — туала модалэсь бере уг кыльы, куинетӥез — бызьыны дасяськем, вылды, сюан дэремен быдэскемын.

А. Фоминыхлэн мусо шудонъёсыз сярысь ивор пельысь пеле, ымысь ыме Удмуртие гинэ ӧвӧл, Россиысь мукет улосъёсы но вӧлмиз ини.  Солэн ялан басьяськисьёсыз вань ини Москваын, Санкт-Петербургын, Казаньын. Алигес 6 мунёзэ Краснодаре келяз.

Ангелина Снигирёва

Удмурт Дунне
By Удмурт Дунне Июль 22, 2016 08:22