Ки йылазы нуллӥзы

Удмурт Дунне
By Удмурт Дунне Июль 20, 2016 14:30
Вуз карисен џош.

Вуз карисен ӵош.

Удмуртиысь 73 процентэз туристъёс кунгож сьӧрын шутэтско

Египетысь Хургада городэ мыныны соку ик ӧм дӥсьтэ, отын ыбылӥсько шуыса. Но кунгож сьӧры потаны яратӥсьёс буйгатӥзы: Египетысь курортъёс, пе, котыр ласянь эскерисько, туристъёсты отын уг исало.

 Коньдон кыско вамышлы быдэ

Мурт шаерын ваньмыз паймымон потӥз. Син шоры йӧтӥзы полицейскойёс, ваньзылэн киосазы автоматъёс. Кыр инты — пустыня, аэропорт котырын гинэ кӧня ке пальмаос будо. Автобусэн мынэммыя пустыняез воштӥз вож-вож сад. Городысь курортной зонаысь артэ сылӥсь гостиницаос чебересь потӥзы.

Кунокуаын ужасьёс милемыз шуныт пумитазы, киосамы браслетъёс думизы. Озьы ми вань гостиницаосысь шулдыръяськон но шутэтскон интыосы эркын пырыны быгатӥмы. Та странае потам туристъёс веразы вал, гостиницаын ужасьёс, пе, коньдон понна чемоданъёсты, воксё юатэк, куто, кулэ интыозь нуо. Усьтон басьтыса ӧм вуттэ, милям сумкамы борды но егит пияш ӝабырскиз. Юрттэтлы ум кулэяськиське шуыса вераммес пеляз но ӧз поны. Сумкамес кӧня ке метр нуэмез понна 1 доллар сётытэк ӧйлась.

Хург

Шутэтскисьёс кузьылиос мында.

Зэм но, коньдон кыскыны ваньмыз дасесь. Гостиницае интыяськон нуналэ номермес утялтӥсьлы но 1 доллар сётӥмы. Со понна нуналлы быдэ валес котырмес вошъялляз, ваннае 3 тюбик шампунь но кӧня ке юдэс майтал тырылӥз. Отӥяз коньдонмес ми но шыръяны дышимы.

Нуназеян вакытозь быдэс час кылемын вал, зарезь доры ветлытэк кылё кожаса, пляже дыртӥ. Паймытӥз Горд зарезь: вуэз синкыли кадь чылкыт, пыдэсыз ик адӟиське, нош зарезь дорысь песок тӧдьы лымы выллем небыт но чылкыт. Шутэтскыны лыктэмъёсты сак эскеро спасательёс.

Африка ке Африка ик вань. Ульчаын 35-40 градус пӧсь ке но, шоканы капчи. Шунды сиос туж кескичесь: кремен зыраськытэк, ульчае потӥд ке, вакчи дыр куспын сутскод. Кӧлэмысь бер султӥд ке, нуналлэсь быремзэ ик шӧдытэк кылёд: вазь пеймыта. Ӝытъёсы но уйёсы кезьыт улэ, зол тӧлаське, тани-тани сильтӧл ӝутскоз кадь.

Хургадаын улӥсьёс пӧ-лысь тросэз турагентствоосын, отельёсын тыршо, яхтаосын но катеръёсын капитан луо, вузасько.

Синмаськи турагентствоосын ужасьёслы. Котьку сабырлыесь, котьма сярысь юаллясько, сюлмаськытӥсь ужпумъёсты сэрттыны-пертчыны юртто. Ваньзылэн ужасьёссылэн вылӥ дышетскемзы, эркын верасько ӟуч, англи но немец кылъёсын. Соос верамъя, городысь университетын, пе, умой радъямын ӟуч кылэз дышетон.

Хургада.

Хургада.

 Русгада

Кунгож сьӧры потэмелэсь азьло Интернет вотэсын пыр-поч бугыръяськи, Египетэ вуылэм адямиослэсь мылкыдъёссэс лыдӟи. Тодӥ, тросэз арабъёс, пе, гажало вуззылэсь дунзэ кулэстыны вырисьёсты. Сое лыдэ басьтыса, мон но басьяськыны потӥ. Егит пияш сувениръёс вуза, огзэ вӧйзэ (кудзэ туж ушъяло, зыныз ньылпулэн кадь) 2 поллы ичи дунын курисько вал. Куасалтэме ӧз луы, дунзэ 2 долларлы гинэ уськытӥз.

Со понна кыллы бырем вуз карисьёс котыртӥм шумпотыса бызьыло, асьсэ вуззэс ӵекто, доразы пырыны косо. Воргоронъёс шоры соос «брат» яке «друг» шуыса вазисько, нош нылкышноосты «мадам» яке «дэвушка» шуо. Вузаськисьёс шоры урод учкид ке, соослэн но вожзы потоз, нош мыняд ке — вакчи дыр куспын эш луод. Пальышаны яратӥсько бере, небыт пукон вылазы пуктэмзэс ик ӧй вала. Чаен куноятӥзы, асьсэлэн улэм-вылэмзы сярысь мадизы, Россия сярысь юалляськизы. Быдэ вуэм нылпиосынымы нимаз улӥськомы шуыса верамме кылыса, воксё абдразы. Египетын, пе, одӥг юртын куинь поколениысь семьяос уло.

Египетын 4 кышноен улыны лэземын ке но, туж ӧжытэз трос семья возе. Вань кышноосты огкадь яратоно, сюдоно-вордоно угось, со понна узыр луоно.

— Миллионеръёсты нош вань-а? — выжыятӥсько.

— Миллиардеръёсмы но вань, ас вакытаз та городысь дунтэм дунын музъем басьтӥсьёслы удалтӥз.

Горд зарезь дурын.

Горд зарезь дурын.

Египетын улӥсьёс монэ паймытӥзы капчи мылкыдынызы. Сюлмаськонъёссы коть вань, коть ӧвӧл — ялан мыняло. Куд-ог туристъёс асьсэды урод возё ке но, калык кунооссы шоры урод мылкыдзэ уг кисьты. Мон малпамъя, сыӵе сямзы коньдонэн герӟаськемын. Угось тросэз уло Россиысь туристъёс чотын. Хургада городэ тол но гужем калык ветлэ, нош Россиысь туристъёсын самолётъёс аэропортэ 5 минутлы быдэ пуксьыло. Татын улӥсьёс ас понназы серекъяло, Русгадаын улӥськомы шуыса.

 Дуно нылпиос но эрказмем водительёс

Ӟуч нылъёс араб воргоронъёслэсь йырзэс берыкто, араб пиос асьме нылъёс борды лякисько шуыса вераськонъёс — супыльтонъёс гинэ. Бен, ӝытъёсы, шулдыръяськонъёс дыръя, воргоронъёс эктыны ӧтё, но бордэ уг лякисько. 2 арня пала улытозям, одӥг ныл борды но одӥг пиосмурт но ӧз няняськы.

Со понна мукетсэ валай: татысь калык нылпиосыз гажа. Ульчаетӥ мынӥсь пиналлэсь нимзэ юалозы, сиён ӵектозы но кыӵе ке юон мычозы. Соин но, дыр, нылпиосын шутэтскыны мынэм семьяослы нимысьтыз саклык висъяло. Тэшкылиос понна нимысьтыз комнатаос, шудон но шутэтскон интыос кылдытэмын. Россиысь тросаз семьяосын одӥг гинэ пинал будэто шуыса тодэмзы бере нош ик паймо: Египетын котькуд семьяын ӧжытсэ 7-9 нылпизы.

Египетын дуно машинаосын ворттылӥсьёс ӧжыт, тросэз гажало Россиын поттэм автомобильёсты. Водительёс ас тодэмзыя ворттыло, соос понна мынон-ветлон правилоос ик ӧвӧл, кожалод: кожыкузы нокыӵе сигнал уг сёто, эшъёссэс пумитакузы, сюрес шоры ик дугдо но, машинаысьтызы потыса, кема верасько. Эркын ворттылӥсь водительёсты адӟыса, таксие пуксьылыны ӧй дӥсьты. Оскымонгес потӥз автобусэн ветлыны.

Мае сиим? Буш ӝӧк вылъёсты ӧй адӟылы. Ӟуч рецептъёсъя дасям сиёнъёс но пыжиськемъёс туж трос. Куазь пӧсен, лэся, ческыт тортъёсты ӧй но веръя, со понна кӧттырымон сии емыш.

Аэлита Князева

 

 

 

  

 

 

Удмурт Дунне
By Удмурт Дунне Июль 20, 2016 14:30