Кез ёросысь Вуж Гыя: Бусыос кизисько, возьёс турнасько

Удмурт Дунне
By Удмурт Дунне Июль 27, 2016 15:14

Кулэ на сюрес, газ но клубын ужась

Кез ёросысь Вуж Гыя гурт райцентрлэсь 32 иськеме интыяськемын. Гуртэ весяксэ сямен сьӧд нюлэс пыр мыноно.

И. Максимова, Н. Конева но К. Белослудцева.

И. Максимова, Н. Конева но К. Белослудцева.

 Гурт быриз — ульча кылдӥз

Вуж Гыя сьӧрын, 15 иськемын, Степанёнки но Кулига гуртъёс шедё на. Кулигаын Кам шур кутске. Отӥяз ини Пермь улос. Вуж Гыя гуртэ интыяськемын муниципал кылдытэтлэн администрациез. Соин кивалтэ Валерий Дерендяев. Удмуртъёс сяна, гуртын уло кӧня ке ӟуч но одӥг чуваш семья.

Гурт туж чебер интые пуксемын. Бакча бертӥзы Пызеп шур бызе. Палэнынгес тыметсы ӵыпемын. Отын тол но, гужем но чорыгасез уг, пе, бырылы.

Гурт шоры ик интыяськемын кык этажо шор ёзо школа. Сое 2010-тӥ арын пуктӥллям. Школаен кивалтэ Сергей Марков. Татчы ик интыяськемын нылпи сад. Озьы ик одӥг липет улэ интыяськемын «Маяк» колхозлэн контораез но райполэн магазинэз. Колхозэн кивалтэ Нина Максимова. Вуж Гыяын медпунктсы но почтазы вань. Таосыз вуж школалэн юртаз интыяськемын. Почтаен кивалтэ Надежда Наговицына. Гурт калыкез эмъяло Ольга Морозова но Елена Дерендяева. Вуж гыяослэн гуртсылы сӥзьыса музейзы ужа. Сое кылдытӥз кема аръёс ӵоже удмурт кыллы но литературалы дышетэм нылкышно Антонида Яковлевна Максимова. Али кивалтэ историен егит дышетӥсь Григорий Дементьев.

Максимов кузпалъёс

Максимов кузпалъёс

— Азьло аръёсы гуртмы бадӟым вал, туала арын со пичигес но пичигес кыле ни, — шуэ муниципал кылдытэтысь специалист Станислав Хохряков. — Кык ар ӵоже 3 корка пуктэмын. Со туж ӧжыт ук. Егитъёс гуртэ уг ни кылё, улыны городэ кошко. Гуртамы 173 коркан 473 улӥсез. Пропиская бен кӧнялы ке тросгес. Асьме понна гинэ улысалмы ке, Гыямы трослы пичи кыльысал ни, вылды. Артысь Саватеево деревня быриз но, соос ми доры лыктӥзы, нимаз Саватеевской ульча кылдытӥзы. Ма, тросысьтыз бырись деревняосысь калык татчы улыны лыктӥз ини.

 Колхоз мед возиськоз

— Егитъёсмы Иже но Перме ужаны кошко, — ми борды итӥське колхозысь бухгалтер Нэля Конева. — Мар карозы на татын? Сюрес ӧвӧл, клуб ӧвӧл, райцентрлэсь кыдёкын улӥськом. Алигес бен клубмес тупатъязы ик. Табере, оло, кин ке шедёз ни ужасез но. Кылем арын сӥзьыл юн зорыса улӥз, толалтэ умой ӧз кынты, сюресмы озьы ик дэри кылиз. Таӵе лекос урод ноку со ӧй вал на. Туннэ тани зороз, аску гуртэ машинаен пырыны уд ни быгаты. Медьма ӧрез тулыс тудву нуиз. Табере сое йӧнала тупатъясь ӧвӧл ни. Сюрес ӧвӧлэн автобус пичи гуртъёсы уг ветлы. Соин ик нылпиос, интернат ке но ӧвӧл, вуж школалэн юртаз кӧлало. Сюрес ӧвӧл бере, пичи гуртъёс быро но быро. Вуж Гыяылэсь кыдёкын ик ӧвӧл Медьма гурт сылэ вал. Куке-соку отын черксы но вылэм. Табере — быриз. Шумпотыса вераны быгатӥськом: милям колхозмы йыг-йыг пыд йылаз возиське. Соин быгатыса кивалтэ Нина Никандровна Максимова. Со дыръя трос пуктӥсько ни. Алигес тани ю куасьтон лапас но 400 скаллы комплекс пуктӥзы. Со сяна но трос ужъёс лэсьтӥсько. Бусыос кизисько, возьёс турнасько. Только тани газ ми пала ноку уз вуттэ ни-а, мар-а?

— Мед ай, мед колхозмы возиськоз, — вера ветфельдшер Ираида Максимова. — Калыклы уж кулэ ук, кызьы адями сиытэк улоз? Пенсионеръёс гинэ гуртэ кылизы на ке, деревнямы воксё бырыны быгатоз ук.

— Кушем но корка нимъёсын тӥ палан верасько-а?

— Мынам бабуше Чупчи палась Бани деревняысь та пала быземын вал, — вера Нэля Конева. — Сое быдэс гуртэн Бани гинэ шуылӥзы. Пичи дыръямы, солэн озьы ик нимыз шуыса, малпаллямы. Быдэ вуыса тодӥм ини: бабушме гуртэзлэн нимыныз нимало вылэм. Котькуд гуртын сямен ик татын но корка нимъёс вань: Горей, Арсень, Кузнец, Токарь… Данъяськиськом Кезысь сыр поттон заводысь кивалтӥсен Анатолий Максимовен. Анатолий Юрьевич ми дорын вордскемын.

Муниципал кылдытэтын ужась С. Хохряков.

Муниципал кылдытэтын ужась С. Хохряков.

 347 ар

Гуртлэн историезлы сӥзьыса музей кылдытӥсь Антонида Максимова шаертодонъя кружок но нуэм. Антонида Яковлевналэн тросэз дышетэм пиналъёсыз «Ӟечбур!» газетлэн юнкоръёсыз вылӥллям.

— Мон ачим Кез сьӧрысь Чекшур гуртын вордскемын. Дэбесысь педучилищеез йылпумъяса, ужаны татчы лыктӥ — Володя Максимовлы бызи. Ми соин 3 пинал вордӥмы. Ваньзы соос Кезын уло. Шутэтскыны потытозям, нылпиосты удмурт кыллы но литературалы дышетӥ. Каль (али) тань внукъёсыным пукисько.

— Кытысь меда гурттылэн нимыз кылдэм? Мар со Гыя шуэм луэ? Вылез но Гыяды вань шат?

— Гуртлэн кылдэмез сярысь таӵе легенда вань: чиган нылкышно татӥ нуныеныз кошке вылэм. Солэн нылызлэн нимыз Гия, пе, вал. Озьы соос чебер интые улыны интыяськиллям. Но Гия интые гуртлэн нимыз Гыя луэм. Мон Выль Гыя гуртэ бызи вал ай. Со гуртэ пырон дорын, паллян киын, сылӥз. Отчы интыяськемын вал колхоз контора но. Вуж Гыяозь иськем но ӝыны вал. Табере соос вискы коркаос пуктылэмын ни. Гурт огинэ луыса, колхоз контораез Вуж Гыяе выжтӥзы.

— Нош мынам тазьы кылэме вань, — вера Нэля Конева. — Та гурт быдэсак сутскем. Гыаса ик со ӝуам. Собере тӥни озьы ик нималлям. Валля арын солы 345 ар тырмиз. Ӝуамлэсь азьвыл, вылды, мукет вал гуртлэн нимыз.

Любовь Тихонова

Удмурт Дунне
By Удмурт Дунне Июль 27, 2016 15:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*