Чорыган: Ватскемен шудон

Удмурт Дунне
By Удмурт Дунне Июль 20, 2016 08:12
чорыг

Чорыгъёслэн эксэйзы — судак.

Судакез яратӥсьёс визнало спиннинген джиг шуон амалэн.

Та понна магазинъёсын вузасько нимысьтыз курико грузилоос, приманкаос. Векчи чорыгъёсты ву пыдсын яке мур вуын возьмась пурысь юшъёс (судакъёс), чачаосты — приманкаосты — адӟыса, пӧяськеме шедё но вылазы омырско.

Пӧетъёс луыны быгато пӧртэм пумо, лэсьтэмын но соос пӧртэм материаллэсь: поролонлэсь, капчи силиконлэсь, пластиклэсь твистеръёс, виброхвостъёс, нумыръёс, эбекпиос, кисло-куслоос. Соосты бырйыку, нимысьтыз саклык висъяно буёлзылы. Пурысь юш яратэ яркыт:  ӵуж, югыт-вож, гордмыт-ӵуж — буёлъёсты. Пӧетлэн быдӟалаез 160 миллиметрозь луыны быгатоз.

Пурысь юш возиське чылкыт но мур шуръёсын, яратэ силё-сюрно котыръёсы ватӥськыны. Куд-ог дыръя та чорыг туж быр-йиськись луэ, ляб зыгатэ. Соку спиннинге бырттыны луоз тужгес сюбег но пичи пӧетъёсты — купрес быжо твистерез яке чорыглы кельшись виброхвостэз. Визнан арбериез но сыӵе дыръя тупамонзэ быръёно, лушкем зыгатэмез но со мед шӧдоз. Но берлояз чорыгакумы, азьтэмскем судак ик малы ке бадӟымгес пӧетъёсты синйылтӥз. Ӝыны килоем чорыгпиос 10 сантиметръем шейкеръёслы (пӧетъёслы) синмаськизы. Тужгес бырйиськись чорыгез но ныр улаз вуэм пӧет  сэзёмытэ вылэм.

Пыжысен чорыгаку, пӧетэз тырше лазег интыысен мур азе кыскыны,  озьы ӟечгес шӧдыны луэ шур пыдэсэз. Мур интые выжонэз (бровка) шедьтыса, пӧетэз со валлин кысконо ӧвӧл, катушкаез бергатыса, грузилоез ву пыдсы лэзёно лапегысь муре. Со пумен-пумен, падӟаетӥ выллем, мед васькоз уллане — усён вискыз 1-1,5 секунд пала мед кыстӥськоз. Соку чорыг пӧетэз ӝоггес синйылтоз. Зыгатэмез шӧдыса, спиннингез шуак кыскыны кулэ — пӧетэн курик чорыглэн ымаз мед мертчиськоз. Ӝегады яке нялмытак кыскиды ке, пӧет ымысьтыз дэмӟытэк потоз. Нош мултэс зол кыскыса, чорыган си (плетёнка) чигыны шедёз.

Мур кожысь шӧдӥды ке силё-сюрноез, соку ини судак одно тӥляд луоз. Та чорыг, коӵыш сямен, ватскемен шудыны яратэ: силё пӧлысь шуак потыса, азяз шедем сиён вылэ омырске.  Кутоды-а тӥ та сьӧсез яке со  ватскыса вуттоз, таиз ини  быгатонлыктылэсь но спиннинглэн  ӟечлыкез бордысь потоз.

Чорыгаку чаклано шурлэсь макем зол быземзэ но. Визнан арбери ачиз шӧдытоз, кытын лазег яке мур, кытын вань лапегысь муре выжон, мар луэ пӧетэн. Куддыр спиннингысь пӧетлы сётоно ву кошкемъя мыныны, шуак выемезлэсь одӥг-ог выллань ӝутъяса. Бызись ву ачиз вуттоз пӧетэз пурысь юшлэн ымаз. Ӵем дыръя чорыг пӧет бӧрды кырмиське грузило ву пыдсы вуэмлэсь азьло ик, соин ик чорыгаку туж сак луоно. Быгатонлык вуэ чорыгамъя.

Дмитрий Жигалов

Удмурт Дунне
By Удмурт Дунне Июль 20, 2016 08:12