Будон но кулэсмон

Удмурт Дунне
By Удмурт Дунне Июль 7, 2016 10:20

Фин-угор калыкъёслэн тазалыксы но улон гумырзы, вань мукетъёслэн сямен ик, меӵак герӟаськемын кунысь огъя югдурен. Конгрессын та ужпумъя ивортон лэсьтӥз Ижысь медициная академилэн ректорез, профессор Николай Стрелков.

конгресс

Н. Стрелков вераськиз фин-угоръёслэн тазалыксы сярысь.

Фин-угоръёслэн тазалыксы но улон вакытсы сярысь эскеронъёс нырысьсэ ортчытэмын вал 19-тӥ дауре гинэ. Соослэн улон интыосазы паськыт вӧлмемын вал паласькись висёнъёс, соин валче трос калык бырылӥз. Калыклэн лыдыз кызьы но озьы возиськиз трос пинал вордэмысь гинэ.

1897-тӥ арын удмурт шаерын вордскем пиналлэн улон гумырез 23 ар сяна ӧй вал (пиосмуртъёслэн — 22,7 ар, нылкышноослэн — 26,2 ар). Ужаны быгатон вакытозязы улыны удалтылӥз 36 процентэзлы пиосмуртъёслы но 43 процентэзлы нылкышноослы.

20-тӥ даурлэн кутсконаз но туж ик номыр ӧз воштӥськы. Нош Нырысетӥ дунневыл ож но Граждан война калыкез турнаса кадь кошкизы — вордскисьёслэн лыдзы чутрак усиз.

Отӥяз калыклэн лыдыз усьылӥз индустриализация но коллективизация, 30-тӥ аръёсысь репрессиос, Быдӟым ож дыръя. Война бере ӧжыт кылизы воргоронъёс, зэм, ичигес луизы кулӥсьёс но. Югдур ӟеч пала воштӥськыны ӧдъяз 60-тӥ аръёсы: война ортчиз, улон ӧжыт ке но радъяськиз, адямиос сютэм ӧз улэ ни, азинскыны ӧдъяз медицина, озьы вордскисьёс йылӥзы, нош кулон учыръёс 1000 муртлы 7-8 адями сяна ӧй вал.

лыдзы

1990-тӥ аръёсы кутскем воштӥськонъёс нош ик шуккизы калыкез — кулӥсьёслэн лыдзы вордскисьёслэсь тросгес луиз. Тужгес секыт югдур вал Коми-пермяк округын. Шуккетъёсты чидатэк, со вие улонысь трос кошкизы ужаны быгатӥсь воргоронъёс.

Вордскисьёслэн лыдзы выльысь будыны кутскиз 2006-тӥ-2010-тӥ аръёсы гинэ — Удмуртиын со йылӥз 27,4 процентлы, Россиын — 21,2 процентлы. Но кулӥсьёслэн но лыдзы шӧдскымон вал, Удмуртиын — 6,3, Россиын — 2,8 процент.

Жаляса верано, Удмуртиын кулӥсьёслэн лыдзы али но огъя Россиынлэсь тросгес. Тужгес трос куло, шокан ёзвиосын курадӟыса, шудтэм учыръёсын но кӧтпуш висёнъёслэсь, та висёнъёс пӧлын — мултэс юэмлэсь цирроз, отравлениос.

аресъёс

2006-тӥ арын мытэмын «Тазалык» нацпроект. Россиысь тазалыкез утён удыслы висъямын вал трос коньдон, выльдэмын эмъюртъёс. Кылдӥзы «Нуны ваён сертификат» но «Анай капитал», озьы пинал вордӥсьёс шӧдскымон трос луизы. Кызьы ке Россиын, озьы ик Удмуртиын но кулӥсьёслэн лыдзы ичиёмиз, вордскисьёслэн — будӥз.

Шоро-куспо улон арлыд Удмуртиын 2015-тӥ арын луиз 70,46 ар. Вож нуныослэн кулон учыръёссы 1000 вордскемъёслы 5,7 луизы.

Вордскисьёслэн лыдзыя Удмуртия Россиын 19-тӥ интыын мынэ, Приволжск федерал округын — 3-тӥ (Татарстан но Пермь улос бере), кулон учыръёсъя Россиын — 28-тӥ интыын, Приволжск округын — 2-тӥын (Татарстан бере).

лыд

Берло 15 ар ӵоже 2 поллы йылӥз Удмуртилэн палэназ кошкисьёслэн лыдзы.

Демография югдурез тупатон вылысь Удмуртиысь Кун Кенеш 2008-тӥ арын кутӥз нимысьтыз программа, соя тросгес нылпи вордонъя но дырызлэсь вазь кулонъёсты алонъя ужрадъёс чакламын.

Зинаида Рябинина

Удмурт Дунне
By Удмурт Дунне Июль 7, 2016 10:20