Висёнэз эмъя мунё

Удмурт Дунне
By Удмурт Дунне Июнь 7, 2016 10:11

Ижысь инвалид нылпиослэн «Надежда» мунё театрзы возьматӥз выль крезьгуро ужзэс — «Играя лучиками света».

Мунё театре калык трос люкаськиз. Пӧлазы адскизы бадӟымъёс но, покчиос но — ваньзылы тунсыко «Надежда»: кызьы ляб тазалыкен нылпиос быгато кырӟаны, эктыны, спектакль шудыны?!

Ижысь инвалид нылпиослэн «Надежда» театразы шудӥсь пиналъёс, анай-атайёс.

Ижысь инвалид нылпиослэн «Надежда» театразы шудӥсь пиналъёс, анай-атайёс.

— Концертмы кыстӥськиз часлэсь ятыр, — вера «Надеждалэн» кивалтӥсез, Мунё театрысь артист Константин Мехряков. — Дасямы сое толэзьёсын. Валтӥсь малпанмы — ляб тазалыкен адямиослы кулэ ӧвӧл уксё, ваньбур — соослы уг тырмы асьмелэн сюлмаськеммы.

Паймоно: нылпиос сцена вылын шудо доразы кадь — кышкатэк, кепыратэк, бадӟым куараен. Кык полэс паймоно, тодыса: декорациос, мунёос вуремын покчиослэн киосынызы. Макем соос яркытэсь!

— Театрамы пырисько 10-лэсь ятыр семьяос, — вера Константин Львович. — Нылпиос гинэ спектакльёсамы уг шудо. Вынъёссы-сузэръёссы но, анай-атайёссы но палэнэ уг кылё. «Надеждаез» кылдытыкумы, малпамы вал, со семьяос куспын гинэ ужалоз шуыса. Но милемыз школаос, нылпи садъёс ӧтчалляны кутскизы. Озьы табере быдэс шоркармы тодэ, луоз, театрмы сярысь.

Ижысь сяна, пинал усточиослэсь быгатонлыкъёссэс адӟиллям ини Вотка, Чебоксары, Тюмень городъёсын но улӥсьёс. Театрлэн репертуараз али «Теремок» но «Как котёнок научился мяукать» выжыкылъёс.

— Кыӵе спектакль шудомы, кыӵе мунёос вуромы — ваньзэ малпаськомы мумы-бубыосын, пиналъёсын ӵош. Театрамы тужгес покчиезлы 4 арес, тужгес бадӟымезлы — 18. Пичи артистъёсты утчаны секыт йӧтӥз. Угось тросэз анай-атайёс ӧз оскылэ кужыммылы. Ярам, Интернет пыр шедьтӥ мыло-кыдооссэ. Озьы «Надеждамы» ужзэ мытӥз.

Но огвакытэ трос нылпиосын Константин Львович уг ужа. Доразы пукись нылпиослы секыт йӧтэ выль интылы, адямиослы дышыны. Но туннэ театр выль покчиосты бурд улаз пыртыны дась.

— Ми та семьяосын эшъёс кадь луимы ини, — шумпотэ кивалтӥсь. — Театрын гинэ ум пумиськылӥське. Ӵошен инкуазе поталляськомы, вордӥськем нуналъёсамы ветлӥськомы. Шӧдӥське: нылпиослэн тазалыксы юнма. Соос ӟечгес вераськыны ӧдъязы, ас кужымзылы оскыны кутскизы.

Нылпиос театрын пӧртэм мунёос лэсьто. Нырысь дасязы басмалэсь — кие дӥсяны. Со бӧрсьы пӧрмытӥзы пластилинлэсь но бумагалэсь — маска выллем.

— Мынам тау шуэме потэ мумы-бубыослы: соос арнялы быдэ нылпизэс ми доры нуо-ваё, ужамы пырисько. Дырзэс но, уксёзэс но, сюлэм шунытсэс но уг жаляло, — шуиз К. Мехряков.

Ольга Корепанова

Удмурт Дунне
By Удмурт Дунне Июнь 7, 2016 10:11