Вероника Дор. «Коньы пи»

Удмурт Дунне
By Удмурт Дунне Июнь 29, 2016 16:50

IMG_7980Верос

— Мама, мама, малы татын сомында калык?
— Гужем ваньмыз шутэтско, ог-огзы доры куное ветло, тон кадь пичиос песяйёссы доры гуртэ берто…
— Мон пичи ӧвӧл ни… — пие куатаськемъяськиз но, рюкзаксэ асфальт вылэ поныса, пыдчиньы йылаз султӥз, киоссэ йыр вадьсаз ӝутӥз. Тани, пе, учкы, мар ӝужда ни мон!
— Тон мынам зэмзэ воргорон ни, — йырсизэ пештыртӥ но мыкыртӥськыса бамаз чупай. — Озьы бере, чидано луоз, ӝоген автобусмы вуоз…
Адӟемпотостэм автовокзал. Быдэс Россиын, оло, соос одӥг кадесь: тысен но дыльдыен сялам сюресъёс, тӥям пукон-ӟусъёс, солань-талань жӧлмыса ветлӥсь тордосъёс, пыд ултӥ кышкатэк тэтчась ӟольгыри-дыдыкъёс… Эшшо ке — нокыӵе аръёслы но тӧлъёслы сётскисьтэм пакись зын: омыр огдыре напчемын тамак ӵынэн, пыжиськем-сутскем кӧй-вӧй бервылъёсын, макмыр гурӟылэмен, сьӧросысь зынэн. Татын возьмаськонъя котьку но йыры висьыны кутске, сюлмы сэректэ, нош дыр ӧч карыса огинтыяз тэтча. Пие сямен: топ-топ-топ…
— Мама, мама, малы татын сомында дыдыкъёс?
— Сиён утчало.
— Вай соосты сюдом.
— Ме, пряниктэ пыргыты.
— Мынам кампетэн сюдэме потэ.
— Соос кампет уг сиё.
— Уг сиё?! Иське, пряникен… Гули-гули-гули…
«Тот солдат не вернулся из боя…» — шӧдтэк шорысь шуккиськиз мышкам. Куара шоры берытскыса, адӟи егит воргоронэз. Ымнырын учкымон, нош ачиз сӧсыръёслы лэсьтэм коляскаын — кыкез но пыдъёсыз макесозяз ик вандэмын.
То, что пусто теперь, не
про то разговор:
Вдруг заметил я —
нас было двое…
Для меня словно ветром
задуло костёр,
Когда он не вернулся
из боя…
Кырӟанлэн кылъёсыз гитара куараен ӵош сюлэмез венен бышкало.
— Мама, мама, малы-о агай бӧрдэ?
— Со кырӟа, уг бӧрды.
— Бӧрдэ, бӧрдэ, синкылиосыз вань, мон адӟи.
— Эшъёссэ, дыр, тодаз вайиз.
— Нош кытын-о солэн эшъёсыз?
— Кулэмын, дыр.
— Кулэмын?! Малы?
— Уг тодӥськы…
— Эрекчаськод, тон ваньзэ-ваньзэ тодӥськод.
— Агайлы кампет сётом-а?
— Мон, мон сёто! Медаз ни бӧрды, о-о?
— О-о, мын сёт…
Автобус лыктӥз но, калык пӧлын люр-ляр, чир-вар кылӥськыны кутскиз. Я нылпи бӧрдэ, я бадӟым сумкаосынызы ог-огзэс донго-мыжго, собере кесяськыны, даллашыны кутско. Пересьёс сэзь егитъёсты «визьманы» тыршо, нош соосыз, ужпи-эрвалъёс кадь гырдалляса, азьлань сётӥсько. Осто, Инмаре, билетын пусъем интыям ноку но уг ни пуксьы кожасько вал…
Интыяськи но нырысь ик учкалтӥ бускельме, буйгатски поннам: татын коть удалтӥз, тусызъя тордослы но, наркоманлы но уг кельшы кадь. Ог ньыльдон аресъем воргорон. Кышномуртъёсын ӵошатыса, пиосъёсын сюрес вылын умойгес: соос шып пуко, нош верасько ке, мултэссэ уг нуйто, лул пушкы чуртнаськыны уг туртто. Тани али поездын мӧйы кышномуртлэсь чылкак вуёмӥ сюрес ӵоже, вань ӵыжы-выжыеныз тодматэм сяна, со мыным кӧня улон дэмланъёс, индылонъёс сётыса вуттӥз на! Пыжиськоно озьы, керттӥськоно тазьы, нош картэз бордын возёно туж зол… Серем, мон сое номыр сярысь ӧй юа ук…
— Тӥ, оло, укно дуре пуксёды? Пияшлы озьы шулдыргес луоз…
— А? Мар? Укно дуре? Тау. Пуксём-а, пие?
— Пуксём, пуксём! Мон, укное учкыса, мыно, оло, гондырез нюлэскысь адӟо. О-о-а, мама?
— О-о, — шуи мон мынектыса.
— Нюлэскысь гондырез ум адӟе, дыр, нош бусыысь ӟичыез яке лудкечез, оло, адӟом но, — пальпотӥз бускельмы. — Инвожое соос трос гинэ бусыостӥ калгоно луо… Нош табере, пиёк, вай тодматском.
— Мон Илья, — черектӥз пие.
— Нош мон Ильич, — кизэ мычиз соиз. — Асьмеос тёзкаос выллем.
— Кин со тёзка?
— Огкадь нимо адямиосты озьы шуо. Тон Илья, нош мынам тятяе Илья вал, озьыен, мон Алексей Ильич.
— Фу, Алексей Ильич мыным уг кельшы. Мон тонэ тёзка шуо, ява?
— Яралоз, — серекъяз бускельмы. — Нош анаедлэн кызьы нимыз?
— Вералом-а, мама? — пие пырсйиз но, ваземме возьматэк ик, шуиӟ — Мама Оля.
Соослэн вераськоназы мон ӧй пыриськы. Кузь сюрес котьку жадьытэ, тужгес ик огнад пиналэн ке. Пӧсь шунды улын автобус лэйкамъя мон огсыр каньсырай, синъёсме кыни но ас дуннеям выйи. Ум пыртӥм кылылӥ вӧзысьтым адямиослэсь куд-ог кылъёссэс.
— Лымы усиз ке… вить арес тырмоз. Куное мынком… Москваын улком… Уг, уяны уг быгаткы… Чорыганы но уг быгаткы… Компьютерен быгатко… Мама дышетӥз… Нош тон быгаткод-а?
— Уг.
— Нош мар быгаткод?
— Котьмар…
— Мар котьмар?
— Кырӟасько, гитараен шудӥсько…
— Кырӟа али…
— Али уг, мамаед сайкалоз но асьмеды тышкаськоз.
— Ку кырӟалод?
— Берло… гуртэ вуим ке…
— Нош чорыганы дыше-тод-а?
— О-о.
— Митяез но-а?
— Кин со?
— Митя со Митя. Гуртын улэ… Ми со доры мынком… Пунызы ту-уж бадӟым… уг, уг куртчылӥськы. Нимыз Музгарка… Муз-гар-ка…Муз…
Шунды пиме но умме уськытӥз. Мон сое лап-лапгес алвылам интыяй но пӧсям йырзэ ныркышетэн ӵушылӥ, лачмытак ки вылам понӥ.
Автобус огсыр ширтэ асфальт сюрестӥ. Котыр инвис дорозь бусыос, бусыос, бусыос, соос висъяллямын нюкъёсын но шер-тур писпуо сикъёсын. Со бусыос пӧлын ик куддыръя адскыло пичиесь гуртъёс. Сюрес вожын пулъёсын нимъёссы гожтылэмын, нош соос йыре уг кылё, иськем сьӧры иськем ортчыса, вуно. «Нош кинъёс ке но татын уло, будо, кышноясько, пинал вордо… Кинлэн ке но та дорез… Тани кин ке но ыжъёсты возьма. Кечъёссы куинь-ньыль сяна ӧвӧл, озьыен, гуртоос ваньмыз сямен скал вордо… Мар со кеч? Одӥгназ кылем пиньтэм песяй гинэ соин сюлэмзэ буйгатэ… Кӧня гужем меда мон но ыж возьмай? Нырысь ветлӥ мамаен тятя сьӧры, собере апаен, агаен ӵош, нош студент вакытам каникулъёсы мон сьӧры ветлӥзы ни агайлэн пиналъёсыз… Кӧня ар? Дас? Дас ньыль? Ку со вал? Монэн-а со вал? Табере мама но, тятя но, доре но, ыжъёс но ӧвӧл ни…» Тодэ ваёнъёс чыртыям кырмиськизы но синъёсме нюромытӥзы. Шуге-леке вуэмме бускеле но шӧдӥз, лэся:
— Ӝокыт-а? Оло, укноез бадӟымгес усьтоно?
— Ӧвӧл-ӧвӧл… Пичи дыръёсме тодам вайи но, кӧты куректыны кутскиз.
— Тодмо югдур… Гуртысь потэм адямилэн висёнэз… Москваын улӥсьёс но-а соин висё?
— Уг, дыр. Мынам одӥг тодмое вань, со бадяр но кызьпу куаръёсты но висъяны уг быгаты, со воксё уг тоды сыӵе писпуосты, тодэмез но уг поты. Мыным, пе, со чик но кулэ ӧвӧл, мыным, пе, со чик но улыны уг люкеты, мон, пе, сое тодытэк но, коньдон жильдыны быгатӥсько… Тӥни озьы… Нош мон мӧзмисько… Кинлэсь? Малэсь? Одӥг кылын сое уд вера. Со мӧзмон но ӧвӧл — кӧткуректон… Со вире, дыр, пыӵамын… Гужем мынам одӥг кырӟанэ: «Гуртэ! Гуртэ!» Маскара…
— Зэмзэ маскара. Чеховлэн героиняез «В Москву! В Москву!» шуыса гурла вал.
— Чеховез яратӥськоды?
— Уг. Кылэме вань…
Бускеле чалмиз, ӧз ни вазьылы, мон выльысь синъёсме кыни но ас дуннеям выйи. «Апае дораз-а, ужын-а меда луоз? Дораз, дыр, возьма, дыр, удмурт сямъя пыжиськиз, дыр… Мама но котьку пыжиськыса возьма вал монэ, сюрес вылысь кунозэ… Табере тани апае… Ӟеч сям одӥгез дорысь мукетыз доры выже… Нош мон ыштӥ, луоз, со сямез… Москваын со нокинлы кулэ ӧвӧл. Собере дыр но ӧвӧл… Собере гур но ӧвӧл… Собере… Ӵок, уг малпа ни со сярысь… Коть малпа, коть эн, табере номыр уз воштӥськы ни…»
Секыт малпанъёсылэсь пегӟыны турттыса, синме усьтӥ но чылкак паймӥ азьпалан, гоп улын, шӧдтэк шорысь вӧл-вӧл адӟиськиз ӝужыт черко гурт. Пиме сайкатӥ. Со чоркак! султӥз.
— Вуим! Вуим! — кесяське. — Нош Митя асьмеды пумиталоз-а?
— Пумиталоз, дыр. Жин-гыртӥм вал.
— Музгаркаен ӵош-а?
— Уг тодӥськы.
— Нош Зояпай пуми-талоз-а?
— Тӥни соос ваньзы пумитало ни…
— Ура-а-а!!!
Ми вуим. Мон — пичи дыр тодэ ваёнъёсам, пие — куное. Котькудмы — шумпотон но яратон дуннее. Из дуннеысь — инкуазе. Ӟыгыръяським… Чупаським… Синвуаським… Паймыса лулӟылӥм… Серекъям… Ог-огмылэсь тыбыръёсмес топ-топ вешам…

* * *
Уйин гудыръяса, чилекъяса ик зориз. Мон шӧдӥ но корказе потоно кариськи. Отын тубатын кырси, тамак кыскыса, пуке вылэм:
— Мар уд изиськы?
— Коркан ӝокыт…
— Корказь ӧсэз, оло, пытсалом, уть, кыӵе кисьтэ.
— Эн, эн, омыр туж юзмыт, умой. Городын таӵеез ӧвӧл…
— Мар пӧртэмез луоз? Омыр но омыр… Тӥ, городъёс, мудронгес выриськоды… Я, мон пыри, огнад уд кӧшкема-а?
— Уг…
Мон огнам ӧй вал. Монэным зор вераськиз, нош мон — соин. Котькудмы — ас кылынымы. Ӧс вискытӥ кырымпыдэсме мычи но — со жаль-ль! тырмиз зор вуэн. Мон ымнырме гылтӥ. Собере ӧс вискы быдэсак йырме мычи. Сӥялэс небыт зор вешаз чыртыме, гадь бордам йӧтӥськыса, быдэс мугорме маялтӥз но пыдчиньы вискытӥм выж вылэ, собере музъеме вияз, пыӵаз. Мон зорен ӵош огдыре серекъяй но бӧрдӥ, кынмемме шӧдыса ини, ӵукна пал зыми пие вӧзы шуныт валесэ.

* * *
Сайкай бер. Азбарын я бакчаын куараос кылӥсько.
— Коньы пилы ке но юрттыны ветлоно шат? — таиз кырси.
— Бон ветлы… Мар со отын огназ кароз? Кор ӝутон, сётон — кӧня отчы ки кулэ… Веме кароно вал солы, веме… — таиз апае.
— Ачиз тодоз…
— Тодэ, дыр, но — юрттӥсез ӧвӧл… Ярам, Прокопыч коть уг адӟы тазэ но, гуртысьёссэ но… Кыӵе семья вал, кыӵе семья…
— Я, ветло ай.
— Мын, мын… Нош мон Оляез сайкато… Нылпиос нош кудлань кариськизы? Кытчы? Ыж возьмасьёс сьӧры? Малы? Адӟид ке, ысты доре… Табань, шу, пыжо…
Апай пыремлэсь азьло мон потӥ азбаре. Со ӵукна кыскем йӧлзэ мунчо азяз пуж-пуж сӥсъя вал.
— Юод-а? — пальпотӥз.
— Уг, уг, мон ведь таки йӧл юыны ӧй дышы.
— Маин мон тӥледыз утялтом ини?
— Табанен… Вай зырет ке но лэсьто.
— Быгаткод-а?
— О-о, мама куке но дышетӥз вал…
Со куспын капка ӧс ларак! усьтӥськиз но, нылпиос, люр-ляр! кесяськыса, азбаре пыризы.
— Мама, мама, учкы ай, мар мон шедьтӥ!!!
— Гудырипуз! Кытысь со быдӟа?
— Мон сое рюкзакам поно но сьӧрам нуо, тятялы возьмато, ява?
— Ява.
— Нош тон мар каркод? — пие, пукон вылэ султыса, йырыныз ик, оло, зырет пӧзьтон посудае мыкыртӥськиз.
— Зырет.
— Мар со? Эрекчаськод, эрекчаськод, со йӧлвыл… Нош ческыт-а?
— Туж.
— Вай оскалто.
— Зыретэз табанен сиё. Зояпаед тӥни гурзэ эстӥз ни, али ик табань пыжоз.
— Нош тон малы уд пыжиськы?
— Уг быгатӥськы.
— Уд быгаткы?! Опеть эрекчаськод. Тон, мама, ваньзэ, ваньзэ быгаткод.
— Ваньзэ, нош табань пыжыны уг быгатӥськы.
— Иське, дышетскы.
— Шонер… Тани гуртэ корка басьтӥм ке, отын гурез луиз ке, мон одно ик дышетско.
— Аьмеос гуртын улом?! Корка басьтом?! Ура-а-а!!! Нош пунымы луоз-а? Митя-а-а! Митя-а-а! Ми но ӝоген гуртын улом! — пие, ури-бери бызьыса, корка пыриз.
Сиськеммы бере апай пиналъёссэ кырсилы сиён нуыны косӥз. Йӧл, табань, пӧзьтэм курегпуз, пыжем курег.
— Кытчы сомында?
— Бон со огназ ӧвӧл ук, Коньы пиен ӵошенназылы…
— Кинэн?
— Вӧзысьтымы бускель нергемес озьы шуком. Прак бускель ке но ӧвӧл, кык юрт ортчыса, улэ, азьло туж тупаса улком вал соосын.
— Нош мар луиз?
— Та шутозь ваньмыз куашказ… Я, тӥ мынэ ни ӝоггес, — дыртытӥз со пиналъёсты. — Эн алякъяське, йӧл посудаез эн сӧре… Нырысь атайзы, Прокопыч, шӧдтэк шорысь кулӥз, туж ӟеч адями вал, огвакыт предын но ужаз, гажало вал сое гуртоос… Нош собере бӧрсяз ик кышноез но, Коньы кышно, кошкиз. Таза кышномурт вал, ӧз но кадь висьылы, нош Коньыез кулӥз но, шуак куасьмиз, бездӥз… Вот кызьы луэ, ява, паймод но бырод… Юртъерзы городын улӥсь пичи пизылы кылиз, нош соиз кышнояськымтэ, оломарзэ малпаса улэ, ньыльдонлы, оло, матэктэ ини. Татчы шер бертылэ, араз куинь-ньыль пол сяна уг, дыр. Ярам, улмо садзэс ӧз аналты, сое ке но утялтыса возе…
— Нош со корказэ уг вуза-а?
— Уг тодкы… Тани али, кылӥськиз, вуж юртсэ сэрттыны бертэм. Кык юртэз хозяйствояз вал — вужез но вылез, ог дас ар талэсь азьло гинэ Прокопыч пуктӥз вал корка. Мон тани Володез юрттӥськыны ыстӥ, мар со отын огназ лэсьтоз? Корка сэрттон — со шудон шат? Агайёсызлы но йыры кур: татын улса вылысь чиньыенызы но пичи Коньы пизылы уг юртто. Мар адямиос, чылкак паймисько… Нош соиз, пичиез, йӧнъяське-а, мар-а, уг тэльмыры… Кыӵе семья вал ас вакытаз, кыӵе семья… Нош тон малы вузан сярысь юад, оло, басьтӥсь шедьтысал? Гуртмы городлэсь кыдёкын, басьтӥсь но, дун сётӥсь но шедёз меда?
— Оло, мон ачим ик басьтысал…
— Тон? Мускоысь гуртэ бертыны малпаськод?
— Уг. Нош пу корка — со пу корка. Со дор, со музъем, со выжыос… Нош город квартира — со из квартира, со дор ӧвӧл…
— Оля, оломар эн вераськы. Мускоын улса, татчы корка басьтыны? Малы? Кинлы?
— Аслым, пиелы. Ми татын соин быдэс гужемзэ улысалмы.
— Оло, ми дорын уг кельшы? Инты-а уг тырмы?
— Апай, мон чылкак мукетыз сярысь… Я, вай со сярысь дугдом… Мон озьы гинэ…
— Бон со сярысь Коньы пиен асэныз вераськоно. Ӝытазе, иське, ветлом ай дораз.
Ӝытозь мынам мылкыды сизьым пол ни воштӥськылӥз, апаеным нуназе вераськеммы но тӧлӟыны вуиз. «Коньы пи» шуэмез гинэ сюлмам кугӟаз, угось палэнысь муртлы туж маскара кылӥське. Коньы пи. Малы озьы? Юаны медӥсько вал но, апае весь гурт ужезъя маке бызьылӥз-бергаз. Собере вунэтӥ. Собере малпай, воршуд нимзы, дыр, сыӵе шуыса. Мынам со сярысь кытысь ке но лыдӟеме вань. «Тодматсконо ик со Коньы пиен — тунсыко учыр…»
— Мама, мама, тод, мар мынам киям? — азбар капка дорысен ик черекъя пие.
Нунал лумбыт олокытын калтыртӥзы, тау Инмарлы, вуизы ик доре. Куаретыны шуыса ымме усьтӥ ни вал но, со ныр улам ик пичи кырсь мыжыксэ мычиз.
— Тод, мар татын?
— Ӟоз, — шуисько, пӧртэм нымы-кибыосты яратэмзэ тодыса.
— Ы-ы, — йырыныз шона.
— Оло, кузьыли?
— Шузи, со куртчылӥське ук!
— Сяська, мыным, дыр, кузьмалод.
— Ы-ы…
— Иське, иське… узы.
— Шедьтэм маин ушъяськыны, — вераськонмес уретӥз Митя. — Сётӥз кыӵе ке сыномем уксё. Зэмзэ уксё ке лусал, ӧй но сётсал…
Пие со вылэ мыжыкъёсыныз омыртӥськиз но туӵ-таӵ гинэ коканы кутскиз. Нош Митя солэсь кык поллы бадӟым, серекъяса палэнтӥське, мынамезлэн бӧрдонэз ымдураӟ «Малы верад, малы верад?» Со вискын пичи жугиськисьлэн мыжыкез усьтӥськиз но, отысь зэмзэ но коньдон питыраз. Ӝутӥ но ас синъёсылы ӧй оскы. Чылк-чылк азвесь. 1825-тӥ ар.
— Мар та? Кытысь?
— Тёзка сётӥз… Мамаедлы, пе, кузьма, шуиз…
— Кыӵе со тёзка? Коньы пи со, — уретӥз Митя. — Уксёез но так себе. Эшшо ке кузьым, пе, кыӵе ке сыномем вуж корт…
— Тёзка со, тёзка. Со ачиз озьы шуиз, о-о ведь, мама? — юрттэт курыса, пие учке шорам.
— О-о, — ваньзэ валаса, пальпотӥ пумитаз.
«Тӥни кин вылэм со Коньы пи…» Коньдонлы мон шумпотӥ, нош кузьымлы пайми. Малы мыным сётэм со та дунолэсь но дуно арбериез? 1825-тӥ ар. Оло, ачиз Александр Сергеевич Пушкин кутылӥз та коньдонэз ас кияз? Яке Грибоедов? Яке мукетыз кин ке бадӟым адями? Яке… Мон чылкак гуньдӥ, улэп историез кырымпыдэсам возисько кадь. «Ӧвӧл, тае одно кузёезлы берыктоно…»
— Кузёзэ табере уд шедьтэ ни, — серекъяз выль тодмое, лыктэм мугме тодыса. — Мумыкор улысь мон сое шедьтӥ, нош корка даур кутсконэ, дыр, ӝутэмын… Пересьёс дэлетлы шуыса понӥзы, дыр, вал…
— Табере тӥ кузёез.
— Мон соин уг узырмы, эшшо ке ышто, нош тӥ, малпай, кулэезъя дунъялоды, синпельлы кельтоды, утьыны но быгатоды.
— Тау… — мон ӧй ни тоды, мар вераны.
Нош Коньы пи кыштыр берга корка сэрттон югдураз. Арня ӵоже вырыса, музъем дорозь вуэм ини, нош ужез — бералъям сисьмем коръёс, пулъёс, сыномем кортъёс шоры учкыса, валай — быронтэм. Пыд улам ик кыӵе ке паньгам тусьты лошъяське, палэнынгес лачмытак интыяськем эгырен ужась вашкала чугун утюг. «Таиз ини воксё музей арбери… Нош куке но кин ке но сое кияз кутылӥз, эгыр тырылӥз…
Та коркан пӧзиз улон…»
— Жаль ӧз поты-а сэрттыны? — ӧй ик шӧды юамме.
— Нош тӥ кызьы малпаськоды?
— Жаль, дыр.
— То-то угось… Мон ведь та коркан вордскемын но будэмын… Сэрттонъям паймиськӧ кызьы та пичи коркан тямыс кузя улӥмы? Куать пинал но мамаен тятя… Пичи дыръямы ноку но ӟоскыт ӧз потылы… Тӥни со корт гур дуре пуксиськом вал тол ӝытъёсы, нош тятя гур вылын вандылыса картошка пыже… Ох, ческыт потэ вал! — пальпотэ Коньы пи… — Сэрттытэк ӧйлась, корка сисьмиз, собере кышкыт — пиналъёс-йырвандӥсьёс шудонъязы тыл но понозы.
— Нош созэ коркадэс уд вузаське-а?
— Уг, — собере, кема-кема чалмыт улэмез бере, шорам мыр-мыр учкиз. — Малы юаськоды?
— Оло, пӧй, басьтысал…
— Ха-ха-ха!!! — мылысь-кыдысь серекъяз со. — Малы со тӥледлы? Москваысь — татчы? Нош ужды? Татын ведь библиотека гинэ но ӧвӧл… Нош серекъятэк ке… Дорез вузаны луэ шат? Кызьы малпаськоды?
— Уг, дыр…
— То-то угось… Мон со вузам коньдонэн уг узырмы… Мон… — кескич но пальпотыса учкиз шорам, — мон… тӥледлы сое уг вуза, кузьмало…
— Кызьы… кузьмалоды?..
— Мама, мама, учкы ай, кинэ мон шедьтӥ, — урамысь бызьыса вуиз пие. Кияз — кык синтэм коӵышпиос, нош мышказ, соосты кутыны турттыса, тэтча Музгарка.
— Кытысь соос?
— Митяослэн. Корка сигысьтызы. Соос отын вить кузя, но мынам ваньзэс ваеме ӧз луы, чаль ӝоггес, учком… Тёзка, тон но чаль… Кулэ ке, одӥгзэ мон тыныд кузьмало…
Ми гор-гор серекъямы.
— Нош мон тани мамаедлы корка кузьманы ӧдъясько.
— Зо-ол! Зэмзэ-а, мама? — пиелэн синъёсыз ик питырскизы, чиляны кутскизы.
— Агай эрекчаське яке асьмеды серекъя. Сыӵе кузьым сётыны туж бадӟым муг кулэ. Я, пие, кошким… Ӟеч луэ…
— Тёзка эрекчилы уг кельшы… Тон ведь ӧвӧл эрекчи?! — мышлань берытскыса, кеськиз пие.
— Ӧвӧл, — серектӥз соиз.
— Кылӥд-а, мама?
— Кылӥ, кылӥ, ойдо ӝоггес…
«Валантэм со Коньы пи… Малы со озьы вераське?..»
Та юан быдэс уез портӥз йырме.

2000-тӥ ар

Удмурт Дунне
By Удмурт Дунне Июнь 29, 2016 16:50