Вал куре куро

Удмурт Дунне
By Удмурт Дунне Июнь 16, 2016 10:38
SONY DSC

Ижысь ипподромысь валтӥсь зоотехник Л. Белова вятка выжыысь валэн.

Котькин яратэ ческыт сиськыны

Ижысь ипподроме люкаськылӥзы пудо, тылобурдо будэтӥсьёс, муш возисьёс. Котькудӥзлэн аслаз азинскон амалъёсыз.

 Мушъёс туэ лябесь

Можга ёросысь «Россия» хозяйствоын муш возё. Араз 20 тонна чечы кыско. Пасека оскемын Василий Поповлы. Соин артэ мылысь-кыдысь ужа Валентина Ивановна кузпалыз.

— Муш пинал кадь: туж кулэ каре чакламез, — вера Валентина Попова. — Со туж ӝог сётӥське пӧртэм черъёслы, уг чида кезьыт куазез. Туэ туж трос адямиослэсь кылӥ, муш семьяоссы быризы шуыса. Кылем арын куазь кезьыт но зоро вал. Мумы муш курадӟиз, пи поттыны бер кутскиз. Нош бер быгыльскем мушъёс сӥзьыл юнмаса уг вуо. Озьы егит мушъёс начаресь кылизы. Зорен сэрен сиён бичаны ӧз быгатэ. Мушкасьёс сиён тыризы ке но, лябӟем мушъёс чебертӥськыны ӧз быгатэ. Эшшо ке соос борды кутскиз акарапидоз чер.

Синмын адӟыны луонтэм тэйёс мушлэсь шокан ёзвиоссэ ӵоксало. Азьло но та чер вал. Но сокем зол ӧз вӧлмылы, мушъёс но юнэсьгес вал, нюръяськыны быгатылӥзы. Урод куазь тэйёслы аляны луонлык сётӥз. Ярам, шокан ёзвиоссэс гинэ ӵоксасалзы ке! Тэйёс мушъёслэсь бурдъёссэс йыръё. Соин ик умортоысь лобӟыны ӟигарзы уг луы.  Лыньыр-ланьыр лэзьям бурдъёссыя ик валаны луэ, таос черламын шуыса. Кулонзэс шӧдыса, умортоысь музэ уськытӥсько, уллёен люкасько. Бырем мушъёсты одно ик сутоно, тэй азьланяз медаз вӧлмы шуыса.

Жаляса верано, акарапидозэз воксё быдтыны уг луы. Али, чечы люкан вакытазы, тэйёсын нюръяськыны уг но яра. Но август пумын, чечы кыскем бере, одно ик йӧнатон борды кутсконо.

Аптекаосын вузаське муравьиной кислота. Таин одно ик умортоосты тазатоно. Со сяна, туж ӟеч юрттэ «Муравьинка» порошок. Сое рамкаос вылэ тыроно но шобыртоно. Висись мушъёсты умортоосынызы валче садлэн воксё мукет сэрегаз интыяно. Бушъёссэ чуркаосты быректэм вуэн пылатоно. Чылкыт мушъёсты умойгес луоз воксё выль умортое пыртыны. Тэйёс умортолэн висъёсаз но кылё уго.

Али котьма сяськаяське ке но, мушъёслы юнманы юрттоно. Азязы котьку медло сиён. Мон кыз, ньылпу вайёсты быректэм вуэ котӥсько, пӧлаз чеснок понӥсько. Ваньзэ тае 2 нунал ӵоже вуын пукетӥсько. Отӥяз чечыен огмында сурасько но мушъёс азе пуктӥсько. Та туж пайдаё сиён. Вайёс тӥяны мылкыдды уг тырмы ке, чечы кыскем бере бушам рамаосты ке но быректэм вуэн пылатэ. Ӵапак со вуэз ик умортоос азе интыялэ. Мушъёслы та но юрттоз ӟигар люканы.

Чечыез кыскыны вазь на — кисьмамын ӧвӧл. Собере, али ик чечы кыскиды ке, мушъёс чечы люканы уз быгатэ ни — ӟигарзы уз тырмы. Семьяосты юнматэмды потэ ке, одӥг умортое одӥг мумы муш кельтэ, тазазэгес бырйыса, нош мукетсэ вие, соку люкиськыса уз палдэ ни. Люкиськизы ке, кыкез но семья бырыны быгатоз, ассэ сюдыны вормытэк, — шуэ Валентина Попова.

 Малы кулэ изнэс?

Туала вакытэ шаерамы ог 20 хозяйство вал возе на. Ижысь ипподромысь валтӥсь зоотехник Людмила Белова верамъя, уноез сое возё сӥльыз понна. Ческыт, небыт, диетической. Соин ик дуно.

— Сӥль понна тяжеловоз выжыысь вал вордоно. Спортэн выремды потэ ке, туж тупалоз ӟуч я орловской рысак. Гидын возьыны тупа вятка выжыысь вал. Таиз ваньзэ чидалоз, кырын но улыны быгатоз. Котыраз берганэз но трос ӧвӧл. Сюдыны гинэ эн вунэтэ. Яратоно сиёнэз — куро но сезьы, — шуэ Людмила Белова.

Валлэсь тазалыксэ нырысь ик возьматоз изнэсэз. Адямилэн тазалыкез ляб ке, йырсиез усе, валлэн но изнэсэз шер-тур кыле, чилямысь дугдэ.

Гужем изнэс пудоез уте пӧсь куазьлэсь, куртчылӥськись нымы-кибыослэсь, толалтэ — кезьытлэсь но лек тќллэсь. Но мултэс кузь изнэс валлы люкетэ гинэ: синмаз пыре, бичатэ, ӵабъя. Со сяна, кузь изнэс олокытчы но шедьыны быгатоз, валэз вӧсь кароз. Соин ик изнэсэз ӵышконо. Тугаськем интызэ сынано. Со понна кулэ шер пинё но котыртэм йыло сын.

Та сяна, изнэсэз толэзяз огпол ке но миськоно. Сотэк тэйӟыны быгатоз. Нимысьтыз кондиционеръёс вузасько. Эсьма, нюлам кузэ но буйгатоз. Ассэ валэз но дырын-дырын миськыны кулэ. Гид котьку чылкыт но кӧс медло. Одно тӧлатоно. Пӧсен вал уродмыны быгатоз уго.  Уката ик гидын мускытэз трос ке. Валлэн азьысьтыз ноку медаз быры чылкыт ву. Пӧсь куазен валэз кужмысь ужатыны уг яра. Мылкыдыз бызьылыны гинэ но ӧвӧл ке, эн исалэ. Но инкуазе одно ик ӝыт салкым луэм бере ке но поттано. Кызяны шер кутскиз, мылкыдыз ӧвӧл, сиськемысь дугдӥз ке, озьыен, валэз шунды шуккиз. Капчигес мед луоз шуыса, кезьыт вуэн вылтӥз кисьтэ. Но воксё ӟырт кезьыт медам луы. Ассэ но кезьыт вуэн люкталэ. Соку ик ӧте пудо эмъясез. Вал уго кулыны быгатоз.

Пудо таза медло шуыса, бадӟым саклык висъяно выжлы. Гидысь вал уггес пота ке, пыдъёсыз медаз быре шуыса, куро зӧк вӧлдоно — саникез бышкалтӥды ке, музозь медаз йӧты.  Сое ӵемгес вошъяно, пушказ олокыӵе но тэйёс медаз каръяське шуыса. Соку валды тау кароз.

 Кролик парсьпилэсь дунтэмгес

Дэри ёросысь Якшур гуртысь Павел Николаев 5 арзэ ни тӧдьы великан выжыысь кроликъёсты вордэ, фермер кариськыны медэ. Та пелёосты шаерамы будэтӥсь ӧвӧлгес. Нош сӥльызлы магазинъёс туж вожмасько.

— Татчыозь кролик вордымтэ муртлы дэмласал тӧдьы великан выжы бордысен кутскыны. Огшоры кроликен ӵошатыса, сӥлез тросгес потэ, ӝоггес будэ. Нош гигант выжыысь кроликъёс асьсэ котыртӥзы бергамез ярато, ӵемгес висё.

Тӧдьы великан выжыысь кроликез комбикормен сюдоно. Дуно усёз шуыса, эн куректэ. 100 грамм кешыр сётӥды ке, кролик 100 грамм комбикормлэсь кадь ӝог уз буды. Комбикормын калориез тросгес уго. 1 кроликлы вордӥськемез дырысен вандытозь 14 килограмм комбикорм кошке. Со сяна, 7 килограмм куро. Парсь талэсь уногес сиське. Дунзэ ӝог берыктоды. Собере, пелёос котыртӥ берганэз но трос ӧвӧл, нурскетӥсь котыртӥ кадь. Огез понна сюлмаськоно: азьысьтыз ноку медаз бырылы чылкыт ву но сиён. Кроликлэн уго ӝушез мешок кадь, солы ялан бичаськыны кулэ.

Кроликлы турын но, бакча сиён но сётыны луэ. Но одӥг сиёнлы дышиз ни бере, малы ӝушсэ шугомытонэз? Собере, бакча сиёнлэсь кӧтаз но йӧтыны быгатоз. Огкадь сиён сиыса, пелёос шергес висё.

Кроликъёслэн сӥльзы ымын сылмись небыт кунян сӥль кадь ческыт. Но тазьы медло шуыса, пелёос асьсэ кыедэнызы медаз шокалэ. Со понна карез озьы лэсьтоно, кыед отын люкаськыса медаз улы. Выжзэ рейкаослэсь шукконо, виссэс чиньы тэрымон пась кельтыса. Ӵапак со висъёстӥ ик кыед музэ усе. Музъем вылэ медаз люкаськы шуыса, улаз тусь пуктыны луэ. Сое утялтыны вунэтоно ӧвӧл. Со сяна, каре гумы интыяно, со гумы кыре мед потоз. Ӵапак отӥ ик чылкыт омыр пыроз. Зэм, кроликъёсты меӵак пиштӥсь шунды шорын возьыны уг яра — шугомозы. Карзы шунды шорын ке, вужере ватскон интызы медло.

Тӧдьы великан выжыысь кроликъёс ёркыт интыез уг ярато. Вӧл-вӧл интыын возиды ке, 4 толэзь куспын 3 килограмм 800 грамм люкалозы. Огез мумы 7-9 кролик поттэ, пиоссэ туж чакла, уг сиы. 9 арня ӵоже нонтэ, та дыр ӵоже пиос юнмало, висёнъёслы уг сётско.

Елена Сараматова

Туспуктӥз В. Беломорских

Удмурт Дунне
By Удмурт Дунне Июнь 16, 2016 10:38