«Удмурт луны — вот мода!» Мар сярысь вера выль герой?

Удмурт Дунне
By Удмурт Дунне Июнь 21, 2016 15:28

2014-тӥ арын Богдан Анфиногенов «Айшет будущего» нырысетӥ кылбур бичетсэ печатлаз. Туала удмурт литературалэн улоназ со луиз тужгес тунсыкоез но яркытэз учыр.

богдан анфиногенов

Б. Анфиногенов мар ке витьымтэзэ усьтоз на.

Инбам интыын — Интернет

Егит кылбурчилэсь чуръёссэ азьло но вотэсын лыдӟыны луэ ни вал. Б. Анфиногенов — нырысетӥез удмурт сетевой поэт. Кык кылын гожъяськон манерзэ ушъясьёс но, курласьёс но сюризы, кинлы ке со потӥз тузӥ, нош кин ке адӟиз отысь мур пуштросо концептэз. Но валтӥсез, мар удалтӥз карыны Анфиногеновлы — со ваньмызлы тодазы вайытӥз, удмурт кылбурет улэп на шуыса, калыкез тун-сыкъяськытӥз кылбуръёсыныз.

Зэм, удмурт литературалы кулэ вал ини выль герой, асьме дырлэн героез — мон малпамъя, ӵапак Богдан сыӵе геройлы пӧрмиз. Со ачиз но шуэ: «Я стану посланием современным российскому финно-угру». Туала улон, кылдэм югдур сярысь малпанъёссэ со ас сямыныз, ас кылыныз вера. Кылбуретаз возьматэ туала улонлэсь туссэ, урод но умой тодметъёссэ, висёнъёссэ. Удмуртлыкен герӟаськем юанъёс книгаын валтӥсьёсыз луо. Кыӵе со туала удмурт? Мар сярысь малпаське? Мар сое висьытэ? Кытчы со кыстӥське? Марлэсь кышка? Кылбурчи та юанъёслы валэктон сётыны тырше, лыдӟисез но косэ малпаськыны асэныз ӵош.

Та бичетысь кылбуръёсты но поэмаосты оглом романэз кадь лыдӟыны луэ, соосты герӟа одӥг лирической герой — егит удмурт пияш, кудӥз гуртысь каре вуэ. Со ыштӥськемын, ассэ валаны тырше, аслыз инты утча. Нырысь кар — со тодмотэм инты, татын верасько ӟуч кылын (ма, герой ачиз но). Карлэн тусыз кылдэмын Ижкарлэн тодмо интыосызлэсь: завод, цирк, пруд. Карлэн но гуртлэн тусъёссы ог-огзэс вошъяло — лирической герой вордӥськем черкогуртсэ, песянаезлэсь гуртсэ ӵемысь тодаз вайылэ. Карлэн тусыз пумен воштӥське — татын но удмуртъёс вань вылэм. Соос уг кельшо ни гуртын улӥсьёслы, соос ветло уй клубе, юо «кока-кола», паймымон эктонъёс экто — но со дыре ик удмурт луэмзэс шӧдо: «уже под звуки house-твиста/ бренчат удмуртские мониста», «Я пил Kumyshku. Мешая с бренди./ Крутая фишка. Как Уорхол Энди».

Автор суреда, ма ортче туала удмурт культураын, сое мифез сямен вера. Кӧня ке дыр ортчыса, Богдан Анфиногенов печатлалоз «Дарт» газетын туала удмуртлэсь манифестсэ, нималоз сое «постэтнофутуризм», но «Айшет будущего» книгае пырем текстъёсаз ик ини со вера со сярысь. Та книгаын дунне кылдытэмын, туала удмурт лулчебертлэсь реалиоссэ, воршуд нимъёсты, вашкала мифъёсты сураса урбанизмен, карен, кытын вылысьтыз вылаз ошылэмын нимпулъёс (вывескаос), кытын котьмалэн вань аслаз дуныз, кытын брендъёс котькуд сэргысь пишто. Со дунне вадьсын кизилиё ИНбам интыын — ИНтернет, нош отын аслаз кизилиосыз, соослэн нимъёссы но ӵем гинэ сюро книгалэн бамъёсаз. Глобализация дуннеез огкадь но ӵошкыт каре, но удмуртъёс, уйин каръёсысьтызы потыса, со огкадь дунне вылэ удмурт пужыос суредало, удмурт кылъёс гожъяло. Милемлы кулэ ӧвӧл мӧзмыт ӵошкыт дунне, шуэ автор, мед со луоз айшет выллем — ворпо, яркыт:

На перепутии

Сылэ со, ми тусо,

Мультиудмуртии

Разнобуёловый фасон.

Гуртын ортчем нуналъёс сярысь тодэ ваёнъёсыз мӧзмонэн пыӵамын. Кыӵе ке но огшоры чыры-пыры ужъёс романтизм пыр, чебермаса, ӝутӥськем мылкыдын возьматэмын: куштӥськем фермаетӥ калгон но, картошка урон но, сугон сузян но. Но гурт но воштӥськытэк уг кыльы. Гурт улонэ но вуэ Интернет, гурт адями кутэ кияз телефон, луэ «инвестиционно-привлекательный», нош солэн улонэз кыӵе ке музейлы пӧрме: татчы вуо туристъёс удмуртлыкез веръяны. Соин валче золгес шӧдӥське, кызьы удмурт, ачиз малызэ валатэк, мӧзме вашкала дыръёслэсь, выжыосыз борды кыстӥське: «Но снова в ночь его зовёт Нюлэс-Нюня/ На берег пруда: «Пуксьы, Вася, чаль…»

Ӟуч бордысь удмурт

Б. Анфиногеновлэн гожъяськон амалыз сярысь нимысьтыз вераны кулэ. Со нырысетӥ кылбурчи, кудӥз удмурт литератураын кык кылын гожъяськыны кутскиз. Валамон, со кылъёсын шудон ӧвӧл, со кылбурчилэн художественной поэтикаезлэн валтӥсь оглюкетэз. Нырысь ик, кызьы шуэ ачиз автор, со удмурт кылэз умой тодыны кутскиз ӵапак кылбуръёс гожъян пыр. Со сборникъя но адӟиське: нырысь кылбуръёсыз ӟуч кылын гожтэмын, собере отчы кыштырак удмурт кылъёс пырыны кутско, нош берло ини удмурт текст но валтӥсь луыны быгатэ. Озьы авторлэн биографиез пыӵа кылбуретаз. Кыкетӥез: кылъёсты суран возьматэ туала удмуртлэсь пырдэм, трос полэс малпаськон, вераськон сямзэ. Быдэс дунне — со текст, нош удмуртъёс, тужгес но городын улӥсьёсыз, уло ӟуч кылын гожтэм текстын, ӟуч кылъёс, клишеос, валатонъёс асьмемыз котырто, отчы ик чуртнаське на англи дунне но: «Я — Чудь вотяцкая…/ Читаю, говорю, пишу по-русски…/ Замыкаюсь в себе по-удмуртски…». Со ӟуч текстэз луэ-а удмуртомытыны? Б. Анфиногенов ӵектэ синтез амалэз. Озьы ӟуч кыл борды итӥське удмуртэз, Леди Гага пӧрме Леди ӟазеглы, кумышка сураське брендиен. Умой-а со? Ӧйтӧд ини, но зэмос улонын со озьы, иське, кылбуретын но луыны кулэ. Озьы поэтлэн кылтӥрлыкез ас кожаз кылдытэ мур пуштрос.

айшет будущего

Б. Анфиногеновлэсь кылбуретсэ авангард ӧре пыртыны луоно, со матын луэ ӟуч литератураысь 20-тӥ даурлэн кутсконысьтыз футуризмлы. Футуристъёс, кызьы тодмо, Совето Союзлэн кивалтэтэныз юн кусыпъёс возизы, тросэз кылбуръёссы совето властез ушъязы, выль улонэ ӧтизы. Б. Анфиногеновлэн но кылбуръёсаз трос кесяськон пусъёс, со калыклы меӵак вазиське, мар ке косэ, лозунгъёсын вераське. Мон сое туала Кузебай Герд шуысал. Югдытӥсьмы тыршиз удмурт калыкез сайкатыны, выль дуннеез адӟыны, нош егит кылбурчи удмуртъёсты удмуртъёс луыны косэ, выжыоссэс гажаны, асьсэлэсь историзэс тодыны: «Удмурт луны — вот мода», — шуэ кылбурчи. Но татысь но выль юан кылдэ — «Кин-о тон? Кин-о мон? Кинъёс ми?» — «То ли недотатары, то ли недоэстонцы…» Удмурт луыны но капчи ӧвӧл ини.

Татын вератэк уз луы этнофутуризм сярысь. Зэмзэ но, Б. Анфиногеновлэн кылбуретэз этнофутуризм эстетикалы матын луэ. Сое но сюлэмшугъяськыто юанъёс: кызьы пичи калык азьланяз улоз, быгатоз-а аслыз инты шедьтыны, мар луоз удмурт кылын? Со но герӟа кылбуретаз вашкалазэ но туалазэ, пичизэ но бадӟымзэ, гурт но кар улонэз, дунне но удмурт лулчебертэз: «Своё называю всеобщим…», «на мировом пеньке сидели/ мурома, меря и веси…» Этнофутуристъёс кылдыто ог-огзылы пумит луись арбериослэсь, валатонъёслэсь сузьем улонэз. Нош постэтнофутурист Богдан Анфиногенов улэ со дуннеын, кызьы ачиз гожтэ: «постэтнофутуризм — со идеология ӧвӧл, со милям улонмы». Сураськем, коллаж выллем дунне, кытын огазеяськемын электрокрезьгур но вашкала гуръёс, бакча но глянец, тектоник но тапыртон, постмодернизм но буддизм, фин-угор но япон культура. Мукет дуннеез солэн ӧвӧл. «Пусть взрыв этничности/ Покажет мне весь образ Эш-тэрека», — гожтэ кылбурчи. Ма, Б. Анфиногенов ачиз но пуштытӥз кадь удмурт литератураез. Али дырлы со тужгес яркытэз, тодмоез, аспӧртэмлыкоез кылбурчимы. Оскисько, со азьланяз мар ке выльзэ усьтоз на, асьмемыз зуркатоз на.

Анастасия Шумилова

Удмурт Дунне
By Удмурт Дунне Июнь 21, 2016 15:28