Тазалык вылын бакча химия суретъёс уг шӧдӥсько-а?

Удмурт Дунне
By Удмурт Дунне Июнь 21, 2016 11:29

nasotke.ru

Берло дыре тросэз сад-бакча возисьёс жаг турынэз но, нымы-кибыосты но пӧртэм суретъёсын быдто. Нош убооссы вылэ удобрениос ватсало. Мон татчыозь туж тыршисько вал ай бакчаме химилэсь чылкыт возьыны. Но, оло, мон янгышасько? Тазалык вылын со суретъёс уг шӧдӥсько-а?

Ирина Николаева., Можга город

 

Валэктон  сётэ Россиысь наукаосъя академилэн Урал ёзысьтыз механикая институтысь химия наукаосъя доктор Вадим Петров:

—  Улон азинтӥське, зэмзэ но, кылдо выль но выль препаратъёс. Соос адямиослэсь улон-вылонзэс капчигес карон понна малпамын. Колорад бӧчыосты, кылсярысь, кинлэн потоз на оген-оген бичаса ветлэмез. Со суретъёс поттэмын пӧртэм эскеронъёс пыр. Тазалыклы кышкытлык кылдыто шуыса, тодмо луысал ке, вуз каронэ поттэмын ӧй луысалзы. Но кин тодэ, азьланяз, оло, со суретъёсты эскерыны выль тӥрлыкъёс кылдозы, соос суретъёсты уката пыр-поч эскерыны быгатозы.

Нош туннэ нуналлы югдур сыӵе: соосты, эсэпсэ валаса, кутоно. Юнме верамын ӧвӧл ук: ведра ву юонлэн но пайдаез ӧвӧл. Озьы ик химия суретъёсын но. Котькуд суретэн пачка бордын гожтэмын луыны кулэ, ку, кӧняен сое кутыны луоно, кӧня дыр куспын солэн кужымез быре. Малпасько, макем ӝоггес со пыӵа-сылме, сокем умойгес.  Кызьы тодӥськоды, кылем даурысь 80-тӥ аръёсы туж вӧлмемын вал дуст — сое кутылӥзы лемтэйёсты быдтонэ но, картошкаез тазатонэ но. Но бӧрысь эскеронъёс возьматӥзы: дуст музъемын, будосъёс бордын люкаськыса улэ, солы луыса адями пушкын лек пыктосъёс кылдыны быгато. Та тодмо луэм бере соку ик дустэз кутэмысь дугдӥзы. Туала препаратъёс туала куронъёслы тупало ни.

Табере удобрениос сярысь. Соослэн интызы туала вакытэ пичи ӧвӧл. Уката ик асьме шаерын музъемъёс начаресь. Удобрение — сыӵе ик эмъюм. Сотэк капчи ӧвӧл, но эсэпсэ но валаны кулэ. Угось соос, йќнатэм сяна, лябњытыны но быгато. Гурт хозяйство удысысь специалистъёс умой тодо, кыӵе удобрениез кӧняен кутоно — соослэсь дэмланъёссэс одно пеле пононо.

Тусспуктэм: nasotke.ru

 

 

Удмурт Дунне
By Удмурт Дунне Июнь 21, 2016 11:29