Татын пумисько тол но гужем

Удмурт Дунне
By Удмурт Дунне Июнь 20, 2016 15:55

«Удмуртия» кун телерадиокомпаниысь журналист Наталья Сергеева 15 арлэсь кема ини альпинизмен выре, гурезьёсы тубаса, тазалыксэ юнматэ, выль интыосты адӟе. Кемалась ик ӧвӧл со тубаз Эльбрус гурезе.

Шунды шорын шуныт!

Шунды шорын шуныт!

Малпан кылдэ: гурезе тубаны капчи. Но Наталья Сергеевалэсь верамъёссэ кылзыса, воксё абдраськод: ачид со интыын луысал ке, чидасал меда? Оло, гурезьлэн выжыяз ик какалӟыса усьысал ни. Угось вылэ тубемъя кислород кулэсме, шокан пытсаське. Улӥе медад питыра шуыса, пыд вылад юн возиськоно, киосыд но кужмо мед луозы. Но кызьы гожтӥз тодмо ӟуч поэт Владимир Высоцкий, кин, пе, Эльбрусэ ӧз туба, ӧз адӟы, иське, дуннелэсь чеберзэ. Быдэс Европалэн но Россилэн тужгес ӝужыт интыязы кызьы вуылытэк!

Ачиз кадь альпинистъёсын ӵош Наташа Эльбрус йылэ ӝутскиз 4 нунал ӵоже. Котькудзылэн тыбыр сьӧразы ог 30 килограммъем ныпъет. Отчы ваньмыз ӝик-ӝик интыямын: сиён пӧраны горилка, кӧлыны спальник, шуныт дӥсь, аптечка…

— Эльбрусэ ӝутсконмес кутскимы Эльбрус каргуртысен — со интыяськемын гурезьлэн 2 но ӝыны сюрс метраз, — веранзэ мытэ Наталья Сергеева. — Вамыш бӧрсьы вамыш, одӥг метр бӧрсьы эшшо одӥг метр — макем вылӥе ӝутскиськод, сокем секытгес но секытгес луэ шоканы. Вуимы 3 но ӝыны сюрс метре, нош отын лымы ни! Улӥязгес гурезь џужалэс-вож турынэн, кытӥ-отӥ куакъёсын шобырскемын ке, татын зэмос тол кузёяське! Но нуназе шорын шунды зол пиштэ, пыд улысьтыд кезьыт лымыез уд шӧдӥськы, тыныд пӧсь зарезь дурын кадь шуныт потэ. Таӵе дыръя футболкаен гинэ ветлӥмы. Со понна уйин пиньёс ваче йӧтыло — сокем кезьыт. Но кынмон но, пӧсян но вунэ, йыр вадьсысьтыд маке быдӟа кизилиосты адӟыса. Отын соос со быдӟаесь! Нырысьсэ адӟи но — синъёсылы ӧй оскы! Эсьмаса, бадӟым из борды шуккем пыдчиньые сярысь но вунэтӥ.

3 сюрс 900 метре тубыса, альпинистъёслэн группазы турбазае интыяськиз — шутэтскыны, шоканы, одӥг кылын вераса, отысь климатлы дышыны. Эльбрусэ тубон угось, гурезьлэн зарезьлы матэ интыяськеменыз, трослы секытэнгес сётске, шуом, Гималайёсы ӝутсконэн ӵошатыса. Турбазаын кужым люкаса, альпинистъёс нош ик сюрес вылэ вырӟизы.

— Гурезе тубыны юртто трекинг бодыос, — веранзэ азьланьтэ Наташа. — Соос вылэ пыкъяськиськод но, тыбыр сьӧрысь рюкзак сокем секыт уг йӧты ни. Со сяна, гурезе тубисьёслэн одно ик луыны кулэ, кызьы ми, альпинистъёс, куспамы вераськомы, «кошки» арберизы — сыӵе корт пиньёс, кудъёссэ юнматыны луэ пыдкутчан борды. Гурезьлэн куд-ог интыосаз угось туж кышкыт: мур ущельеос шедьыло, пыдэссы уг ик адӟиськы, нош вылзы йӧэн шобырскемын. Таӵе ледникъёс лачак — соос кылдэмын уно сюрс аръёс талэсь азьло. Пыдъёс дыр! куалекъяло, таӵе йӧ вамен потыку, нош со кытӥ-отӥ езамын на — тон улын тани-тани пилиськоз кадь. Нуназе шунды улын со ледникъёс шунало, ву шапыкъёс одӥг ӧре люкасько но жильыр! уллань васько.

Гурезьёсын куазь ӝог вошъяське: син куспын жобаськыны кутске, кужмо тӧлэн йырин синъёсты усьтэм ик уг луы. Альпинистъёс тодо: гурезе тубыны тупась дыр — вазь ӵукнаысен нуназеозь. Уд вала, кыӵе мылкыдыз луоз куазьлэн нуназе бере.

— Эльбруслэн йылаз вераны луонтэм чебер суред усьтӥське, — веранзэ азьланьтэ Наташа. — Мамык пилемъёс сьӧрысь адско тӧдьы лымыен шобырскем Кавказ гурезьёс, кыдёкын-кыдёкын адӟиське Сьӧд зарезь. Гадь тыр шокаськод — табере шокан пась уг пытсаськы ни, угось дышиськод ни ичи кислородэн омырлы. Сюлмын гань-гань но капчи: тани тон вормид самой ӝужыт гурезез — Эльбрусэз!

* * *

Эльбрус — кысэм вулкан. Со берпуметӥзэ пуштӥз 45 сюрс ар талэсь азьло. Пӧртэм калыкъёс сое пӧртэм сямен нимало: кабардинъёс — Ошхамахо (шуд гурезь), грузинъёс — Ялбуз (ял — сильтӧл, буз — йӧ), карачаевецъёс но балкаръёс — Минги-тау (бырисьтэм гурезь).

Елена Никитина

 

Удмурт Дунне
By Удмурт Дунне Июнь 20, 2016 15:55