Татьяна Ишматова: Удмурт шӧмлы ышыны ум сётэ!

Удмурт Дунне
By Удмурт Дунне Июнь 8, 2016 16:00
061086,Ишматова Татьяна,заместитель министра национальной политики

Татьяна Ишматова, «Удмурт Кенеш» огазеяськонлэн тӧроез.

Ижысь Кызьпу арама город шорын интыяськемын, быдӟалаез 8,5 гектар. Ӵапак та инты котьку огазеялляз городысь удмуртъёсты.

Интыез ӟеч шуыса, Кызьпу арама шоры учкылӥсьёсыз котьку вал. Ас вакытаз отчы скейт-парк усьтон пумысен но вераськылӥзы. Толалтэ нискылан вылысь гурезь ӝутӥзы. Табере выль инвестор кылдэмын. Ижысь «Факт» фирма аслаз проектэныз Иж город администрациез тодматэм ни. Арамалы выль шӧм пыртон вылысь чакламын 250 миллион манет висъяны.

Фирмалэн кивалтӥсез Андрей Лямин верамъя, арамаез котькинлы тупамон карыны малпало. Татын шутэтскыны, тазалыксэс юнматыны быгатозы пичиос но, бадӟымъёс но, инвалидъёс но. Калыкез гочатӥсь, бордаз кыскись карыны чакламын. Туннэ уго парке сокем трос кожась но ӧвӧл. Шудон площадкаосыз вужмемын.

Арама шулдыр кызьпуосын. Соос спортобъектъёс пӧлы медаз ыше шуыса, юртъёсты пиялалэсь ӝутыны чаклало. Со сяна, скалодром луоз, пырон ӧсэз кечлы укшалоз, шуо. Но парклэсь аспӧртэмлыксэ мед возьматысал воксё мукет тодмет — удмурт шӧмо карон. Уг яра вунэтыны: татын ортчыло удмуртъёслэн Гербер но Виль шулдыръяськонъёссы, татын удмуртъёс радъяло вал Инмарлы вӧсяськонэз.

Жаляса верано, проектэз город администрациын эскерыкузы, «Удмурт Кенеш» огазеяськонэз ӧз ӧте. Но арамаез утён пумысен огпол гинэ калык ӧз вазиськылы ни. Огазеяськон но ас кыл вылаз чурыт сылоз: азьланяз но Кызьпу арама удмуртъёсты герӟась инты луыны кулэ. Вераськонъёс вань, татын Гербер но Виль шулдыръяськонъёсты ортчытъяны нимысьтыз сцена луоз, кык этажъем удмурт кафе-ресторан усьтӥськоз шуыса. Та ваньмыз зэмен ик быдэсмиз ке, туж шумпотымон луоз.

Администрациысь ки-валтӥсьёс фирмалы вазиськизы, проектэз эшшо огпол учкыны косыса. Калык пӧлын юалляськон ортчоз. Санэ басьтыны косэмын «Удмурт Кенешлэсь» мылкыдъёссэ но куронъёссэ. «Факт» фирмалы «Удмурт Кенеш» малпанъёссэ вераны дасяське матысь дыре ик.

Удмурт Дунне
By Удмурт Дунне Июнь 8, 2016 16:00