«Шундыкар» лагерь вите тонэ

Удмурт Дунне
By Удмурт Дунне Июнь 1, 2016 12:43
шундыкар

«Шундыкар» лагерьлэн ӧсъёсыз усьтэмын 18 аресозь нылпиослы.

Быгатӥсь нылпиос понна 19-тӥ-28-тӥ гудырикошконэ «Ёлочка» лагерьын ортчоз «Шундыкар» лагерь.

«Шундыкар» лагерьлэн ӧсъёсыз усьтэмын 18 аресозь нылпиослы. Туэ лагерьын 9 ӧръёс луозы. Отчы шедён понна 18-тӥ пӧсьтолэзёзь ужъёстэс келялэ.

  • Суредаськон (8-тӥ-11-тӥ классъёс). «Турын бусы» темая 3 пӧртэм амалэн (графика, буёло суред но коллаж) суред лэсьтоно.
  • Литература (8-тӥ-11-тӥ классъёс). Яратон (адямиез, вордскем шаерез, киноез, эшъёсты…) темая 3 кылбур яке верос гожтоно. Произведенияды «яратон», «яратӥсько», «яратонэ» но та выллем мукет кылъёс медаз пумиськылэ.
  • Крезьгур:

— Фольклор (5-тӥ-9-тӥ классъёс). 2 удмурт калык кырӟанэз крезьгуро инструмент шудэм улсын яке сотэк диктофонэ гожтоно.

— Эстрада (8-тӥ-11-тӥ классъёс). 2 пӧртэм удмурт кырӟанъёсты быдэстыса, видео гожтоно. Одно ик пусъе, кыӵе крезьгуро инструментэн шудӥськоды, кыӵе кружоке ветлӥськоды.

— Крезьгуро инструментъёсын шудӥсьёс (7-тӥ-11-тӥ классъёс). Россиысь тодмо группаослэсь 2 кырӟан гурзэс кыӵе ке крезьгуро инструментэн (гитара, барабан, синтезатор, арган) шудыса, видео лэсьтоно.

  • Тележурналистика (7-тӥ-11-тӥ классъёс). Ачид сярысь я улонысьтыд тунсыко учыр яке гуртысьтыд аспӧртэмлыко инты сярысь веранэн видео лэсьтоно (5 минутозь), пусъёно камераен ужаны быгатэмдэ.
  • Театр (7-тӥ-11-тӥ классъёс). Басняез, кылбурез яке спектакльысь люкетэз учкытэк лыдӟыса, видео лэсьтоно (3 минутозь).
  • Крезь лэсьтон (7-тӥ-11-тӥ классъёс). Пулэсь лэсьтэм ужъёсын 3 туспуктэмдэс но ужамдэс возьматӥсь видео лэсьтоно.
  • Эктон (8-тӥ-11-тӥ классъёс). Удмурт калык эктонэз туала яке вашкала крезьгуръя быдэстэмдэс видеое гожтоно (3 минутозь).
  • Дӥськут дизайн (7-тӥ-11-тӥ классъёс). «Городын нуллыны туала удмурт дӥсь» темая 3-5 эскиз лэсьтоно, умой луоз, котькуд эскиз борды валэктон ватсады ке.
  • Видеоискусство (8-тӥ-11-тӥ классъёс). 2-3 минутъем кырӟанлы видеоклип лэсьтоно. Нылпи мед луоз оператор яке монтажёр.

Ужъёстэс ыстоно таӵе адресъя: 426063, Ижкар, Орджоникидзе урам, 33-тӥ «а» юрт, удмурт егитъёслэн «Шунды» огазеяськонзы яке электрон почта пыр troninaolga@yandex.ru адресъя. Гожтэтады пусъёно нимтулдэс, вордӥськем ардэс, улон интыдэс, кыӵе классэз быдэстэмдэс, пӧртэм огазеяськонъёсы пыриськемдэс, «Шундыкар» лагере вуылэмдэс (арзэ но ӧрзэ), эн вунэтэ пусйыны телефон номердэс яке электрон почтадэс.

Йылпумъянъёс 27-тӥ пӧсьтолэзь бере печатламын луозы «Удмурт дунне» но мукет элькун газетъёсын, «Шунды» огазеяськонлэн udmshundy.ru сайтаз.

Мария Векшина
Туспуктэм: «Шунды» огазеяськон

Удмурт Дунне
By Удмурт Дунне Июнь 1, 2016 12:43