«Шудком»: Йыр ужа, лул шутэтске

Удмурт Дунне
By Удмурт Дунне 2 июня, 2016 16:32
дементъев, шудком

Сцена вылэ потӥз ужрадэз нуись Роман Дементьев.

«Шудком» клуб нош люказ визь люкъёсты. 31-тӥ куартолэзе «Ковёр» караоке-клубын 9 командаос визьёсынызы мертаськизы. Милям но, «Уморто» командаысь егитъёслэн, кужыммес эскереммы потӥз.

Татчы вуиськод но валаськод: командаослэн вожвылъяськон мылкыдзы ӧвӧл, соос ог-огенызы тодматско, верасько. Озьы ке но милям, егитъёслэн, сюлэмъёсамы кышкан каръяськиз: «Мар ми татын кариськомы?». Угось шудӥсьёс пӧлын туж визьмо, дано адямиос: «Удмурт дунне» газетлэн, Историяя, кылъя но литературая институтысь тодосчиослэн «Дэмен» огазеяськонзылэн командаоссы. Нош ми — огшоры студентъёс!

— Тазэ шудонмес дышем сямен радъямы, — шуэ «Шунды» огазеяськонлэн тӧроез Ольга Тронина. — Шумпотӥмы, таязэ но трос командаос шудыны куриськизы шуыса. Но кутӥмы 9-ссэ гинэ.

Тани шудон кутскиз. Сцена вылэ потӥз ужрадэз нуись Роман Дементьев. Валэктыны кутскиз: луоз 27 юан, соос бордын малпаськыны тӥледлы 60 секунд сётӥське. Мур шокчимы: «Ми дасесь!».

шудком, егитъёс

Мур шокчимы: «Ми дасесь!».

Юанъёс вал пӧртэмесь: одӥгъёсыз эскеро тынэсьтыд котыр ласянь тодонъёстэ, мукетъёсыз — малпаськыны быгатэмдэ. Кылсярысь, юан: «Австралиысь «Манки Миа» пляж тодмо луиз соин — отын матысен луэ адӟыны дельфинъёсты. Соос уллёен-уллёен зарезьысь та лазег интые вуо. Малы дельфинъёс отчы лыкто?» Нош тӥ тодӥськоды-а, малы? Одӥг команда но та юанлы шонер валэктон ӧз шедьты. Дельфинъёс, пе, татчы адямиос шоры учкыны вуо. Оло зэм, оло даур шуыса, кӧтмес ик кутыса серекъямы ни. Куддыр одӥг юанлы трос валэктонъёсмы кылдылӥзы, куддыръя шонерзэ палэнтылӥм — кагаз вылэ янгышсэ гожтылӥм. Эх! Жаляса верано, удмуртлыкен, Удмурт шаерен герӟаськем юанъёс ӧз чузъяське. Но радъясьёс оскытӥзы: вуонояз одно ик луозы!

Шудон 3 люкетлы люкемын вал, котькудаз быдэн 9 юан. Висказ аслаз кырӟанъёсыныз шумпоттӥз Ксения Ахметханова.

Тани шудон пумаз вуиз. Кыӵе меда инты басьтӥмы? Кин вормисе потӥз? Йылпумъянъёсты кылӥмы — туж ик ӟеч ӧвӧл шудӥськеммы. Но мылкыдмы ӧз усьы, усто командаос понна шумпотӥмы.

шудком1

Нош нырысетӥ инты понна нюръяськон зол пуромиз.

3-тӥ инты басьтӥзы «Удмурт дунне» газетын ужасьёс. Нош нырысетӥ инты понна нюръяськон зол пуромиз. «Удмуртия» ГТРК-ысь «Кыло-ымо» но «Дэмен» огазеяськонысь «Валамон, Паримон» командаос одӥг кадь баллъёс люказы. Соин ик соослы эшшо одӥг юан сётӥзы на. Котыр шыпыт — ваньзы возьмало, кин вормоз. Шудӥсьёслэн мылкыдъёссыя валамы: «Валамон, Паримон» команда азьлане потӥз.

— Милям куд-ог адямиосмы «60 секунд» шудонэ пырисько, — шуэ «Валамон, Паримон» командаысь Наталья Дмитриева. — «Шудкомлэн» нырысетӥ шудоназ ик милям тактикамы кылдӥз. Соин ик, таязэ но вормыны быгатӥмы, дыр. Малпасько, вуоно шудонъёсын мукет командаос но кыдалозы ни, ӵошатскон эшшо но тунсыкогес луоз.

шудком, удмурт дунне

3-тӥ инты басьтӥзы «Удмурт дунне» газетын ужасьёс.

Нош али «Шудком» визьбур клуб вис лэсьтэ, 3-тӥ шудон куарусёнэ гинэ командаосты люкалоз на. Соин ик визь погъёслэн гужем ӵоже выль кужым люкамзы луоз. Уг тодӥськы, кызьы тӥ, нош ми та шудонэ одно пыриськомы на, малы ке шуоно татын йыр ужа, нош лул шутэтске.

Мария Емельянова

Туспуктэмъёс: С. Соколов

Удмурт Дунне
By Удмурт Дунне 2 июня, 2016 16:32