Оло сиёд, оло учкод

Удмурт Дунне
By Удмурт Дунне Июнь 21, 2016 16:00

Оло сиёд, оло учкод

Ижын улӥсь Надежда Кутявина — кондитер. Берло дыре торт чеберъя, ческыт пӧраськеменыз котькинэ паймытъя.

3

Н. Кутявина но солэн аспӧртэмлыко тортэз.

Надежда Кутявина вордскемын Алнаш ёросысь Ӧркагуртын. Пичи дыръяз мунёоссэ, чебер дӥсям сяна, турлы пыжиськемъёсын «куноятылэм». Гур котырын берган мылкыдзэ бурдъяз на анаез Ираида Викторовна Николаева. Ас вакытаз со ужамын Улын Сыръезь школаын пӧраськись луыса. Надя, покчи классъёсын дышетскыкуз ик, анаез вӧзын чак-чак, тортъёс лэсьтыны кутскиз. Школаын ортчылӥсь ӝытъёсы но аслэсьтыз пыжиськемъёссэ гинэ нуллӥз.

— 9-тӥ класс бере Ижысь 25-тӥ училищее дышетскыны мынӥ, ма но со пыжиськыны быгатӥсько ке но вал, туж синмаськыса учкылӥ профессионалъёслэн ужъёссы шоры, — шуэ Надежда Кутявина. — Кылсярысь, бигеръёслэн кадь чак-чак лэсьтэме потылӥз. Соослэн буй-буй, пызырес луэ.

Бигер эшъёсыз сое зэмос чак-чак но трюфель лэсьтыны дышетӥзы.

— Кӧня ке ар ортчыса, школаын дышетскем эшъёсыным пумиськон ӝытэ печення пыжыса нуи, — шуэ Надежда. — Пи эшъёсмы ушъяны кутскизы: тон, пе, школаын дышетскыкуд но, туж ческыт печення пыжылӥськод вал. Сьӧрам ваем сиёнэ ӝӧк вылысь соку ик сииськиз. Эшъёссы кылзэс ик ньылӥзы кадь.

Дышетсконзэ йылпумъяса, Надя городысь одӥгаз кафеын ужаз. Табере Надежда Вячеславовна тортъёс чеберъян бордын тырше. Ма гинэ уг пӧрмыты, куд-ог дыръя сиёнъёсыз суредъёслы укшало. Торт формаосыз гинэ 4 пӧртэм: 1, 1 но ӝыны, 2 но 5 килограмм пыжыны. Ас киыныд пыжемез, пе, магазинысь басьтэмезлэсь трослы дунтэмгес но ческытгес пӧрме. Кылсярысь, бис-квитлэсь огшоры торт лэсьтон понна туж ичи басьяськоно: быдэн 60 грамм сакыр но тӧдьы пызь, 2 курегпуз гинэ. Курегпузэз, сакырен огазеяса, миксерен зол-зол шукконо но отчы калленэн пызь ватсано. Дась суретэз пӧсь гуре (180 градус) пыжыны пуктоно. 40 минут воземез бере гурысь поттоно но шори кык табаньлы люконо.

5— Тортлэн ческытэз крем бордысь потэ, — веранзэ азьланьтэ пӧрась. — Сое котькыӵе варенняен ческытатыны луэ. 4 пуньы варенняез 4 пуньы вуэн сурасько, куд-ог дыръя, ческытгес мед луоз шуыса, шоколад пыры ватсасько на. Ваньзэ ӧжытак шунтӥсько но вандэм табань вылэ вӧлдӥсько. Бӧрысь со вылэ кыкетӥ табанез кымано. Варення пыӵам бере сиён дась, сое кремен чеберъяны луэ на.

Туала вакытэ адямиос вордскем нуналъёсазы аспӧртэм тортъёс дасяны куро. Тани кылем арня пумын гинэ пичи пияшлы кузьмазы «футбол туп». Машинаос, сяськаос сярысь уг ик вера ни. Сиёд, оло, шоразы учкыса пукод — сокем чебересь. Берло дыре капкейк (пичи кекс) курисьёслэн лыдзы йылћз. Со понна, пе, гужем емышаськом. Угось кекс выллем сиёнлэн шораз ческыт емыш поно. Пӧрасьлэсь куд-ог рецептъёссэ газет лыдӟисьёсмылы но дэмласькомы.

Перепечлы ыльнянь

Кулэ: 500 грамм ву, 320 грамм йӧлвыл, 2 пачка маргарин, пызь, шӧмызъя сылал, 1 чечы пуньы сода но уксус.

Лэсьтэм ыльнянь чурыт медаз луы. Отчы ватсано уксусэн кисьтэм сода. Перепеч пыжем сяна, та ыльнянез кутыны луоз бальыш дасянэ но.

 Кекс

Кулэ: 425 грамм тӧдьы пызь, быдэн 200 грамм йӧгурт, йӧлвыл, емыш, сакыр, 3 курегпуз, 15 грамм разрыхлитель.

Ваньзэ тае, огазе карыса, сурано. Ыльнянь нап луыны кулэ. Сое пичи формаосы быдэн 20 граммен тыроно. Со вылэ ватсано 5 грамм емыш но выльысь 20 грамм ыльнянен пытсано. Пичи кексъёсты пӧсь гурын 12 минут пыжоно.  Дась пыжослэсь вылзэ чеберъяно на.

 Белковой кремен бисквит

Кремлы кулэ: 2 курегпуз, 100 грамм сакыр, 40 грамм ву, 9 процентъем уксус яке лимон кислота.

Нырысь ик лэсьтоно сироп. Со понна сакырез но вуэз пичи тыл вылын шунтоно.  Мукет посудаын курегпуз тӧдьыез миксерен шукконо. Собере отчы калленэн ватсано шуныт сироп, нош миксерен шуккемысь дугдылыны уг яра. Дась суретэ ватсано на 3 шапык уксус. Сое воштыны луоз 1 чепыльтэт лимон кислотаен. Шуккем суретын пуньы сылыны кулэ.

Та кремен чеберъяны луэ пӧртэм пумо бисквитъёсты. Кремез кыклы люконо. Одӥг люкетсэ торт шоры пононо, кыкетӥеныз вылзэ маялляно. Дась сиёнэз огдырлы кезьыт азе пуктылоно.

Валентина Емельянова

 

 

 

Удмурт Дунне
By Удмурт Дунне Июнь 21, 2016 16:00